Ang Pag-antos Gumikan Sa Pagka-Kristuhanon

1 PEDRO 4: 13~19

13 Hinunoa, angay mong malipay nga makaambit sa mga pag-antos ni Cristo. Sa adlaw nga ang iyang Himaya ipadayag, hingpit pod ang inyong pagmaya. 14 Bulahan mo kon giinsulto sa ngalan ni Cristo. Ang Espiritu sa Himaya mikunsad ninyo. 15 Sa akong hunahuna walay kinahanglang mag-antos tungod sa pagkamamumuno, pagkakawatan, pagkakriminal o pagkahilabtanon sa uban. 16 Apan kon may nag-antos tungod sa pagkakristyano, ayaw siyag pakaulawa. Hinunoa, pahimayaa siya sa Diyos.

17 Ang panahon sa paghukom miabot na ug nagsugod sa balay sa Diyos. Kon ang sinugdan ini makahasol pag-ayo, unsay sangpotan sa wala motoo sa Ebanghelyo? 18 Kon ang tarong igo lang maluwas, unsay mahitabo sa makasasala ug sa wala motoo? 19 Busa, kon nag-antos mo sumala sa kabubut-on sa Diyos, isalig ang kaugalingon sa Matinud-anong Magbubuhat, ug padayon pagbuhat sa tarong.

PAGPAAMBIT SA MENSAHE:

Ang mga katawhan ni Jesus Cristo niadton panahun diin si Jesu Cristo nagpakabuhi pa dinhi sa yuta, maoy mga buhing saksi mismo sa anak sa Diyos diin bisan siya Diyos apan wala niya pugsa nga maotupong siya sa Diyos iyang gihubo ang tanan niyang gahum ug mitipon sa iyang mag katawhan ug sa iyang mga sumosunod diha sa pagsangyaw sa pagbuhat ug milagro ug ingon diha sa pagsangyaw sa maayong balita.

Gipakita ni Jesus Cristo ang iyang pag-antos tungod sa kasugo-an sa Amahan ug tungod usab sa iyang gugma kanatong iyang mga katawhan, diin pinaagi niini siya nagpakamatay ug nagpasakit didto sa kalbaryo sa Golgota pinaagi sa iyang kamatayon sa krus.

Mao kini ang tibuok nga mga pag-antos nga gibuhat sa atong Diyos nga diin ang iyang mga sumosunod niadtong panahuna, nag-antos usab sa mga paglutos ug sa silot sa kamatayon kinsang pagtulon-an nga gisangyaw ni Jeus Crito dili madawat usab niadtong mga Judio ug mga pariseo.

Diha niining maong ebanghelyo nagpasabot ang Diyos nga ang pag-antos gumikan sa pagkaCristuhanon maoy tuburan usab diha sa mga paglutos ug kamatayon niadtong nagasunod sa pagsangyaw sa pagtulon-an ni Crsisto, mao kini ang kabilin nga gisunod niadtong unang mga apostoles ug maoy kini nakapalig-on diha niining pagtulun-an nga kristuhanon diin hangtod niining panahuna nagpabilin pa sa pagbarog.

Kamatuoran kini sa ubang pulong sa balaang kasulatan nga nagaingon kun nagasunod ka pagtulon-an ni Kristo nan makaambit ka gayud sa mga paglutos. Mao kin ang kamatuoran usab diha sa ubang sinulat sa balaang kasulatan nga nagaingon : Mateo 16:18 nga nagaingon : Simon ikaw si Pedro ug ibabaw niining bato itungtong ko ang akong iglisea ug bisan ang kamatayon dili makabuntog niini.

2000 na katuig ang milabay diin nagapadayon sa pagbarog kining maong pagtulun-an nga gisangyaw sa Diyos diin bisan sa kamatayon sa tanang apostoles ug sa mga katawhan nga nagasunod niini apan sa kanunay nagapabilin ug nagabarog nga malig-on.

Sa ato pa mga igsoon ang mga paglutos ug mga kalisdanan nga atong na-agian diha niining maong pagtulun-an mao lamay pagsukod niining maong pagtulun-an ug sa pagsukod usab sa mag katawhan kun asa kutob ang ilang pag-ila ug pagsangyaw niining maong pagtulun-an. Ang mga paglutos mga igsoon maoy pagpalig-on sa atong pagtuo ngadto sa Diyos, ug sa pagpakita usab sa atong maayong binuhatan diha sa atong pagtuo sa Diyos sa kamatuoran.