Si Jesus Gilimod Ni Pedro

MARCOS 14: 66~72

• 66 Samtang didto si Pedro sa hawanan miabot ang usa sa mga babayeng sulugoon sa Labawng Pari. 67 Namatikdan niya sa may kalayo si Pedro nga iyang gitutokan ug giingnan: “Kauban ka ni Jesus nga Nasareno.” 68 Nangulipas si Pedro: “Wala ko masayod ni makasabot sa imong gisulti.” Ug migawas siya.
69 Didto nakita na pod siya sa laing sulugoon nga babaye nga miingon sa nagbarog sa duol: “Usa siya nila.” 70 Apan nangulipas gihapon si Pedro. Human sa pipila ka gutlo, giingnan si Pedro sa mga nagbarog didto: “Sa walay duhaduha, usa ka nila. Taga Galilea ka man, dili ba?” 71 Nangatarongan si Pedro, nanunglo ug nanumpa. “Wala koy kasayoran anang inyong gihisgotan.”
72 Unya, mituktugaok ang sunoy sa makaduha. Nahinumdom dayon si Pedro sa giingon ni Jesus: “Sa dili pa motuktugaok ang sunoy sa makaduha imo na kong ilimod sa makatulo.” Sa paghinumdom ini mihilak siya.

PAGPAAMBIT SA MENSAHE:

Ang maong ebanghelyo maoy pagpasabot nga kitang nagasunod ug nagatuo sa pagtulon-an nga atong gibarugan o sa atong hugot nga pagtuo ngadto sa Diyos, dili kita makapasigarbo o makabuhi ug pulong nga kita bisan unsaon pa sa kanunay magpabilin ang atong pagtuo, bisan sa unsa nga pagsulay sa atong kinabuhi.

Sama niining maong ebanghelyo diin si Pedro gipasidan-an na daan sa Diyos nga sa dili pa motuktugaok ang manok ug kaduha ilimod na ni Pedro si Jesus sa makatulo. Usa kini ka pagtulon-an nga angay sa pagpamalandong nga ang atong pagtuo ug ang pagpangalagad sa Diyos sa kanunay gihulga usab sa mga pagsulay ug paglutos kay kun moingon ka karon nga lig-on ka nan basin ug inigkuso-kuso sa balod sa pagsulay nan hapnig ang tanan.

Ang Diyos miingon pinaagi diha sa iyang holy spirit ang tawo nga nagabalaan nan pagahasulon gayud kini sa dautang espiritu. Ug kun ang holy spirit anaa sa imong tuo nan ang dautan anaa usAb sa imong wala sa kanunay nagahulat kun kanus-a makahigayun sa pag lingla kanimo. Niining panahuna matod pa diha sa ubang pulong sa holy spirit, pareha na kakusog ang dautan ug ang holy spirit dinhi sa ibabaw sa yuta, magbantay gayud kita mga igsoon nga dili mahulog sa laang sa pagsulay.

Ang pagkinabuhi nga naga-alagad sa Diyos maoy pagkinabuhi nga minando-an sa Diyos espiritu, diin mao gayuy atong tagaan ug dakong pagtagad ang atong gimbuhaton nga espirituhanon, ang mga kasal-aan ug mga kasaypanan anaa gayud kana isip tawo kay matod pa samtang pagkinabuhi pa kita dinhi sa ibabaw sa kalibutan, makasasala gayud kita sa huna-huna, sa pulong ug sa buhat.

Ang atong kaluwasan walay kasiguro-an kay matod pa bisan kadtong nangalagad sa Diyos ug sa kanunay naga-ampo kaniya apan diha sa ilang kamatayon, dili na nila masiguro kung asa makapaingon ang ilang kalag, nan unsa na kaha kadtong mga katawhan nga walay mga pag-ampo asa kaha paingon ang ilang kalag, kay ang kaluwasan nga gisaad sa Diyos pinaagi kang Cristo Jesus dili kini premyo o ganti tungod sa maayong buhat aron sa ingon walay magapasigarbo sa atubangan sa Diyos nga siya maluwas tungod sa iyang maayong buhat kundili ang kaluwasan naga-agad tungod sa gugma ug kaluoy sa Diyos.