Paghukom Sa Uban

LUCAS 6:37~42

37 Ayawg hukom, aron dili mo hukman; ayawg tunglo ni bisag kinsa, aron dili mo tunglohon; pasayloa ang uban, ug pasayloon pod mo. 38 Panghatag ug hatagan pod mo; makadawat mo sa igong takos, dakson pa, paawason gani, nga ibubo nila sa inyong sabakan. Kay ang taksanan sa inyong paghatag mao poy taksan sa inyong madawat.”
39 Unya, misulti siya sa usa ka misteryo: “Makaagak ba diay ang buta sa laing buta? Dili ba, mahulog hinuon, ang duha sa kanal? 40 Dili molabaw sa magtutudlo ang tinun-an. Apan ang nahingpit na, nahisama sa magtutudlo. 41 Nganong makita man nimo ang puling sa mata sa imong igsoon, apan dili ang troso sa imoha? 42 Unsaon mo pag-ingon sa igsoon: ‘Igsoon, tugti ko pagkuha sa puling sa imong mata,’ nga wala ka man makakita sa troso sa imoha? Tigpakaaron-ingnon! Kuhaa una ang troso sa imong mata, ug ayha mo ra makita nga mas maayong kuhaon ang puling sa imong igsoon

PAGPAAMBIT SA MENSAHE:

Ang maong ebanghelyo, maoy pagpasabot lamang nga walay tawo nga gitugotan sa Diyos sa paghukom sa iyang pagkatawo. Ang Diyos miingon kun adunay nakasala kanimo nan isumbong sa Diyos aron siya maoy mahibalo nga mopahimangno niini, Ayaw hukmi ang imong isigkatawo aron usab dili ka hukman sa imong Amahan didto sa langit. Kun mangayo ka ug kapasaylo-an sa Diyos diha sa mga sala nga imong nabuhat nan pasaylo-a usab ang imong isigkatawo kay diha usab magsumikad ang kapasaylo-an sa imong mga sala.

Ang Diyos lamang ang adunay katungod sa paghukom sa tibook kalibutan inig-abot sa hustong panahun, apan ang mga paghukom nga gitigayon dinhi sa ibabaw sa kalibutan, wala magsumikad sa kabubut-on sa Diyos apan iyang gitugutan aron usab sa pagsukod sa iyang mga katawhan ug usab sa paghinay-hinay nga pagsilhig sa mga malapason.

Ang paghukom nga iya niining kalibutana nagsumikad usab kina sa balaod sa tawo diin kun imong masupak nan aduna kay silot nga mapaabot diin bisan kun inosente ka sa salaod apan maambitan mo gayud ang mga silot kay matod pa ” Ignorance of law excuses no one”.

Ang hukom sa Diyos mao man kini ang kadaugan sa Diyos diin magahari na siya dinhi sa yuta ug didto sa langit, apan niining panahuna hataas pa ang pasaylo sa Diyos diin kitang tanan gitagaan pa ug kapasaylo-an sa atong mga sala kun kini atong pangayoon nga kinasingkasing. Diin matod pa tanan nga sala aduanay kapasaylo-an madako ug magamay, diin bisan kadtong adunay mabug-at nga sala aduna pa silay kapasaylo-an kun kini ilang pangayoon sa Amahan apan ang silot magpabilin apan dili na didto sa kalayo sa impyerno kun dili didto na sa purgatoryo.

Mao lamay gipangayo sa diyos ang kanunay nga mga pag-ampo, ilabi na diha sa santos nga rosaryo, diin ang tanan nato nga mga kauban ug mga tawo nga wala motuo sa Ginoo atong i-ampo, bisan kadtong mga katawhan nga gustong moilog niining atong pulo sa Mindanao atong iampo kay kun kabubut-on gayud sa Diyos nan mopasilong gayud sila sa landong sa espiritu santo kay Diyos lamang ang adunay gahum sa pagpahumok sa matig-a nga kasingkasing sa tawo.