Gibanhaw Ni Jesus Ang Anak Nga Lalaki Sa Biyuda

LUCAS 7:11~17

• 11 Unya, miadto si Jesus sa lungsod nga gitawag og Naim uban sa mga tinun-an ug sa daghang tawo. 12 Sa hapit na sila moabot sa ganghaan sa lungsod, mao poy paggawas sa mga tawo nga nagdalag minatay – ang bugtong anak nga lalaki sa usa ka biyuda nga gikuyogan sa daghang tawo sa lungsod.
13 Sa pagkakita ini ni Jesus, naluoy ang Ginoo ug miingon: “Ayawg hilak.” 14 Miduol siya ug mihikap sa lungon; mihunong sab ang nangyayong. Ug miingon siya: “Batan-on, nagmando ko nimo, bangon!” 15 Milingkod ang patay ug misugod pagsulti; ug gitugyan siya ni Jesus sa inahan. 16 Nangalisang ang tanan, ug midayeg sa Diyos sa pag-ingon: “Mitungha kanato ang halangdong propeta, ug miduaw ang Diyos sa iyang katawhan.” 17 Mikaylap ang maong balita mahitungod niya sa tibuok yuta sa mga Judio, ug sa kasikbit nga kayutaan.

PAGPAAMBIT SA MENSAHE:

Ang maong ebanghelyo maoy pagpasabot lamang nga kamatuoran ang pagkaanak sa Diyos ni Jesus Cristo, gipakita lamang sa Diyos ang dugang mga milagro aron makasaksi ang mga katawhan nga ang anak sa Diyos nga nagpakatawo tuburan sa walay kinutubang gahum. Sila ang tag-iya sa atong kinabuhi busa sila usab ang adunay katungod sa pag kuha ug sa pag-uli niini.

Apan angay masayran sa tawo nga ang pagpakabuhi niining kalibutan usa na ka milagro gikan sa Diyos diin iyang gipakita ang walay kataposang gahum. Matod pa ang tawo nagpakabuhi niining kalibutan diin gitagaan sa Diyos ug tulo ka kinabuhi, una ang materyal nga lawas diin ania pa kanato ang tanan, ug kita maoy nagabuot sa unsay may atong gustong buhaton dinhi sa kalibutan.

Ang ikaduha mao ang atong espiritu nga maoy nagahatag kanato ug ginhawa, maoy nagahatag kanato ug kinabuhi gikan sa atong pagkahimugso , diin matod pa dako ang bulohaton sa atong espiritu kay samtang nagkatulog ang tawo mogawas ang atong espiritu ug moadto sa Amahang Diyos aron sa pagsumbong sa imong binuhatan, nan sa kanunay nahitala ang imong binuhatan dinhi sa yuta pinaagi sa iimong espiritu,

Ug ang ikatulo mao ang atong kalag diin mao na kini ang magapadayon ngadto sa ikaduhang kinabuhi human sa kamatayon, kay matod sa kamatayon sa tawo ang iyang lawas mobalik sa abog, ug ang iyang espiritu mobalik sa Diyos ug ang iyang kalag maoy molawig ngadto sa laing kalibutan aron sa paghulat sa kataposang paghukom.

Bulahan ug balaan ang tawo nga buhi pa kay uban pa man kanato ang epiritu sa Diyos, apan kun atua na sa laing kalibutan nan ang imong kalag na lang ang magtikaw-tikaw diin kun wala kini mga pag-ampo niadtong buhi pa ang imong lawas nan wala kini panalipod sa iyang kaugalingon, ug matod pa gaampo man ang mga kalag apan dugay madungog, ug una dunggon ang pag-ampo sa buhing tawo, kay ania pa man kanato ang espiritu nga maoy mensahero nagdto sa Diyos.