Si Jesus Didto Sa Puloy-anan Ni Simon Nga Pariseo

LUCAS 7:36~50

• 36 Gidapit si Jesus sa usa ka Pariseo aron pagpakigsalo niya. Misulod siya sa balay ug milingkod sa sopa aron mokaon. 37 May babaye adtong dapita nga giilang makasasala. Sa pagkabati niya nga naa si Jesus sa balay sa Pariseo, miadto siya nga nagdalag pahumot sa tibod nga alabastro. 38 Mibarog siya sa likod, sa may tiilan ni Jesus ug mihilak. Sa luha gihugasan niya ang tiil ni Jesus, ug gipahiran sa buhok unya, gihagkan ug gidihogan sa pahumot.
39 Sa pagkakita ini sa Pariseo, nanaway siya, nga naghunahuna sa kaugalingon: “Kon propeta pa siya masayran unta niyag kinsa ni, ug unsang klaseha sa pagkababaye ang mihikap niya – makasasala!”

40 Apan misulti si Jesus: “Simon, may isulti ko nimo.” Mitubag siya: “Magtutudlo, sulti.” 41 Miingon siya: “May duha nga nangutang sa tigpautang. 5,000 nga salapi ang utang sa primero ug 50 ang sa ikaduha. 42 Apan wala silay ikabayad. Busa, gipasaylo silang duha. Karon, sultihi ko, kinsa nila ang mas magmahal niya?

43 Mitubag si Simon: “Alang nako, ang gipasaylog mas dako.” Giingnan siya ni Jesus: “Husto ka.” 44 Milingi siya sa babaye ug miingon kang Simon: “Nakakita ka ba ining babayehana? Misulod ko sa inyong balay ug wala ka mohatag og tubig alang sa akong tiil, apan gihugasan niya sa luha ang akong tiil, ug gipahiran sa buhok. 45 Wala ko nimo hagki, apan sukad sa iyang pagsulod wala siya mohunong paghalok sa akong tiil. 46 Wala mo dihogig lana ang akong ulo, apan gibuboan niyag agwa ang akong tiil. 47 Busa, ingnon tikaw, gipasaylo na ang daghan niyang sala, kay dako ang iyang pagmahal. Ang nagmahal og gamay, gamay ra pod og gipasaylo.
48 Miingon si Jesus sa babaye: “Gipasaylo na ang imong mga sala.” 49 Naghunahuna ang diha uban niya sa lamesa: “Nanamastamas siya sa pagpasaylo sa mga sala!” 50 Apan miingon si Jesus sa babaye: “Giluwas ka sa imong pagtoo! Lakaw nga malinawon.”

PAGPAAMBIT SA MENSAHE:

Ang maong ebanghelyo maoy pagpasabot lamang nga ang kaluwasan nga gisaad ni Jesus ngadto sa mga katawhan dili kini ganti o premyo tungod sa maayong buhat kundili grasya kini nga gihatag sa Diyos aron sa ingon walay magpasigarbo diha sa atubangan sa Diyos nga siya maluwas tungod sa maayong buhat, kundili ang kaluwasan nagaagad kini sa gugma ug kalooy sa Diyos kanato.

Diha niining maong ebanghelyo gipakita ni Jesus ang usa ka makasasala nga babaye diin dako ang pagtuo ug gugma sa maong babaye ngadto kaniya nga anak sa Diyos. Nagpamatuod lamang kini nga dili nato mahukman ang atong isigkatawo pinaagi lamang sa unsay atong nakita nga sayop ug kasaypanan diha kaniya, kay matod pa nakita nimo ang gamay nga puling diha sa mga mata sa imong isigkatawo, apan wala nimo makita ang troso nga nagababag sa imong mata.

Tanan kita makasasala apan Diyos lamang ang adunay gahum diha sa pagpapas sa atong mga sala pinaagi sa atong paghinulsol ug pagpangayo ug pasaylo sa Diyos, Kay matod pa kun binuhatan lamang sa tawo ang gitan-aw sa Diyos nan tingali niining panahuna wala na kita dinhi sa kalibutan, apan maoy gitan-aw usab sa Diyos ang atong dakong pagtuo ngadto kaniya mao nga milahutay pa kita hangtod niining gutlo-a. Matod pa diha sa ubang sinulat sa balaang kasulatan ang pagtuo maoy atong pagsalig ug paglaom ngadto sa Diyos nga dili makita ug mahikap.

Ang balaang espiritu santo miingon, Ang pagtuo nato ngadto sa Diyos dili masukod pinaagi sa tawhanon nga sukdanan, apan masukod kini sa espirituhanon nga sukdanan kay anaa man kini ipahimutang sa imong kasing-kasing ug panumduman. Sa ato pa mga igsoon Diyos lamang ang makasukod sa atong pagtuo ngadto sa Kaniya busa bisan unsa pa ka makasasala ang atong isigkatawo dili nato siya mahukman nga mahi-adto na sa impyerno kay wala man kanato ang katungod sa paghukom ug labaw sa tanan wala man nato makita ang kadako sa iyang pagtuo ngadto sa Diyos.

Apan matod pa usab diha sa libro o basahon ni Santiago 2: 26 nagaingon “Ang lawas sa tawo patay kun walay espiritu nan ang pagtuo kun walay binuhatan patay usab. Santiago 2: 24 nagaingon nga mas gikahimut-an sa Dios ang mga katawhan nga adunay maayong buhat tungod sa ilang pagtuo sa Diyos kay sa mga tawo nga adunay pagtuo lamang.

Ingon usab niana ang nakita ni Jesus niadtong babaye nga makasasala, nahimuot siya sa gipakita niining maayong buhat ngadto kaniya tungod sa dakong gugma ug pagtuo sa maong babaye ngadto sa Diyos nga si Jesu-Cristo. Busa mga igsoon ang pulong sa Diyos Amahan nagaingon ayaw tan-awa ang inyong isigkatawo maoy siguro-a ang inyong kaluwasan.