Ang Sambingay Mahitungod Sa Dakong Kumbira

LUCAS 14:15~24

15 Sa pagkadungog ini sa usa sa mga dinapit, miingon siya ni Jesus: “Bulahan ang dapiton sa kombira sa Gingharian sa Diyos!”
16 Mitubag si Jesus: “May nag-andam og dakong hikay. Daghan siyag dinapit. 17 Gipaadto niya ang katabang aron pag-ingon: ‘Dali na mo, andam na ang tanan.’ 18 Apan morag nagsabot ang tanan sa pagpamalibad. Miingon ang usa: ‘Mipalit kog uma nga kinahanglang adtoon ug susihon. Pasensya ka na.’ 19 Miingon sab ang lain: ‘Nakapalit kog lima ka parisang baka nga pang-uma ug pasulayon kog daro. Pasensya ka na.’ 20 Miingon ang usa pa: ‘Bag-o kong nakasal busa, dili makaadto?’
21 Sa pagbalik sa katabang, gisulti niya ang tanan sa agalon. Nasuko pag-ayo ang tag-iya ug miingon sa katabang: ‘Lakaw dayon sa mga plasa ug kadalanan sa lungsod, paanhia ang mga kabos, sinalikway, buta ug bakol.’
22 Unya, miingon ang katabang: ‘Natuman ang imong gisugo ug may lugar pa.’ 23 Mitubag ang agalon: ‘Lakaw sa mga dagkong dalan ug tugkaran, ug pugsa pag-anhi ang mga tawo aron mapuno ang akong balay. 24 Kay sa giingon ko: walay dinapit nga makatilaw sa akong hikay.”

PAGPAAMBIT SA MENSAHE:

Ang maong ebanghelyo maoy pagpasabot lamang nga ang Diyos Amahan diha sa pagtawag niya sa iyang mga piniling katawhan nagahatag kini kanunay sa kagawasan, nga sa ato pa ang Diyos nagahatag kanato sa tagsa-tagsa nato ka katungod diha sa pagagamait sa atong tagsa-tagsa ka kaalam. Diin diha niining maong ebangheyo ang Diyos nagpadayag gayud sa pag-imbitar unang una ang mga may kaalam nga iya niining kalibutana apan ang kadaghanan gayud mobalibad diha sa pagsimba sa langit tungod kay daghan man ang ilang mga tawhanon nga bulohaton sama pananglit sa negosyo o uban pa nga para sa ilang tawhanon nga panginahanglan.

Diin mas gikahimut-an sa Diyos ang mga tawong kabos , mga inosente ug mga walay kaalam kay sila man, ang modugay sa pagpangalagad diha sa Diyos, ug ang Diyos espiritu santo makadugay usab sa pagpuyo diha kanila. Tinud-anay nga walay nasayod kun kanus-a mahitabo ang pagbalik sa anak sa Diyos sa samang paagi, walay nasayod kun kanus-a usab ang kataposang paghukom.

Kini nagpasabot lamang nga matag-usa mangandam , kay matod pa matag-usa kanato aduna gayuy tahas diha sa paggahin ug panahun ngadto sa Diyos, Pinaagi sa pag-ampo ug sa pagbuhat sa mga tulomanon nga Diyosnon. Niining panahuna diin ani-a na kita padulong sa ikatulong siglo apan sa gihapon ang Diyos nagahatag sa taas niyang pasensya kay matod pa tanang nga mga kasal-anan adunay kapasaylo-an kun sa kinasing-kasing imo kining pangayoon sa Diyos ug mituo ka nga ikaw mapasaylo pinaagi kang Cristo Jesus kay kun dili ka motuo nga ikaw mapasaylo nan sama ra nga wala ka motuo nga si Jesu Cristo anak sa Diyos.

Ang paghari sa Diyos wala dinhi ug didto busa ayaw pagtuo sa mga istorya-istorya. I-ampo ug ihalad kay ang paghari sa Diyos anaa sa sulod sa inyong kasing-kasing pinaagi diha sa pagtuman sa iyang kasugo-an. Busa isangyaw ang pulong sa Diyos makatulo lamang kun dili mamati biya-i sa walay paglingi kay wala ipamugos sa Diyos ang iyang ginghari-an sa langit