JUAN 6:25~59
25 Dihang nakita nila siya sa tabok sa lanaw, nangutana sila, “Maestro, kanus-a ka miabot?”
26 Si Jesus mitubag: “Sultihan tamo, gipangita ko ninyo dili tungod sa mga milagro nga akong nahimo kondili, tungod sa pan nga inyong nakaon nga nakabusog ninyo. 27 Paghago mo, dili alang sa kalan-on nga madunot kondili, sa molungtad ug makahatag sa kinabuhing dayon. Ang Anak sa Tawo mohatag ini kaninyo kay ang gipatikan sa Diyos nga Amahan.
• 28 Gipangutana siya sa mga Judio, “Unsay among buhaton? Unsay ipabuhat kanamo sa Diyos?” 29 Mitubag si Jesus, “Nga motoo mo sa iyang gipadala.”
30 Busa, miingon sila, “Pakitaa mig mga kahibulongan aron makatoo mi. Unsay imong timailhan? 31 Ang among katigulangan nangaog manna sa kamingawan. Sumala sa kasulatan, Gihatagan silag pan gikan sa langit nga ilang makaon”.
32 Si Jesus miingon, Sultihan tamo, dili si Moises ang mihatag og pan gikan sa langit. Ang Akong Amahan naghatag ninyo sa tinuod nga pan. 33 Ang pan nga gihatag sa Diyos mao Siya nga nanaog gikan sa langit ug naghatag og kinabuhi sa kalibotan.” 34 Busa, miingon sila, “Ginoo, hatagi mi kanunay sa maong pan.”
35 Si Jesus miingon, “Ako ang pan nga naghatag og kinabuhi.” Ang moduol nako dili na gutomon ug uhawon. 36 Apan sumala sa giingon ko na, nakakita na mo, apan midumili mo pagtoo. 37 Gani ang gihatag kanako sa akong Amahan moari nako, ug ang moari nako dili ko isalikway. 38 Kay nanaog ko gikan sa langit dili aron pagbuhat sa akong kabubut-on kondili, sa kabubut-on sa nagpadala nako. 39 Ang kabubut-on sa nagpadala nako mao nga dili ko kawad-an bisag usa sa iyang gihatag nako hinunoa, banhawon ko kini sa kataposang adlaw. 40 Kini ang kabubut-on sa akong Amahan, Ang makakita sa Anak ug motoo niya makabaton sa kinabuhing dayon, banhawon ko siya sa kataposang adlaw.”
41 Ang mga Judio nagbagulbol, kay miingon si Jesus, “Ako ang pan gikan sa langit.” 42 Miingon sila, “Dili ba, si Jesus man siya, ang anak ni Jose? Dili ba, kaila man nato ang iyang amahan ug inahan? Nganong miingon man siya nga gikan siya sa langit?”
43 Mitubag si Jesus ug miingon, “Ayawg bagulbol. 44 Walay makaduol nako gawas kon dad-on siya sa Amahan nga nagpadala nako, ug ban-hawon ko sila sa kataposang adlaw. 45 Nasulat sa mga propeta, Tudloan silang tanan sa Diyos. Busa, ang mamati sa Amahan ug makat-on gikan niya, moduol nako.
46 Walay nakakita sa Amahan gawas sa gikan sa Diyos. Siya ray nakakita sa Diyos. 47 Sultihan tamo, ang motoo nako may kinabuhing dayon.
• 48 Ako ang pan sa kinabuhi. 49 Mikaon sa manna ang inyong katigulangan, apan nangamatay sila. 50 Ania ang pan gikan sa langit. Ang mokaon ini dili mamatay.
51 Ako ang pan sa kinabuhi gikan sa langit. Ang mokaon ini mabuhi sa kahangtoran. Ang pan nga akong ihatag mao ang akong unod aron mabuhi ang kalibotan.
52 Naglalis ang mga Judio ug miingon, “Unsaon man ining tawhana paghatag sa iyang unod aron kan-on? 53 Miingon si Jesus “Sultihan tamo, kon dili mo mokaon sa unod sa Anak sa tawo ug moimnon sa iyang dugo, dili mo makabaton sa kinabuhi. 54 May kinabuhing dayon ang mokaon sa akong unod ug moinom sa akong dugo. Banhawon ko siya sa kataposang adlaw.
55 Ang akong unod tinuod nga kalan-on ug ang dugo tinuod nga ilimnon. 56 Ang mokaon sa akong unod ug moinom sa akong dugo magpuyo dinhi nako ug ako diha niya. 57 Ingon nga ang Amahan nga mao ang kinabuhi, nagpadala nako ug nagkinabuhi ko diha niya, sa samang paagi, ang mokaon nako mabuhi. 58 Kini ang Pan nga gikan sa langit, lahi sa pan nga gikaon sa inyong katigulangan nga nangamatay. Ang mokaon sa maong pan mabuhi sa kahangtoran.” 59 Kini ang gisulti ni Jesus sa Cafarnaum sa pagtudlo niya sa sinagoga.
PAGPAAMBIT A MENSAHE:
Ang maong ebanghelyo maoy pagpasabot lamang sa mga nahaunang nahisulat. Diin mao gayuy kabubut-on sa Amahan nga ang iyang bugtong anak magpakatawo aron sa pagluwas sa atong mga sala diin diha niining maong ebanghelyo gihimong sambingay ni Jesus ang iyang kaugalingon isip pan nga si kinsa kadtong makakaon makaangkon sa kinabuhing dayon ug dili na gayud gutmon. Kini nagpasabot lamang nga kun atong kalawaton ug himoon ang mga pagtulon-an nga gisangyaw ni Jesus pinaagi niining basahon nga balaan nan pinaagi sa grasya ug bendisyon sa Diyos mahatagan kita sa kinabuhi nga walay kataposan.
Diha sa ubang sinulat naga-ingon Juan 1:17, Ang balaod gihatag sa Diyos sa kalibutan pinaagi kang Moises apan ang grasya ug ang kamatuoran mi-abot pinaagi kang Jesu Cristo. Galacia 2 : 16 nagaingon usab “ Nasayod kita nga isipon lamang sa Diyos nga matarong ang tawo pinaagi sa pagtuo kang Jesu Cristo ug dili tungod sa pagtuman sa mga balaod nga gisangyaw ni Moises .
Mga igsoon nasayod kita nga si Jesus Cristo mao ang nagatukod niinin pagtulon-an sa ikaduhang siglo diin gitawag kini ug “universal religion” o gitawag nga Catholic, nan daghang mga pulong sa unang kasulatan nga nausab ug ang ubanwala na kaayo masabti sa mga katawhan ilabi na niining panahuna, kay matod pa ang atong pagsabot sa balaang kasulatan pinaagi man diha sa kaalam nga tawhanon, mga kaalam nga iya niining kalibutan. Diin mao kin ang nakamugna ug mga nagkalain-laing interpretasyon diha niining bag-ong kasulatan.
Apan dayag ug tataw ang mga pulong sa Diyos nga nagaingon nga Siya ang pan nga nagahatag ug kinabuhing dayon. Apan wala kini nagpasabot nga hikalimtan nato ang mga kasugo-an sa unang kasulatan. Mateo 5: 17 nagaingon Si Jesu Cristo “ Ayaw ninyo huna-huna-a nga mianhi ako aron sa pagsalikway sa mga balaod ni Moises ug sa mga pagtulon-an sa mga propeta, Kundili mianhi ako aron sa pagpasabot sa insaktong kahulogan niini. Kay samtang may langit pa ug yuta, ni badlis o gamay nga bahin sa balaod dili gayud kini saylo-an hangtod dili matuman ang tanan. Si kinsa man ang dili mosunod sa gamay nga bahin sa balaod ug nagatudlo sa uban sa pagbuhat sa ingon mamahimong iwit didto sa gingharian sa langit apan kadtong nagasunod sa balaod ug nagatudlo sa uban sa pagsunod niini mamahimong dako didto sa gingharian sa Diyos. Busa sultihan ko kamo dili gayud kamo makasulod sa gingharian sa langit kun ang inyong pagtuman sa kasugo-an sa Diyos sama lamang nianang mga magtutudlo sa balaod ug mga pariseo.
Nagpasabot lamang kini mga igsoon nga diha sa pagtuman nato sa kasugo-an sa Diyos atong gamiton ang mga pagtulon-an nga gisangyaw mismo ni Jesu Cristo diin mao kini ang pagsul-ob sa hiyas sa espiritu santo sa Diyos diin sa kanunay atong ibalaan ang atong kasingkasing ug huna-huna aron sa ingon magsumikad diha sa atong kasingkasing ug sa giya sa espiritu santo sa Diyos ang atong pagsunod sa iyang kabubut-on
No comments:
Post a Comment