Paghigugmaay Kamo

1 JUAN 3: 11~18

11 Kay kini ang mensahe nga iyang gitudlo ninyo gikan sa sinugdan:
paghigugmaay sa usag usa.
12 Ayawg sunda si Cain nga mipatay sa igsoon, kay sakop siya sa Yawa.
Nganong gipatay niya ang igsoon?
Kay nagbuhat siya sa daotan ug ang igsoon nagbuhat sa maayo.
13 Busa, ayawg kahibulong, mga igsoon ang kalibotan nasilag nato
14 nahigugma ta sa igsoon tang lalaki ug babaye.
Sa ingon nahibaw-an nato nga nakalabang na ta sa kamatayon ngadto sa kinabuhi.
Ang wala mahigugma nagpabilin sa kamatayon.
15 Ang nasilag sa igsoon mamumuno,
ug, sumala sa inyong nahibaw-an,
ang kinabuhing dayon dili magpabilin sa mga mamumuno.
16 Giingon nato ini pagkahibawo unsay gugma:
gihatag niya ang iyang kinabuhi alang nato.
Busa, ihatag sab nato ang atong kinabuhi alang sa kaigsoonan.
17 Kon may nagpahimulos sa bahandi sa kalibotan, apan nagtak-op sa kasingkasing inigkakita sa kaigsoonang nanginahanglan,
unsaon man pagpabilin sa gugma sa Diyos diha niya?
18 Mga hinigugma kong anak, maghinigugmaay ta dili lang sa pulong ug ngabil
hinunoa, sa kamatuoran ug sa buhat.

PAGPAAMBIT SA MENSAHE:

Ang maong ebanghelyo maoy pagpasabot lamang diha sa mga kasugo-an sa atong Diyos , ang kasugo-an sa paghigugma kay ang Diyos gugma man. Diin ang tanang kasugo-an sa Diyos nga iyang gipadala kang Moises mamahimo lamang kining duha ka dagkong sugo, ang Paghigugma sa Diyos labaw sa tanan ug ang ikaduha ang paghigugma sa imong isigkatawo sama sa imong paghigugma sa imong kaugalingon, nan kun masupak nimo ang bisan asa sa duruha ka kasugo-an nan nasupak nimo ang tanan nga kasugo-an..

Diha sa ubang sinulat nagaingon si Jesu Cristo, paghigugmaay kamo, aron ang mga katawahan nga makakita kaninyo makahibalo nga ako kamong mga tinun-an. Juan 14: 15 Nagaingon si Jesu Cristo “Tumana ninyo ang akong mga sugo ug mangayo ako sa Amahan ug tagaan kamo niya ug laing manlalaban ang espiritu santo sa kamatuoran nga magauban kaninyo hangtod sa kahangturan. Ang kalibutan dili makadawat kaniya kay dili man sila makakita ni makaila kaniya apan makaila kamo kaniya kay nagapuyo man siya diha kaninyo.

Ang atong paghigugma sa atong isigkatawo maoy pagpasabot lamang nga atong gidawat si Jesu Cristo diha sa tagsa-tagsa nato ka kasing-kasing. Apan kun moingon ka nga nagasunod ka sa pagtulon-an nga kristuhanon apan nagdumot ka sa imong isigkatawo nan wala ka pa magpuyo sa kahayag, anaa ka pa sa kangitngit.

Ingon niana ang pagtulon-an nga gitudlo sa Diyos kanato, nga tungod sa iyang gugma sa mga katawhan sa kalibutan iyang gipakanaog ang iyang bugtong anak ug nagpakatawo aron sa pagluwas sa atong mga sala pinaagi diha sa kamatayon niya sa krus, diin tungod niini nga tahas diha sa iyang kadaugan mida-og usab kita uban kaniya.

Apan atong mapamalandungan diha sa pagsunod nato sa mga pagtulon-an ni Jesu Cristo nga makaambit gayud kita sa mga paglutos, Ang balaang kasulatan nagaingon nga kun gusto nimong himaya-on ug daygon didto sa ginghari-an sa langit nan puy-i ang kinabuhi nga puno sa mga paglutos ug kapit-os diha sa mga pagdaug-daug dinhi sa ibabaw sa yuta, pas-ana ang imong krus ug sunod sa mga pagtulon-an nga gisangyaw ni Jesu-Cristo. Kay bulahan ka nga nakaambit diha sa mga kasakitan ni Jesu-Cristo didto sa krus kay makaambit ka usab sa himaya sa iyang pagkabanhaw didto sa gingharian sa langit.