Mga Saksi Ni Jesus

JUAN 5: 30~47

• 30 Wala koy mahimo sa akong kaugalingon. Kinahanglan nga mamati ko sa Lain nga mohukom. Tarong ang akong hukom, kay wala ko magtinguha sa kaugalingong kabubut-on kondili, sa nagpadala nako. 31 Kon nagsaksi ko sa kaugalingon, walay kapuslanan ang akong isulti. 32 Apan ang Lain nagsaksi nako. Nahibawo ko nga ang iyang pagsaksi tinuod. 33 Si Juan sab misaksi sa kamatuoran sa inyong pagpadala niyag mga sinugo. Apan wala ko mangita sa tawhanong saksi. 34 Gipahinumdoman tamo ini aron maluwas mo.

35 Si Juan sama sa sugang nagdilaab ug gikahimut-an ninyo ang pagpahimulos sa makadyot sa kahayag. 36 Apan may nagsaksi nako nga labaw ni Juan – ang mga buluhaton nga gitugyan kanako sa akong Amahan. Ang mga buhat nako nagmatuod nga pinadala ko sa Amahan. 37 Busa, ang nagsaksi nako mao ang Amahan nga mipadala nako. Wala pa ninyo madunggi ang iyang tingog, ug wala mo makakita sa iyang nawong. 38 Kon dili mo motoo sa iyang sinugo wala ninyo ang iyang pulong.

39 Nangita mo sa kinabuhi diha sa kasulatan, kay nagtoo mo nga dinha inyo ning makaplagan. Nagsaksi nako ang Kasulatan. 40 Apan midumili mo pagduol nako aron mabuhi. 41 Wala ko mangandoy nga daygon sa katawhan. 42 Nasayod ko nga wala ninyo ang gugma sa Diyos. 43 Wala ko ninyo dawata bisag mianhi ko sa ngalan sa akong Amahan; kon may laing moanhi sa kaugalingong ngalan dawaton siya. 44 Unsaon man ninyo pagtoo kon nagdayeg mo sa inyong gitinguha, inay sa Himaya nga gikan sa Diyos?

45 Ayawg hunahunaa nga isumbong tamo sa Amahan. Si Moises mismo nga inyong gilaoman ang magsumbong ninyo. 46 Kon nagtoo mo ni Moises, motoo sab mo nako, kay nagsulat man siya bahin nako. 47 Apan kon wala mo motoo sa iyang gisulat, unsaon man ninyo pagtoo sa akong mga pulong?

PAGPAAMBIT SA MENSAHE:

Ang maong ebanghelyo maoy pagpasabot lamang nga ang mga tinawag ug mga pinili nga katawhan sa Diyos niadtong panahuna maoy buhing saksi diha sa kamatuoran nga gisangyaw ni Jesu Cristo. Apan daghang mga Judio ug mga dili Judio ang wala usab motuo diha sa mga pagtulon-an ni Jesu Cristo, ug kini aron matuman ang laing bahin sa kasulatan nga nagaingon: “Ang anak sa Diyos sa iyang pagpakatawo dinhi sa kalibutan pagalutoson gayud diin maoy usa ka buhing ehemplo nga kun ikaw nagasunod diha sa pagtulon-an ni Jesu Cristo nan makaambit ka gayud sa mga paglutos

Duha na ka libo ka tuig kapin ang milabay sukad nga ang Diyos nagpakatawo diin sinaksihan sa daghang mga tumutuo gikan sa iyang pagkamatay hangtod na sa iyang pagkabanhaw, diha sa Buhat 1: 10 nagaingon kadto duha ka binuhat nga nagbiste ug lubos puti “Mga taga-Galilea nganong nagsige kamo ug hangad didto sa langit, wala ba kamo masayod nga si Jesu Cristo nga gibayaw sa langit mobalik sa samang paagi sa iyang pagbayaw.
Diha niining panahuna karon diin kita misulod na sa ikatulong siglo, ang siglo sa espiritu santo sa Diyos nga nagbalik-balik pinaagi diha sa iyang mga tuburan o propeta aron sa pagpasabot sa ensaktong kahulugan ug kabubut-on sa Diyos Amahan. Diin matod pa katuyo-an sa Diyos nga modagsang kining daghang pagtulon-an dinhi sa kalibutan diin aduna nay 46,000 ka pagtulon-an diin ang tanan nagapasidungog sa Diyos, Diin maoy gusto gayud sa Diyos nga pinaagi sa daghang pagtulon-an mahibaw-an sa tanan nga usa lamang ang Diyos.

Matod pa nga dili lang kay kini ra nga pagtulon-an nga atong gibarugan diin ang Diyos adunay pinili , aduna usab siya pinili diha sa lain-laing pagtulon-an, Apan mahibaw-an ninyo nga kanang pagtulon-an nga imong gibarugan iya sa Diyos kay maka-ambit gayud kamo sa mga paglutos. Kini nagpamatuod lamang nga higpit, tunokon ug batoon ang dalan paingon ngadto sa gingharian sa langit diin dyutay ra ang makaagi niini,

Apan ang dalan paingon sa kalaglagan sa imong kalag halu-ag ug halapad ug anaa lamang kining mga dalana dinhi sa ibabaw sa kalibutan, sama nianang mga patay-sindi ang ilaw, diha sa mga kahilayan ug mga tawhanon nga kailibgon, Diin matod pa bulahan pa kadtong mga katawhan nga mga inosente pa sa kamatuoran nga nahisalaag diha sa maong mga dalan kay aduna pay pasaylo ang Diyos alang kanila apan kita nga nahigmata na niining maong kamatuoran ug sa higayon nga mobalik niadtong maong halapad nga dalan , nan alaot sa tanang alaot kay wala nay pasaylo pa ang Diyos para kanato.