Kinsa Ang Labing Dako

LUCAS 9: 46~48

• 46 Unya, naglalis ang mga tinun-an kon kinsay labing dako nila. 47 Nakamatikod ini si Jesus. Busa, nagkuha siyag bata nga gipabarog sa tupad. 48 Miingon siya: “Ang modawat ining bataa sa akong ngalan, modawat nako. Ang modawat nako, modawat sa nagpadala nako. Kay ang labing gamay diha ninyo madako.”

PAGPAAMBIT SA MENSAHE:

Ang maong ebanghelyo maoy pagpasabot lamang diha sa ubang pulong sa balaang kasulatan nga naga-ingon ang nagpaka-ubos dinhi sa ibabaw sa yuta nan mamahimong dako didto sa gingharian sa langit apan ang nagpasigarbo ug nagpataas sa iyang kaugalingon dinhi sa ibabaw sa yuta mamahimong iwit ug dili ilhon didto sa ginghari-an sa langit, Kay si kinsa kadton nagpataas ipaubos ug kadtong nagpaubos mao ang ipataas.

Diha niining maong ebanghelyo din malalis ang mga tinun-an kun kinsa kanila ang labing taas apan si Jesus mikuha ug usa ka bata isip panag-ingnan nga maoy simbolo nga makasulod sa gingharian sa langit nan sa ato pa mga igsoon ang gingharian sa langit alang niadtong mga katawhan nga inosente diha sa mga pulong o kaalam niining kalibutana.

Diin matod pa sa ubang pulong sa Diyos ang una nilang mga tinawag nga mga katawhan mga hubo sa kaalam nga tawhanon hubo sa bahandi nga tawhanon, sa laktod inosente sa mga butang ug kaalam nga kalibutanon kay ang espiritu santo makadugay man pagpuyo diha kanila.

Nagpasabot lamang mga igsoon nga ang kaalam nga tawhanon halayo gayod sa gingharian sa langit, busa ang balaang kasulatan nagaingon nga mas maayo pa nga magpuyo ka nga daw sama sa langyaw niining kalibutana apan haom didto sa gingharian sa langit diin biyaan nimo ang tawhanon nga mga kailibgon ug mga tawhanon nga mga buhat..

Diha usab sa ubang pulong sa balaang kasulatan nagaingon, 1 Corinto 1:28~30, Gipili sa Diyos ang mga tinamay ug mga sinalikway, o kadtong mga katawhan nga giisip sa uban nga walay pulos, aron sa pagpaila nga walay bili ang giisip sa tawo nga maoy mahinungdanon, aron wala gayuy magpasigarbo diha sa atubangan sa Diyos. Kay walay lain natong ipasigarbo diha sa atubangan sa Diyos kundili kadto lamang mga milagro nga iyang gipasinati sa tagsa-tagsa nato ka kinabuhi.