..........................................ROMA 2:17~29, 3:1~7
17 Pananglitan, nagtawag mo ninyo nga Judio, naggamit sa Balaod isip sukaranan ug nagpasigarbo sa inyong Diyos. 18 Nahibawo mo sa kabubut-on sa Diyos, ug ang Balaod nagtudlo ninyo sa pag-ila unsay mas maayo. 19 Alang ninyo giya mo sa mga buta, kahayag sa kangitngit, 20 magtutudlo sa walay kahibawo, tigmatuto sa mga bata, kay sa Balaod nagbaton mo sa tinuod nga kahibawo. 21 Unya, kamo nga nagtudlo sa uban, nganong dili man ninyo tudloan ang inyong kaugalingon? Kon nagsugo mo sa dili pagpangawat, nganong nangawat man mo? 22 Nag-ingon mo nga dili manapaw, apan inyo ning gibuhat. Nag-ingon mo nga gidumtan ninyo ang mga diosdios, apan nangawat mo sa mga templo! 23 Mapasigarbohon mo sa Balaod, apan wala mo mosunod ini. Gipasipad-an ninyo ang inyong Diyos. 24 Gani, sumala sa kasulatan, ang ubang nasod nagtamay sa ngalan sa Diyos tungod ninyo.
25 Ang pagpatuli mapuslanon alang ninyo kon nagtuman mo sa Balaod, apan kon wala, sama ra nga wala mo matuli. 26 Hinunoa, kon ang mga pisot motuman sa mga sugo sa Balaod, wala ba mo magtoo nga bisan sa ilang kapagano, nahisama sila sa mga tinuli? 27 Ang nagtuman sa Balaod nga wala magpatuli mohukom ninyong nagpatuli ug nagbaton sa Balaod nga wala tumana. 28 Kay ang tiunayng Judio dili ang nagpatuli lang sa gawas, dili sab ni tiunayng pagpatuli. 29 Ang Judio kinahanglang Judio pod sa sulod. Ang pagtuli sa kasingkasing nalambigit sa espiritu ug dili sa sinulat nga balaod. Ang magpuyo ining paagiha daygon dili sa mga tawo kondili, sa Diyos.
3 • 1 Sa ingon, unsay kapuslanan sa pagkaJudio? Ug unsay kapuslanan sa pagpatuli? 2 Daghan, sa bisag unsang puntoha sa panan-aw. Sa unang lugar, ang mga Judio gitugyanan sa Diyos sa iyang pulong. 3 Karon, kon ang uban nila dili matinud-anon, nakapadili ba diay ni sa kamatinud-anon sa Diyos? Siempre, dili. 4 Hinunoa, mamatud-an nga ang Diyos matinud-anon, ug ang tawo bakakon, sumala sa giingon sa kasulatan: mamatud-an nga ang imong pulong tinuod, ug makadaog ka kon buot silang mohukom nimo. 5 Kon ang atong pagkadaotan nagpakita nga ang Diyos tarong, makaingon ba diay ta nga ang Diyos dili tarong kon masuko siya ug mosilot? (Ang uban tingali mosulti sa ingon.) 6 Dili, kay sa laing bahin, unsaon man sa Diyos paghukom sa kalibotan? 7 Apan kon ang akong pamakak makapatataw sa kamatuoran sa Diyos sa ingon, madugangan ang iyang himaya, insakto ba nga tawgon kog makasasala?
PAGPAAMBIT SA MENSAHE:
Ang maong ebanghelyo naghisgot sa mga Judio isip maoy unang mga katawhan nga gitawag sa Ginoo diin maoy pinakabulahan niadtong unang panahun tungod kay si Jesus usa man usab ka Judio. Apan wala magpasabot nga kadtong dili mga Judio wala nay luna sa gingharian sa Dios. Kay matod pa sa balaang kasulatan, kitang tanan mga anak sa Dios diin tungod sa iyang pagmahal kanato nga iyang mga katawhan ug mga anak, iyang gipakanaog ang iyang bugtong anak nga si Jesus Cristo diin maoy bugtong giya kanatong tanan ug maoy nagsangyaw ug nagpasabot sa maong pagtulon-an sa Dios.
Ang Dios maoy nangita kanato nga iyang mga anak dili kay kita maoy nangita sa Dios. Apan matod pa usab diha sa laing mga sinulat. Wala pay tawo dinhi sa ibabaw sa kalibutan nga gitugtan sa Dios sa pagtukib o pagsukod sa iyang kabubut-on, nga sa ato pa mga igsoon kitang tanan naga-agad lamang sa plano ug kabubut-on sa Dios. Apan kay lagi ang tawo aduna may katungod o kagawasan diha sa pagpili sa iyang dalan nga pagadulngan, sa kanunay ang Dios magatuki ug magadisiplina gayud labina niadtong iyang mga tinawag.
Nga sa ato pa mga igsoon ang maong ebanghelyo nagtukib diha sa balaod sa mga Judio ug katawhan sa Dios niadtong unang panahun hangtod niining panahuna. Ang tanan gayud gihatagan ug kagawasan sa Dios diin gilugwayan sa Dios ang paghatag sa pasensya kanato aron usab sa paghan-ay ug pag-ayag niadtong iyang mga tinawag. Kay matod pa magaagi gayud sa pagsulay ang tanan nga iyang pinili ug tinawag diin sama kini sa bulawan nga paagian sa kalayo aron makita ang kapuro niini.
:
:
No comments:
Post a Comment