Mga Kalisdanan Ug Mga Paglutos

LUCAS 21 : 7~19

7 Nangutana sila: “Magtutudlo, kanus-a ni mahitabo ug unsay mga timailhan?”
8 Mitubag si Jesus: “Pagmatngon; ayawg palingla. Daghan ang mogamit sa akong ngalan sa pag-ingon: ‘Ako ang Mesiyas; ako siya,’ ug ‘Nagkaduol na ang panahon.’ Ayaw silag sunda. 9 Kon balitaan na mo sa mga gubat ug kagubot, ayawg kalisang; mahitabo ni pag-una, apan layo pa ang kataposan.”

10 Miingon siya: “Makiggubat ang mga nasod batok sa lain, ang gingharian batok sa gingharian. 11 Maglinog og kusog sa daghang dapit, dunay gutom, may makalilisang nga mga butang ug dagkong katingalahan sa langit. 12 Apan sa dili pa ni mahitabo, dakpon mo ug lutoson; itugyan mo sa mga sinagoga, dad-on sa mga prisohan ug paatubangon sa mga hari ug gobernador tungod sa akong ngalan 13 aron makasaksi mo nako.

14 Itanom ni sa inyong hunahuna aron dili mo mabalaka sa inyong itubag, 15 kay hatagan tamo sa baba ug sa kinaadman nga dili masagubang o matubag sa inyong kaaway. 16 Magluib ninyo ang ginikanan, mga igsoon, paryenti ug higala, ug patyon ang pipila. 17 Kasilagan mo sa tanan tungod sa akong ngalan. 18 Apan dili maunsa ang bisag usa ka buhok sa inyong ulo. 19 Pabilin mong lig-on sa ingon, maluwas mo.


PAGPAAMBIT SA MENSAHE:

Ang maong ebanghelyo naghisgot diha sa pag-abot sa siglo diin sulayan ang pagtulon-an nga atong gibarugan diin mao kini ang pagtulon-an ni Jesus. Diin ipakita ang mga timailhan ang mga pagpanlutos, gubat sa matagnasod ug mga kaguliyang diin daghan ang mga magpatuo nga mao ang sinugo sa Dios apan matod pa dili kita magpatonto kay matod pa ang kamatuoran mopatigbabaw gayud diha sa mga pag-ampo.

Usa ra ang Dios, usa ra ang balaang kasulatan, apan daghan ang mag pagtulon-an nga nagapasibantog sa maong kaluwasan diha sa kataposang paghukom diin lahi-lahi ang mga paagi ug ang uban gihimong negosyo ang pulong sa Dios diin ang uban nangayo ug mga “funding” o mga hinabang gikan sa gawas sa nasod , diin ang kadaghanan sa maong funding atua na mopaingon sa ilang kaugalingong bulsa. Kay matod tulo lamang gayud ka negosyo ang nagmalamboon dinhi sa ibabaw sa yuta una ang politika , ikaduha gubat ug ang ikatulo ang simbahan