Pagpasaylo Sa Nakasala

2 CORINTO 2: 5 ~11

5 Kon dunay nakasakit nako, dili ako ang gipasakitan kondili, sa dyotay lang, kamong tanan. Ug dili ko buot nga masobrahan. 6 Ang silot nga iyang nadawat gikan sa kadaghanan igo na alang niya. 7 Karon kinahanglan nga pasayloon ug hupayon siya ninyo aron dili maluya sa tumang kaguol. 8 Busa, hangyoon tamo paglig-on sa inyong gugma kaniya.

9 Mao ni ang akong tuyo pagsulat ninyo: aron masulayan mo ug masayran nako kon nagtahod ba mo sa tanan. 10 Ang inyong gipasaylo, pasayloon pod nako. Ug ang gipasaylo, kon duna koy angayng pasayloon, gipasaylo tungod ninyo atubangan ni Cristo. 11 Basin unyag magpahimulos nato si Satanas, kay nasayod ta sa iyang mga laraw.

PAGPAAMBIT SA MENSAHE:

Ang maong ebanghelyo nagpasabot sa pagpasaylo sa tanan nga nakasala kanato kay matod pa sa balaang kasulatan. Kung gusto nato nga pasayloon sa Dios sa Atong kasal-anan nan kinahanglan nga makapasaylo usab kita sa mga nakasala kanato, Diha usab sa mga laing sinulat nagpasabot ang balaang kasulatan nga pasayloon nato ang mga tao nga nangayo ug pasaylo diha sa atong atubangan hangtod sa ika 77 ka beses.

Ang pagpakasala tawhanon, ug ang pagpasaylo langitnon, nga sa ato pa mga igsoon diha sa pagsunod nato sa kristuhanon nga pagtulon-an atong ablihan ang atong kasing-kasing ug huna-huna diha sa mga tawo nga nakasala kanato kay matod pa sa balaang kasulatan gisabot sa Dios ang atong pagkatAwhanon diin ang tawo samtang nagpakabuhi pa dinhi sa kalibutan makasasala gayud siya sa huna-huna, sa pulong ug sa buhat.

Diin diha sa pagkanaog ni Jesus dinhi sa yuta usa sa iyang tuyo mao man ang pagpasabot sa napulo ka kasugoan sa Amahan diin mao man kadtong mag sugo nga gisangyaw ni Moises sa unang kasabutan. Iyang gipasabot nga ang napulo ka sugo nagpasabot lamang kini ug duruha ka kasugo-an, una ang paghigugma sa Dios labaw sa tanan ug dili na magbaton ug Dios labaw pa kaniya ug ang ikaduha mao ang paghigugma sa atong isigkatawo sama sa paghigugma nato sa atong kaugalingon diin kun masupak nato bisan asa sa duruha ka kasugo-an nan nasupak nato ang tanan nga kasugo-an. Apan kun ato gayud nga ipalawom ang maong kasugoan nagkahulugan kini ug paghigugma o gugma. Nga sa ato pa angayan gayud nga maghigugmaay ug magpasaylo-ay ang katawhan sa Dios kay kita iya man sa kanunay nga gipasaylo.