Ang Pagkabanhaw

1 CORINTO 15: 35 ~ 58

• 35 Ang pipila ninyo mangutana: Unsaon man pagbanhawg patay? Sa unsa mang lawasa nga sila mabanhaw? 36 Pagkabuang gyod nyo! Ang gipugas dili motubo gawas kon mamatay ni. 37 Ug ang gipugas dili ang punoan sa umaabot nga tanom kondili, ang liso sa trigo o laing liso. 38 Ang Diyos mohatag sa angayng lawas, sama nga naghatag siya sa matag liso sa kaugalingong lawas. 39 Tan-awa: dili pareho ang tanang karne. Lain ang karne sa tawo, lain ang karne sa mga langgam ug isda. 40 May mga langitnon pod ug yutan-ong lawas nga wala magsiga sama sa langitnon. 41 Ang kasiga sa adlaw lahi sa kasiga sa bulan ug sa mga bitoon. Ug ang mga bitoon lahig kasiga sa usag usa.

42 Mao sab ang pagkabanhaw sa minatay. Ang lawas nga gitisok madugta, banhawon ni ug dili na mamatay. 43 Gitisok ni nga talamayon ug banhawon sa himaya. Gitisok ni sa kahuyang, banhawon sa gahom. 44 Inigtisok, yutan-on ning lawas, banhawon nga espirituhanon. May espirituhanong lawas sama nga may yutan-on. 45 Ang Kasulatan nag-ingon: Si Adan, ang unang tawo gibuhi. Apan ang kataposang Adan nahimong espiritu nga naghatag og kinabuhi. 46 Ang espiritu dili mag-una pagpakita kondili, ang kinabuhing yutan-on unya, mosunod ang espiritu. 47 Ang unang tawo gikan sa kalibotan ug kalibotanon ni, samtang ang ikaduha mao ang Ginoo nga gikan sa langit. 48 Sama sa yutan-on, mao sab ang mga tawong yutan-on. Ug sama ni Cristo, mao sab ang langitnon. 49 Sama nga nagdala ta sa larawan sa yutan-on, magdala sab ta sa larawan sa langitnon.

50 Mga igsoon, nag-ingon ko: Ang karne ug dugo dili makapanunod sa Gingharian sa Diyos. Ug ang madugta dili makapanunod sa dili madugta. 51 Tan-awa, buot kong mopadayag sa usa ka misteryo. Bisag dili ang tanan mamatay, ang tanan mausab, 52 sa usa ka pamilok, sa kataposang lanog sa trompeta. Ang trompeta molanog ug ang mga minatay mabanhaw nga dili na madugta, ug mausab ta. 53 Kinahanglan nga ang mamatay ug madugta natong pagkatawo mosul-ob sa kinabuhi nga dili mamatay ni madugta.

54 Inigsul-ob sa madugta tang pagkatawo sa kinabuhing dili madugta, inigsul-ob sa atong mamatay nga pagkatawo sa pagkawalay kamatayon, matuman ang giingon sa Kasulatan: Ang kamatayon gilamoy sa kadaogan. 55 Kamatayon, hain ang imong kadaogan? Kamatayon, hain ang imong suyod? 56 Ang sala suyod sa kamatayon. Ug ang gahom sa sala mao ang balaod. 57 Apan pasalamati ang Diyos nga naghatag nato sa kadaogan pinaagi ni Cristo Jesus, atong Ginoo. 58 Busa, karon, mga igsoon, magmakanunayon mo ug ayawg patay-og. Magmabungahon mo kanunay sa mga buluhaton sa Ginoo kay nasayod mo nga ang inyong kahago dili makawang diha sa Ginoo.

PAGPAAMBIT SA MENSAHE:

Ang maong ebanghelyo naghisgot diha sa pagkabanhaw sa lawas sa tawo diin sama kini sa liso sa usa ka tanom o prutas nga kinahanglan una ang maong liso sa prutas mamatay sa dili pa motubo ang similya niini, ingon niana ang pagkabanhaw nga gihisgotan nianing atong ebanghelyo karon diin ang unang pagkabanhaw mao man ang pagkabanhaw sa lawas ni Jesu Cristo diha sa tawhanon niyang kamatayon diin mikayab ang iyang lawas paingon sa langit inubanan sa mga anghel, ug mao kadtong ang iyang kadaugan diha sa pagkabanhaw.

Diha sab sa mao nga pagkabanhaw ni Jesus nahiuban kita pagkabanhaw kaniya ug namatay ang atong mga kasal-anan kay kini iya na mang gihalad ngadto sa Amahan diha sa iyang lawas ug dugo. Apan kinahanglan lamang ang pagpuasa sa mag kaal-anan hangtod nga moblik na usab ang anak sa tawo

Apan ang labing mabulokon nga pagkabanhaw mao ang pag-abot sa anak sa tawo diin kitang tanan mag-atubang sa dakong paghukom ug sa walay pagpihig o pagpabor kitang tanan makadawat sa sentensiya nga tukma sa atong binuhatan, diin bulahan ang mga katawhan nga buhi pa ang ilang tawhanon nga lawas diha sa maong paghukom kay mabanhaw kini ug mahiuban didto sa ginharian sa langit.

Bulahan diay ang mga katawhan nga sa kanunay naga-atiman sa ilang kalag diha sa mga pag-ampo ug mga paghalad kay sa kanunay ang Dios nagapangliya ug nagabendisyon kanila. Bulahan usab diay nga magpuyo kita nga langyaw niining kalibutana apan ha-om didto sa laing kalibutan, diin ibayaw ka didto sa ganghaan sa gingharian sa Dios kun maimo ang himaya nga walay kataposan.