Kataposang Pahimangno

ROMA 16:17~23

• 17 Mga igsoon, nangamuyo ko nga magmatngon mo sa mga hinungdan sa pagbahinbahin ug sa kasamok. Nagtudlo silag mga pagtulon-an nga lahi sa gitudlo kaninyo. Likayi sila. 18 Wala sila mag-alagad ni Cristo Jesus, atong Ginoo. Ang ilang gialagaran mao ang kaugalingong interes. Nanglingla sila sa mga yanog kasingkasing pinaagi sa lumo ug makalingaw nilang sinultihan. 19 Nasayod ang tanan nga masinugtanon kaayo mo.

Tungod ana, nalipay ko. Apan buot kong mopasidaan ninyo pagbuhat sa maayo ug paglikay sa daotan. 20 Ang Diyos sa kalinaw sa dili madugay modugmok ni Satanas nga ibutang ubos sa inyong tiil. Hinaot nga si Cristo Jesus, atong Ginoo, manalangin ninyo. 21 Si Timoteo, nga uban nako, nangumosta ninyo. Ingon man si Lucio, Jason, ug si Sosipatro, akong mga paryenti. 22 Ako, si Tercio, ang nagsulat ini, nangumusta ninyo diha sa Ginoo. 23 Mga pangomusta gikan ni Gaio, nga naghatag nakog kapuy-an. Nagtigom ang simbahan sa ilang balay.

PAGPAAMBIT SA MENSAHE:

Ang maong ebanghelyo naghisgot sa mga pagtulon-an nga gibilin ni Jesu Cristo, diin sa kanunay kini atong matutu-on diha sa mga pag-ampo ug pangaliya kay aron dili kita dag-on sa mga pagsulay. Diin susama nining maong ebanghelyo nga sa kanunay nagpahinumdom ang mga apostoles ni Jesus diha sa ilang pagtulon-an nga gibarugan.

Kay matod pa kun asa ang giya sa espiritu santo o ang mga katawhan nga gipanalanginan sa Ginoo nan atua usab ang dautan nagasamok ug gustong mobabag kanila. Diin diha sa ilang pagsangyaw ug pagsunod sa mga pagtulon-an sa Dios kanunay silang galibugon diha sa mga dautan.

Nga sa ato pa mga igsoon matod pa sa balaan kasulatan Mateo 16, nagaingon kun gusto nimong mahimong tinun-an sa Dios nga Jesu Cristo nan kalimti ang imong kaugalingon, ug pas-ana ang imong krus sa kinabuhi ug sunod sa mag pagtulon-an ni Jesus. Diin bulahan kang nga mawad-an ug kinabuhi diha sa pagsunod sa iyang kabubut-on kay mahatagan ka pa ug dugang kinabuhi apan kun mahadlok ka sa pagsunod sa kabubut-on sa Dios diin nawili ka sa imong kinabuhi nan basin kawad-an ka hinuon niini.

Kay matod pa sa balaang kasulatan kun gusto nimo nga himayaon ug daygon didto sa ginghari-an sa Dios nan puy-i ang kinabuhi nga puno sa mga pag-antos ug mga paglutos dinhi sa yuta, kay bulahan ka nga nakaambit sa mga kasakitan ni Jesu Cristo didto sa Krus kay makaambit ka usab sa iyang himaya sa pagkabanhaw didto sa langit.