Gipakaon Ni Jesus Ang 4,000 Ka Tawo

MARCOS 8: 1~9

8 • 1 Human adtong hitaboa, diha na sab si Jesus sa taliwala sa dakong pundok sa katawhan nga way makaon. Busa, gitawag niya ang mga tinun-an ug giingnan: 2 “Naluoy ko pag-ayo sa katawhan. Tulo na ka adlaw nga nakig-uban sila nako ug wala silay kaon. 3 Kon papaulion ko silang gutom, tingalig kuyapan sila sa dalan. Ang uban ra ba layog gigikanan.”

4 Mitubag ang iyang mga tinun-an: “Asa man ta makakuhag pan ining hilit nga dapit nga paigo sa tanan?” 5 Nangutana siya: “Pila kabuok ang pan?” Mitubag sila: “Pito.”
6 Gipalingkod niya sa yuta ang katawhan, gikuha ang pito ka pan ug nagpasalamat. Iya ning gipikaspikas ug gihatag sa mga tinun-an aron iapud-apod sa katawhan. Ug gibuhat ni. 7 May pipila sila ka gagmayng isda nga iyang gipanalanginan; ug gipabahinbahin.

8 Nangaon ug nangabusog ang katawhan. Gitigom nila ang nahibilin ug nakahipos silag pito ka bukag nga puno sa gagmayng piraso. 9 Mikabat sa 4,000 ka tawo ang nakakaon. Dayon, gipapauli sila ni Jesus. 10 Misakay siya sa sakayan uban sa iyang mga tinun-an. Ug nangadto sila sa yuta sa Dalmanuta.


PAGPAAMBIT SA MENSAHE:

Ang maong ebanghelyo naghisgot diha sa mga pagtulon-an nga gibarogan ni Jesus diin ang mga katawhan nga sa kanunay nagasunod ug nagatuki sa iyang mga pagtulon-an kanunay gayud nga makakita sa milagro.

Ang pagpakaon sa pan ug isda sa maong mga domoduong ug sumosunod sa Dios maoy pagpakita lamang sa mga milagro nga iya gayud sa Dios ug diin kini nahitabo lamang diha niadtong panahuna diin wala gayuy makaon ang katawhan ug aron usab makita ang panag-ingnan nga literal nga pagsabot sa balaang kasulatan nga nagaingon ang Dios dili gayud mahitabo nga motalikod kanato bisan kanus-a kun siya ang nagahari diha sa atong kasingkasing. Busa dili gayud angay nga magatigom kita ug daghang bahandi diin mahimo na man unya nga duha ang imongDios ang bahandi ug ang matuod nga Dios.

Kay matod p diha sa ubang sinulat diha sa balaang kasulatan, unsa bay arang sa tawo nga sa atong paghiabot duinhi sa kalibutan diha sa atong pagkatawo gikan sa tago-angkan sa atong inahan, hubo man kitang daan ug sa sa atong pagtalikod dinhi niining kalibutan biyaan ta man ang tanan ug diin walay materyal nga bahandi nga atong mabit-bit paingon ngadto sa laing kalibutan.

Nagapasabot lamang igsoon nga diha sa pagkinabuhi dinhi niining kalibutan kun wala kitay bahandi nga espirituhanon kay tagaan ta ug pagtagad ang mga bahandi nga iya sa yuta nan ang imong kalag dinhi ra sab kutob sa yuta, apan hupong ug sangkap ka sa bahandi nga langitnon diin anaa kanunay ang mga pag-ampo ug pangaliya sa Dios nan imo kining mabitbit ngadto sa laing kalibutan bulahan mao unya kini ang imong giya pagpangita sa dalan ngadto sa ganghaan sa gingharian sa Dios.