Nagwali Si Saulo Didto Sa Damasco

BUHAT 9: 20~25

20 Wala madugay misugod siyag wali sa Sinagoga nga si Jesus Anak sa Diyos. 21 Ang nakadungog natingala ug nag-ingon, “Dili ba, siya man ang nagpalagpot sa nagsangpit sa iyang Ngalan didto sa Jerusalem? Dili ba, mianhi man siya aron pagdakop ug pagdala nilang ginapos sa mga pangulong pari?”

22 Apan si Saulo nag-anam og kalig-on. Gilibog niya ang tanang Judio nga nagpuyo sa Damasco sa pagmatuod nga si Jesus ang Mesiyas. 23 Human sa taastaas nga panahon, ang mga Judio nagkasabot pagpatay niya. 24 Apan si Saulo nasayod sa ilang laraw. Adlawg gabii giatngan siya sa ganghaan sa syudad aron patyon. 25 Usa ana ka gabii, gikuha siya sa iyang mga tinun-an, gisulod og bukag ug gitunton sa paril.

PAGPAAMBIT SA MENSAHE:

Ang maong ebanghelyo naghisgot diha sa mga paglutos sa mga apostoles diin diha gipasabot sa maong ebanghelyo ang kahimu-an ug mga pagsangyaw ni Saulo didto sa sinagoga diin naglibog ang mga nangagsimba didto kay si Saulo milaban naman kang Jesus diin sa kanhiay usa man siya sa nalutos niini.

Atong mahinumdoman nga si Saulo diha sa iyang pagkaberdugo nagalutos sa mga sumosunod ni Jesus apan gitawag siya sa Dios aron sa pagsangyaw sa kamatuoran nga gibarogan ni Jesus. Nagapasabot laamng kini mga igsoon nga ang Dios amahan mao lamang ang makapatig-a o makapahumok sa kasingkasing sa tawo nan kung kinsa ka man nga nagmartig-a diha sa pagsunod niining matuod nga kamatuoran, moabot gayud ang adlaw nga mopasilong ka kaniya kun kabubut-on gayud sa Dios.

Si saulo usa ka maayo ug buotan nga sumosunod sa mga Judio, diin iya lamang gisunod ang mga lagda diha sa pagtulon-an sa mga Judio, diin sa wala pa siya matawag kanunay gayud siyang nanghasi sa mga kristyanos, kay para kaniya sila nagbugalbugal lamng sa Dios Amahan. Apan niiing panahuna diin gipakita niya ang kamatuoran siya na usab ang gilutos sa iyang mga kauban kanhi diin buot pa siyang patyon.

Nagpasabot lamang mga igsoon nga kun nagasunod ka sa Dios nan haduol ka kanunay sa mga pagsulay diin sa kanunay anaa ang mga paglutos diin nagpasabot lamang kini diha sa katumanan sa balaang kasulatan nag nagaingon, kun gusto nimong daygon ug himayaon didto sa langit nan puy-i ang kinabuhi nga puno sa pagpanlutos ug pag-aantos dinhi sa yuta, alsaha ang imong krus sa kinabuhi ug sunod sa mga pagtulon-an ni Jesus.