Ang Kinaiya Ug Ang Buhat Ni Cristo

COLOSAS 1: 15 ~ 23

• 15 Larawan siya sa Diyos nga dili makita, ang panganay sa tanang binuhat. 16 Diha niya gibuhat ang tanang butang nga makita ug dili makita ang mga trono, mga hari, mga gahom ang tanan gihimo pinaagi niya ug alang niya. 17 Siya na ang Siya, sa wala pa ang tanan, ug diha niya ang tanang butang18 Ulo siya sa lawas, ang Simbahan ang sinugdan, ang unang gibanhaw sa mga patay aron mag-una sa tanan. 19 Kay nahimuot ang Diyos nga ang kahingpitan magpabilin niya. 20 Gimbut-an sa Diyos nga pinaagi ni Cristo mapahiuli ang tanan diha ug pinaagi niya, sa iyang pagpaagas og dugo sa Krus, gimugna sa Diyos ang kalinaw dinhi sa yuta ingon man sa Langit.


• 21 Kamo mismo layo ug masinupakon sa Diyos kaniadto tungod sa daotang binuhatan. 22 Apan karon gipahiuli namo. Ang Diyos nagpahiuli ninyo pinaagi sa pagtugyan sa kamatayon sa lawas ni Cristo, aron makaatubang mo niya nga walay sala, balaan ug putli. 23 Barog nga lig-on sa sukaranan sa pagtoo ug pabilin sa gilaoman. Ibutang sa hunahuna ang Ebanghelyo nga nadungog. Kay gitudlo ni sa tanang binuhat ubos sa langit. Ako, si Pablo, ang nag-alagad niya.

PAGPAAMBIT SA MENSAHE:

Ang maong ebanghelyo nagpasabot diha sa buhat nga Cristuhanon, diha sa maong ebanghelyo gipadayag nga Si Jesus ang buhing panagway sa dili makita nga Dios, diin nagpasabot kini sa dili malalis nga kamatuoran nga ang Dios Amahan ug ang anak usa ra diin namulong Si Jesus pinaaagi sa kabubut-on usab sa Amahan. Dinhi na si Jesus sa wala pa ang kalibutan, ug dinhi na usab siya diha sa panahun ni Moises diin Si Jesus maoy nahimong giya diha sa ilang mga kinahanglanon ni Moises , nga espirituhanon ug materyal.

Dili makatukib niining maong kamatuoran diin nagpasabot lamang kini nga walay makatugkad sa kabubut-on sa Dios ni walay gitugotan sa Dios sa pagtugkad sa iyang gahum. Daghan ang nagatuki diha sa balaang kasulatan , diin ilang pagsabot niining maong mga ebanghelyo sa balaang kasulatan sumala sa ilang tawhanon nga pagsabot.

Daghan usab ang nangutana kun kanus-a man kuno mobalik ang anak sa Dios aron sa paghukom kanatong tanan, apan ang balaang kasulatan, nagaingon, sumala sa 2 Pedro 3: 17, nga ang usa ka adalw sama sa 1000 ka tuig sa Ginoo, ug ang 1000 ka katuig sama usab kini sa usa ka adlaw, diin nagpasabot lamang usab nga bisan ang kadugayon ug kadali sa matag taknaan, nagaagad sa kabubut-on sa Dios. Apan kun makita sa Dios nga andam na ang tanan diin napadayag na ang mga tinagong pulong nan dili na siya maglangan ug ipakanaog gayud niya ang iyang hukom.

Matod pa usab 90% na sa maong mga ebanghelyo sa balaang Kasulatan ang hinay-hinay na nga natuman diin, anaa na ang mga katalagman matag karon ug unya, ug matod pa sa uban diin ilang gihubad nga mao na kini ang mga katumanan diha sa panan-awon ni Juan sa pinadayag.

Ug mao na kini ang katumanan diha sa ubang mag ebanghelyo ni Juan diin matod pa ni Jesus ngadto sa babaye nga taga Samaria, nga taliabot na ang panahun, ug karon miabot na nga ang matuod nga magsisimba, Magsimba sa amahan sa Dios Espiritu ug Sa kamatuoran kay kay Sila ang mga magsisimba nga maoy gusto sa Amahan nga magsimba ngadto kaniya, sumala kini diha sa ebanghelyo Juan 4: 21~23.

Juan 14: 15 nagaingon usab si Jesus, Tumana ninyo ang akong mga sugo, ug mangayo ako sa Amahan ug tagaan kamo niya ug laing manlalaban, ang espiritu sa kamatuoran, nga magalaban kaninyo hangtod sa kahangturan, Ang kalibutan dili makadawat kaniya, kay dili man siya makita ug mahikap, apan makaila kamo kaniya kay nakig-uban man siya kaninyo.

:
1 Corinto 3: 16, nagaingon usab nga ang lawas sa tawo maoy templo sa Dios espiritu santo, ug ang molaglag sa templo sa Dios nga mao kita nan pagalaglagon usab sa Dios. Sa ato pa angay lamang nga atong sundon ug ibalaan ang bag-ong sugo ni Cristo , paghigugmaay kamo, kay nagpasabot kana nga nahigugma ka sa Dios apan kun nahigugma ka sa Dios apan nagdumot ka sa imong mga igsoon ug silingan nan namakak ka , kay unsaon man nimo paghigugma sa Dios diin wala nimo kini makita ug mahikap diin nasilag ug nagdumot ka sa imong isigkatawo nga sa tanang adlaw imo mang nakita, nan nagpasabot lamang usab kini nga wala ka mahigugma sa Dios kay ang Dios nagpuyo man diha sa mga tawo nga imong gikasilagan.

: