Gisalikway Si Jesus Didto Sa Nazareth

MATEO 13: 53~57

• 53 Humag asoy ni Jesus ining mga sambingaya, mibiya siya sa maong dapit; 54 miadto sa kaugalingong lung-sod ug nanudlo sa mga tawo sa ilang sinagoga. Natingala sila ug miingon: “Diin niya kuhaa ang kaalam ug ang talagsaong gahom? 55 Dili ba, anak man siya sa panday?

Ug si Maria ang iyang inahan? Dili ba, si Jaime, Jose, Simon ug Judas ang iyang mga igso-on? 56 Dili ba, ang mga igsoon niyang babaye nagpuyo man dinhi? Nganong nakaangkon man siya ining tanan?” 57 Busa, gikasilagan siya. Si Jesus miingon nila: “Ang propeta tinahod bisag asa gawas sa kaugalingong lungsod ug panimalay.

PAGPAAMBIT SA MENSAHE:

Ang aong ebanghelyo naghisgot diha niining pagtulun-an nga kristuhanon diin nag-agad usab kun giunsa nato pagdawat ang Dios sa atong kinabuhi. Diha niining ebanghelyo nagaingon nga natingala ang mga katawhan sa Nazareth diin nagsangyaw ug nanudlo si Jesus diha sa tumang kaalam luyo sa kasayuran sa tanan nga wala man siya maka-eskuela ni makabasa niining mga pagtulun-an nga iyang gisangyaw. Nakaila kaayo ang mga katawhan nga iyang gisangyawan kaniya kay lagi didto man siya magdako sa Jerusalem.

Ginaingon diha sa maong ebanghelyo nga wala motuo ang iyang mga silingan ug mga kauban didtong dapita kay lagi, nailhan man nila kun asa siya gikan ug kinsa ang iyang mga ginikanan. Matod pa diha sa ubang sinulat hingpit lamang usab ang imong kaluwasan sa imong sala kun hingpit kang nagatoo sa Dios, sama nga mokunsad ang mga milagro diha sa imong kinabuhi, diha sa kaayuhan sa imong balatian kun hingpit mong gidawat si Jesus nga anak sa Dios ug matuod nga manluluwas sa atong mga ksal-anan.

Diha niining maong ebanghelyo nagpasabot lamang nga walay milagro nga makita ang maong mga katawhan nga mga taga Nazareh kay wala man sila motuo sa pagkaDios o pagkamanununod sa trono sa langit ni Jesu-Cristo, Kay para kanila wala may extra-ordinaryo diha sa ilang pagkaila ni Jesu-Cristo, sama lamang kini kanila tawo usab. Ang maong ebanghelyo nagpamatuod lamang diha sa atong kaluwasan sa atong kalag kinahanglan nga motoo kita sa Dios sa hugot gayud.

Ginaingon diha sa buhing pulong sa Dios nga ang atong pagtuo sa Dios wala kini sukdanan alang sa Dios kay makita man nila kini diha sa atong kasing-kasing ug panumduman Sa ato pa ikaw lamang ug ang Dios ang nasayod diha sa kadako sa imong pagtuo kanila. Susama diha niining ebnghelyo karon diin gisalikway man si Jesus diha sa iyang mga tagilungsod nan sa ato pa nganong pugson man tuod sa Dios ang mga katawhan nga wala moila sa iyang pagka-Dios.

Bisan diha sa atong mga misyon diin nagasugo ang Dios kanato sa pagsangyaw, nagpasabot gayud siya nga isangyaw ang iyang pulong sa makaduha o makatulo diha sa matagtawo nga imong ikahibalag nan kun dili maminaw biya-i sa walay paglingi kay matod pa saDios wala niya ipamugos ang iyang gingharian sa langit ug mas labaw nga wala niya ipamugos ang kaluwasan sa kinabuhing dayon didto sa iyang gingharian.

Kamatuoran lamang usab ang gipamulong sa Dios diha sa balaang kasulatan nga nagaingon, Nga siya ang nangita kanato aron luwason, ug dili kay kita ang miduol sa Dios . Ug ang Dios maoabot diha sa atong kinabuhi sa paagi nga dili nato damhon. Apan matod pa ang iyang tinawag ug pinili nga katawhan aduna na siyay giandam para kanila. Nagpasabot lamang mga igsoon nga ang inyong pagduol ug pagtuman sa kabubut-on sa Dios maoy pagtuman lamang usab sa nakalatid na sa Amahan diha sa mga pinili ug tinawag niyang mga katawhan, Kay matod pa dili man tanan nga katawhan dinhi sa kalibutan iyang tinawag ug pinili, ug ang uban nga wala niya tawga ug pili-a nan dinhi lang usab sila kutob sa kalibutan.

Apan kadtong iyang gitawag ug gipili, nan adunay silay kahigayunan nga mahiadto sa kinabuhing dayun, apan ang tanan nga pinili sa Dios pagapili-an pa usab niya. Nagaingon ang pulong sa Dios nga dili kay magalingkod lamang ang iyang mga pinili ug mga tinawag nga katawhan ug magpa-abot sa anak sa Dios sa iyang pagbalik kundili pagasulayan gayud sila kay matod pa kun magkinabuhi ka nga iya ni Kristo niining kalibutana nan makaambit ka gayud sa mga pagsulay.

Nan kinahanglan nga lig-onon nato ang atong pagtuo ngadto sa Dios Amahan, pinaagi sa atong mga binuhatan, kay matod pa diha sa sulat ni Santaiago:2:17, Ang pagtuo nga walay buhat, nan sama kini sa lawas sa tawo nga wala nay espiritu, patay kini, ug ang pagtuo nga walay buhat nan patay usab kini. Atong ipakita ang atong pagtoo sa Dios makagagahum diha sa pagsunod sa iyang kabubut-on diha sa mga pagsangyaw, sa mga pag-ampo aron sa kanunay lig-on ang atong espirito ug tambok ang atong kalag. Diin sa kanunay makadawat kita diha sa panalangin sa Amahang Dios.