Mga Saksi Ni Jesus

JUAN 5:30~47

• 30 Wala koy mahimo sa akong kaugalingon. Kinahanglan nga mamati ko sa Lain nga mohukom. Tarong ang akong hukom, kay wala ko magtinguha sa kaugalingong kabubut-on kondili, sa nagpadala nako. 31 Kon nagsaksi ko sa kaugalingon, walay kapuslanan ang akong isulti. 32 Apan ang Lain nagsaksi nako. Nahibawo ko nga ang iyang pagsaksi tinuod. 33 Si Juan sab misaksi sa kamatuoran sa inyong pagpadala niyag mga sinugo. Apan wala ko mangita sa tawhanong saksi. 34 Gipahinumdoman tamo ini aron maluwas mo.


35 Si Juan sama sa sugang nagdilaab ug gikahimut-an ninyo ang pagpahimulos sa makadyot sa kahayag. 36 Apan may nagsaksi nako nga labaw ni Juan – ang mga buluhaton nga gitugyan kanako sa akong Amahan. Ang mga buhat nako nagmatuod nga pinadala ko sa Amahan. 37 Busa, ang nagsaksi nako mao ang Amahan nga mipadala nako. Wala pa ninyo madunggi ang iyang tingog, ug wala mo makakita sa iyang nawong. 38 Kon dili mo motoo sa iyang sinugo wala ninyo ang iyang pulong.


39 Nangita mo sa kinabuhi diha sa kasulatan, kay nagtoo mo nga dinha inyo ning makaplagan. Nagsaksi nako ang Kasulatan. 40 Apan midumili mo pagduol nako aron mabuhi. 41 Wala ko mangandoy nga daygon sa katawhan. 42 Nasayod ko nga wala ninyo ang gugma sa Diyos. 43 Wala ko ninyo dawata bisag mianhi ko sa ngalan sa akong Amahan; kon may laing moanhi sa kaugalingong ngalan dawaton siya. 44 Unsaon man ninyo pagtoo kon nagdayeg mo sa inyong gitinguha, inay sa Himaya nga gikan sa Diyos?


45 Ayawg hunahunaa nga isumbong tamo sa Amahan. Si Moises mismo nga inyong gilaoman ang magsumbong ninyo. 46 Kon nagtoo mo ni Moises, motoo sab mo nako, kay nagsulat man siya bahin nako. 47 Apan kon wala mo motoo sa iyang gisulat, unsaon man ninyo pagtoo sa akong mga pulong?

PAGPAAMBIT SA MENSAHE:

Ang maong ebanghelyo naghisgot diha sa mga pagsangyaw ni Jesu Cristo diin siya matod pa diha sa balaang kasulatan gipadala dinhi sa kalIbutan dili pinaagi sa iyang kabubut-on kundili pinaagi sa kabubut-on sa Amahan. Daghang mga sinulat ug mga panagna sa mga propeta nga nagasangyaw niini diin sa dugay nga panahun gipahaiblo nang dan ang pahiabot sa mesiyas diin maoy manluluwas sa mga sala sa mga katawhan.

Apan ang wala nila palandonga nga mahitabo nga ang Dios mahiabot sa kalibutan sa paagi nga kadto ra usab mga tawo nga tinawag ug pinili ang makabantay, kadtong mga tawo nga anaa kanunay anaa kanila nga espiritu santo tungod sa iyang mga hiyas nga langitnon ug mapaubsanon. Kadtong mga katawhan nga didto pa sa tago-angkan sa ilang inahan apan gitawag ug gipili nang daan sa Dios. Sila ang gipili sa Dios aron maoy mosaksi sa iyang pagka Dios sumalsa sa maong ebanghelyo, ug usa na niini ang 12 ka apostoles diin sila gipili gayud sa Dios nga maoy mosangyaw sa iyang pagtulun-an sa upat ka suok sa kalibutan.

Maoy nakalatid daan diha sa mga buhing pulong sa Dios nga nagaingon, 1 Corinto 1:28: Gipili sa Dios ang tinamay ug mag sinalikway, kadtong mga katawhan nga nagpakaubos diha sa ilang kaugalingon sa atubangan sa Dios aron sa ingon iyang mapakita nga ang tawhanon nga kaalam ug kinaadman dinhi niining kalibutan walay gamit didto sa iyang gingharian busa dili kini angay ipasigarbo. Ug kon aduna man ugaling ipasigarbo nan kadto lamang mga milagro mga iyang gipasinati diha sa atong tagsa-tagsa ka kinabuhi.

Mao gayuy gusto sa Dios nga ang iyang mga saksi niadtong panahuna kadto lamang andam mopapuyo sa Dios diha sa ilang kasingkasing. Ang balaang kasulatan naga-ingon “Kun gusto nimo nga mahimong tinun-an ni Kristo nan kalimti ang imong kinabuhi, Pas-ana ang imong krus ug sunod sa pagtulun-an nga gisangyaw ni Kristo. Kay bulahan ka nga nakaambit diha mga kasakitan ni Kristo diha nianang krus sa kalbaryo, kay, makaambit ka usab sa himaya sa pagkabanhaw didto sa iyang gingharian sa langit

Niadtong panahuna, daghan ang misaksi sa pagka Dios ni Jesus- Cristo diin gipangulohan kini sa 12 ka apostoles diin tanan sa mga mabuot niyang mga apostoles halos namatay gayod diha sa mga paglutos sa mga Judio kanila, kay mao man kini ang nakalatid diha sa balaang kasulatan, : Kung mosunod ka ug mamahimong tinun-an ni Jesu Cristo nan magpakabuhi ka sama sa matuod gayud nga iya sa Dios, ug makaambit ka gayud sa mga pagpanlutos.