Ang Kinaiya Ug Ang Buhat Ni Jesu-Cristo

COLOSAS 1: 15~23

• 15 Larawan siya sa Diyos
nga dili makita, ang panganay sa tanang binuhat.
16 Diha niya gibuhat ang tanang butang
nga makita ug dili makita:
ang mga trono, mga hari, mga gahom...
ang tanan gihimo pinaagi niya ug alang niya.
17 Siya na ang Siya, sa wala pa ang tanan,
ug diha niya ang tanang butang.
18 Ulo siya sa lawas, ang Simbahan;
ang sinugdan,
ang unang gibanhaw sa mga patay aron mag-una sa tanan.
19 Kay nahimuot ang Diyos nga ang kahingpitan magpabilin niya.
20 Gimbut-an sa Diyos nga pinaagi ni Cristo
mapahiuli ang tanan diha
ug pinaagi niya, sa iyang pagpaagas og dugo sa Krus,
gimugna sa Diyos ang kalinaw
dinhi sa yuta ingon man sa Langit.
• 21 Kamo mismo layo ug masinupakon sa Diyos kaniadto tungod sa daotang binuhatan. 22 Apan karon gipahiuli namo. Ang Diyos nagpahiuli ninyo pinaagi sa pagtugyan sa kamatayon sa lawas ni Cristo, aron makaatubang mo niya nga walay sala, balaan ug putli. 23 Barog nga lig-on sa sukaranan sa pagtoo ug pabilin sa gilaoman. Ibutang sa hunahuna ang Ebanghelyo nga nadungog. Kay gitudlo ni sa tanang binuhat ubos sa langit. Ako, si Pablo, ang nag-alagad niya.

PAGPAAMBIT SA MENSAHE:

Ang maong ebanghelyo nagpasabot lamang nga si Jesu Cristo mao ang sinugdanan ug ang kataposan , Ang Alpha ug ang Omega. Juan 14: 6 nagaingong Siya ang Kahayag , Ang kamatuoran ug ang Kinabuhi. Diha na Siya sa wala pa ang kalibutan diin Siya maoy arkitekto nga tiglingaw sa Langitnong Amahan sa ilang pagbuhat sa kalibutan, diha na usab siya sa panahon ni Moises , niadtong nabantog nga Exodus diin siya kadtong maong dakong bato nag nagahatag ug giya ni Moises ug sa iyang mga katawhan sa ilang mga kinahanglanon.

Diha nnining maong ebanghelyo nagaingon nga Siya ang buhing larawan sa dili makita nga Diyos ug panganay sa tanang mga binuhat nga makita ug dili makita. Dako ang misyon ni Jesu Cristo diha sa iyang pagpakatawo dinhi sa kalibutan diin, Ang Diyos pinaagi sa iyang bugtong anank maoy miduol kanato aron kita maluwas ug dili kay kita maoy nangita sa Diyos para sa atong kaluwasan.

Sumala diha sa Philiphos 2 : 6~ 11 nagaingon:Diha kaniya kanunay ang kinaiya gayud sa Diyos. Apan wala siya maghuna-huna pagpakigtupong sa Diyos pinaagi sa kusog. Kundili sa iyang kaugalingong kabubut-on iya kining gibiyaan. Ug gisul-ob niya ang kinaiya sa usa ka sulogoon. Natawo siya sama kanato ug nakita siya ingon nga tawo. Nagpaubos siya ug nagmasinugtanon hangtod sa kamatayon, Ang iyang kamatayon sa krus. Tungod niini gituboy siya sa Diyos ngadto sa kinatas-ang dapit sa kalangitan, Ug gihatagan siya ug ngalan nga labaw sa tanang ngalan. Busa manluhod ang tanang binuhat nga atua sa langit ,sa yuta ug sa ilalom sa yuta, Sa pagpasidungog sa nga ni Jesus.

Nagpasabot lamang kini mga igsoon nag ang kamatuoran nga atong gibarugan mao gayud ang kaluwasan diha kang Jesu Cristo, diin kita nga nagasunod kaniya makaambit usab sa mga paglutos. Ang balaang kasulatan nagaingon kun gusto nimong daygon ug himaya-on didto sa gingharian sa Diyos nan puy-i ang kinabuhi nga puno sa mga paglutos ug kasakitan dinhi sa ibabaw sa yuta, pas-ana ang imong krus ug sunod sa mga pagtulon-an nga gisangyaw ni Jesu Cristo, kay bulahan ka nga nakaambit diha sa mga kasakitan nga giaantos ni Jesu Cristo didto sa paglansang niya sa krus kay makaambit ka usab sa himaya sa iyang pagkabanhaw didto sa gingharian sa langit.