Ang Tabang Alang Sa Isigka-Kristuhanon

1 CORINTHO 16:1~4

16 • 1 Bahin sa kolekta alang sa mga santos, sunda ang mga lagda nga gihatag ko sa mga simbahan sa Galacia. 2 Matag Dominggo, ang matag usa maggahin sa iyang mahimo. Sa ingon, inig-anha nako, dili na kinahanglang mangolekta. 3 Kon naa na ko uban ninyo, pagpilig mga tawo nga pinaagi sa mga sulat-pagpaila, hatagag gahom sa pagdala sa inyong mga gasa sa Jerusalem. 4 Kon mas maayo nga moadto ko, mouban sila.

PAGPAAMBIT SA MENSAHE:

Ang maong ebanghelyo maoy pagpasabot lamang nga diha niining atong pagtulon-an nga gibarugan Ang Diyos nagasugo gayud diha sa paghatag ug panabang ngadto sa atong isigka-kristuhanon o isigkamagtutuo. Apan duha ka matang sa pagtabang nga atong ikahatag sa atong isigkatawo ,Una ang pagtabang nga pinansyal ug ang ikaduha ang pagtabang nga espirituhanon.

Diha sa daang kasulatan nagaingon ang Diyos diha sa libro ni Malaquias 3:10, “Dad-a ang kinatibuk-an sa inyong ikapulo ngadto sa templo aron adunay pagka-on didto, Sulayi ako ninyo ug ablihan ko ang mga bintana sa langit ug ibobo ko nga madagaya-on ang grasya.

Diha sa sulat ni Pablo ngadto sa taga Corinto (2 Corinto 9:6~7) nagaingon ang magpugas ug dyutay mo-ani usab ug dyutay apan ang magpugas ug daghan moani usab ug daghan . Busa kinahanglan mohatag ang tagsa-tagsa sumala sa iyang gusto ug dili magbagutbot ni maghuna-huna nga gipugos siya kay ang Diyos nahigugma sa naghatag nga malipayon.

Diha sa usa ka parabulo o istorya sa balaang kasulatan diin nagahatag ang usa ka balo sa tulo ka pirasong pilak isip iyang halad ngadto sa Diyos, miingon si Jesu Cristo, nga mas dako pa ang nahatag sa maong babaye ngadto sa Diyos kumpara niadtong mga adunahan nga naghatag lamang sa pinisik sa ilang bahandi kay ang maong babaye nagahatag man sa Diyos sa kinatibuk-an niyang bahandi nga anaa kaniya, mas dako ang panalangin sa Diyos diha sa maong balong babaye.


Sa ato pa mga igsoon, ang ang paghatag ug materyal o pinansyal ngadto sa isigka-kristuhanon sa ngalan sa Diyos nagaagad usab kini diha sa bug-os ug kinasingkasing nimo nga paghatag, kay dili man ang kadako sa imong gihatag ang importante ang importante mao nga nagahatag ka nga adunay kalumo ug kadasig tungod sa imong gugma sa Diyos, Sa ato pa nagahatag ka nga adunay espirituhanong pagpakabana.

Apan ang labing importante nga atong ikahatag nga panabang ngadto sa atong isigka-magtutuo, mao ang espirituhanong panabang diha sa paghalad, pag-ampo pinaagi sa mga sakripisyo sa santa krus. Kay ang mga pag-ampo maoy atong pagpakig-istorya sa Diyos pinaagi diha sa mga paghalad ug mga pag-ampo diin atong ikapaabot ang unsa nga mga problema o mga kalisod nga atong nasinati, Pinaagi sa atong mga hinugpong nga pag-ampo diha sa balaang oras, diin matod pa madunggan kini hangtod sa gingharian sa langit.

Ang Diyos miingon nga Nganong dili man niya ihatag kun kini kaayohan man, Diin bolahan kun atong nahalad, ug na-ampo ang atong mga kaigsoonan nga atua na sa laing kalibutan, ug diin makaangkon ang ilang kalag sa kaluwasan ug kapasaylo-an sa ilang mga kalag, kay sama man unya nga naluwas nato ang atong kaugalingong kalag, Ang espiritu santo miingon, nga walay may kala-inan ang pag-ampo didto sa templo ug ang atong mga pag-ampo didto sa Santa Krus, Apan adunay nakakulang diha sa nag-ampo sa mga templo, kulang ang ilang sakripisyo.