Ang Pagkinabuhi Diha Sa Kahayag

EFESO 5:1~20

5 • 1 Isip labing pinangga nga mga anak sa Diyos, paningkamot sa pagsunod niya. 2 Subaya ang dalan sa gugma; ang panig-ingnan ni Cristo nga nahigugma ninyo. Gitugyan niya ang kaugalingon alang nato. Nahimo siyang halad ug biktima kansang kahumot nangalimyon ngadto sa Diyos. 3 Kay balaan man mo, walay bisag usa nga malambigit sa kahilayan, sa kauwag o sa kahakog, o sa bisag unsang kahugawan. Dili mo maghisgot ini. 4 Ingon man ang mga pulong nga bastos, walay kahulogan ug binuang dili angayng litokon. Hinunoa, pasalamati ang Diyos.

5 Timan-i ni: Walay tawo nga bisyoso, law-ay o hakog nga nag-alagad sa ‘diosdios nga salapi’ nga makaambit sa Gingharian ni Cristo ug sa Diyos. 6 Ayaw mo palimbong sa pangatarongan nga haw-ang, kay kasal-anan ni nga hukman sa Diyos diha sa katawhan nga masupilon. 7 Ayaw mo pakighugoyhugoy anang mga tawhana. 8 Kangitngitan mo kaniadto, apan kahayag na karon diha sa Ginoo. Pagkinabuhi ingon nga mga anak sa kahayag. 9 Ang mga bunga sa kahayag mao ang kaaghop, hustisya ug kamatuoran sa tanang pamayhon.

10 Kamo mismo, pangitaa ang makapahimuot sa Ginoo. 11 Ayaw panggilabot sa mga buhat sa kangitngit nga walay kapuslanan. Maayo pa kon ibutyag ni. 12 Sa pagkatinuod makauulaw kaayo bisan ang pagsulti sa gibuhat anang mga tawhana sa tago. 13 Apan inigbutyag ninyo ini sa kahayag matataw kaayo ang tanan. 14 Ang tataw na mahimong kahayag. Busa, ginaingon: “Pagmata na, kamong na-hikatulog. bangon gikan sa mga patay aron ang kahayag ni Cristo modan-ag ninyo.”

15 Atimana ang inyong linihokan. Ayaw pagkinabuhi sama sa mga walay kinaadman, apan sama sa mga tawong kasaligan. 16 Gamitag maayo ang panahon karon, kay daotan kining mga adlawa. 17 Ayaw pagkabuang. Hinunoa, sabta ang kabubut-on sa Ginoo. 18 Ayaw paghuboghubog. Ang bino mosangko sa kadingas. Apan pun-a ang kaugalingon sa Espiritu Santo. 19 Pagtigom mo aron mag-ampo sa mga salmo, himno ug mga alawitong espirituhanon. Pag-awit ug sauloga ang Ginoo sa inyong kasingkasing. 20 Pasalamati ang Diyos nga Amahan sa ngalan ni Cristo Jesus, ang atong Ginoo, sa kanunay ug sa tanang butang.

PAGPAAMBIT SA MENSAHE;

Ang maong ebanghelyo maoy pagpasabot lamang nga kun nagasunod ka sa pagtulon-an nga gisangyaw ni Cristo nan nagasunod ka sa kahayag nga maoy gikahimut-an sa Diyos apan diha sa ubang pulong sa balaang kasulatan nagaingon, kun nagasunod ka sa pagtulon-an ni Jesu-Cristo apan adunay kasilag ug pagdumot diha sa imong kasing-kasing diha sa imong isigkatawo nan wala ka pa magpuyo sa kahayag kundili ana-a ka pa sa kangitngit.

Kun moingon ka nga nahigugma ka sa imong Diyos apan nagadumot ug nasilag ka sa imong silingan ug sa imong isigkatawo nan ang Diyos miingon nga bakakon ka kay giunsa man nimo paghigugma ang Diyos nga wala nimo makita ug mahikap apan nagadumot ka sa kauban nimo sa pagtuo ug sa imong mga isoon nga sa tanang adlaw imo man makita, nan wala ka mahigugma sa Diyos kun dili ang imong kaugalingong garbo maoy imong gihigugma.

Lisod gayud madaug ang tawo batok sa iyang kaugalingon kun hataas ang iyang garbo, ug malisod gayud usab ang hingpit nga pagtugyan sa imong kaugalingon sa Diyos kun hataas ang atong garbo. Kay matod pa sa ubang pulong sa mga Japanese doctrina nga Ang dako nimo nga kadaugan sa imong kinabuhi kun modaog ka sa imong kaugalingon “Your greatest Victory is Your Victory Over yourself”.

Apan mga igsoon kun atong ipahari si Jesu-Cristo diha sa atong kasingkasing nan ato gayung mapaubos ang atong garbo kay mao man kini ang kinatibuk-an sa kamatuoran nag gustong isangyaw ni Jesu Cristo diin atong isangyaw ang pagtulon-an sa Diyos nga walay pagtap-tap ug maskara diha sa atong dagway, kay unsa-on man diay tuod nato sa pagpaila sa Ginoo nga kita mismo wala man magkaila sa hingpit sa Diyos. Atong isangyaw ang atong pagtulon-an ug labaw sa tanan ang atong Diyos diin himoon nato ang atong kaugalingon nga buhing ehemplo kay aron makita sa atong isigkatawo ang kinaiyahan sa Diyos nga atong gisangyaw diha sa atong pagkinabuhi diin mamahimo kitang kahayag ngadto sa atong komunidad ug sa atong kaigsoonan.