FILIPOS 2: 12~ 17
• 12 Busa, mahal kong kahigalaan, ingon nga kanunay mong nagsunod nako samtang uban pa ko ninyo, padayon mo labi pa karon nga layo na ko, sa pagbudlay alang sa inyong kaluwasan uban ang “Kahadlok ug pangurog.” 13 Ang Diyos nagdasig sa inyong pangandoy ingon man sa pagtuman sa makapahimuot niya. 14 Buhata ang tanan sa walay bagulbol, 15 sa ingon, maanak mo sa Diyos nga walay sayop ug dili mabasol; dili salawayon taliwala sa hiwi ug badlongong kaliwat. Kahayag mo taliwala nila, sama sa kabitoonan sa tibuok kalibotan nga 16 naghupot sa pulong sa kinabuhi. Mobati kog garbo nga ang inyong paningkamot ug kahago wala makawang. 17 Kon ibubo ko ang akong dugo isip gasa alang sa pagsaulog sa inyong pagtoo, magmaya ko ug magpadayon pag-ambit sa inyong kalipay.
PAGPAAMBIT SA MENSAHE:
Ang maong ebanghelyo maoy pagpasabot lamang nga ang pagtulun-an nga gisangyaw ni Jesus maoy pagtulun-an nga naghatag ug kahayag sa tibuok katawhang kristuhanon, ilabi na niadtong mga katawhan nga nagasunod sa iyang mga kasugo-an. Juan 14: 6 nagaingon Siya ang Dalan, Ang kamatuoran Ug Ang Kinabuhi ug walay mahiabot didto sa Amahan kundili moagi kaniya, Siya ang sinugdanan ug ang Kataposan, ang Alpha ug ang Omega.
Kabubut-on sa Amahan nga magpakatawo ang iyang bugtong Anak ug motipon sa mga tawo aron ilang masinati ang kabubut-on sa Diyos ug ang pagkinabuhi nga maoy gusto sa Diyos nga atong ikanabuhi. Nagpakatawo siya ingon nga kabos ug nagsangyaw sa kamatuoran sa pag-edad niya ug 30 paingon sa 33, diin walay bugtong gisaligan mao lamang nga mga pagtulun-an nga gihatag sa Amahan kaniya ug ang mga milagro nga maoy simbolo sa walay kataposang gahum sa Diyos.
Atong magpalandungan nga diay sa pagpakabuhi aron mahimong adunay kaluwasan ang imong kalag ug aron mahimong kahayag diha sa mga pagtulun-an nga gisangyaw sa Diyos dili na kita magakinahanglan ug dakong bahandi, Kay matod pa sa ubang sinulat nga adunahan man ang tawo kun kuntento na siya kun unsay anaa kaniya, kay matod pa diha sa atong paghiabot niining kalibutan hubo man kita ug walay dala bisan unsa ug diha sa aton pagtaliwan niining kalibutana biyaan nato ang tanan ug wala kay dala bisan gamay, diin bisan ang atong materyal nga lawas atong biyaan ug mobalik kini sa abog.
Nan diha diining atong pagkinabuhi atong himoon ang atong kaugalingon nga bugtong halad ngadto sa Diyos, diin maoy atong himoong sumbanan ang mga pag-antos ug mga kasakitan ni Jesu Cristo didto sa Krus. Ang atong mga pag-ampo ug mga paghalad ug sakripisyo maoy atong himoong kahayag nga magadana-g ugma damlag sa atong kalag ug ingon diha sa atong mga kaigsoonan nga nahisalaag. Ang mga pag-ampo ug mga paghalad maoy atong sumabanan isip maoy atong pamaagi diha sa pagsimba didto sa langit.
No comments:
Post a Comment