Mga Hinagiban Nga Espirituhanon

EFESO 6: 10~20

• 10 Sa kataposan pagmalig-on mo sa Ginoo pinaagi sa iyang kusog ug kalig-on. 11 Isul-ob ang tibuok nga taming sa Diyos aron makaharong mo sa mga limbong sa yawa. 12 Ang pakig-away nato dili sa tawhanong kusog kondili, batok sa mga punoan ug gamhanan ug sa tanang daotang gahom nga nagmando ining kalibotana. Makigbisog ta batok sa mga espiritu ug yawan-ong kusog nga labaw sa kinaiyahan.
13 Busa, isul-ob ang tibuok nga taming sa Diyos aron makasukol mo ug makabarog sa inyong gitindogan sa adlaw sa kadaot. Gamita ang tanang hinagiban. 14 Ibakos ang kamatuoran. Himoa ang hustisya nga inyong taming ug ang 15 kasibot, sapatos aron pagsangyaw sa Ebanghelyo sa kalinaw. 16 Guniti kanunay sa inyong kamot ang taming sa pagtoo aron pagpahilayo sa nagdilaab nga mga pana sa yawa. 17 Sa kataposan gamita ang helmet sa kaluwasan ug ang pinuti sa Espiritu nga mao ang Pulong sa Diyos.
18 Pag-ampo sa tanang higayon sumala sa paglamdag sa Espiritu. Pagbantay mo ug lahutay sa pag-ampo ug sa pagpangayo alang sa tanang kaigsoonan. 19 Iampo sab ko sa akong pagsulti, aron kahatagan ko sa mga pulong sa pagsangyaw sa misteryo sa Ebanghelyo sa tumang kaisog. 20 Bisag gigapos ko, embahador ko sa Diyos. Hatagan unta ko niyag kusog aron makawali sumala sa kinahanglan kong buhaton.

PAGPAAMBIT SA MENSAHE:

Ang maong ebanghelyo nagpasabot lamang nga ang mga katawhan sa Diyos lutoson gayud kay matod pa kun unsa kakusog ang gahom sa Diyos espiritu santo nga nanalipod kanimo nan ingon usab niana kakusog ang dautan nga gusto mosamok kanimo, kay kun ang espiritu santo sa Diyos anaa sa imong tuo nan ang gahum sa dautang espiritu anaa usab sa imong wala.

Wala kita makig-away sa atong isigkatawo kundili ang atong kaaway mao ang dautang espiritu nga dili makita ug mahikap nga nagamando usab niining kalibutana ug nagamando usab diha sa imong isigkatawo. Nan walay lain nato nga ika-alkontra nianang mga dautan nga gusto mohasol kanato, mao ra gayud ang mga pag-ampo ug ang mga armadura nag gitudlo sa Diyos kanato ug labaw sa tanan ang hingpit ug bug-os nga pagtuo.

Kay walay pulos ang mga armadura ug ang mga pag-ampo kun ikaw nga tagtungod kulang ug haguka ang imong pagtuo ngadto sa Diyos. Matod pa sa sinulat sa balaang kasulatan, Hebreo 10: 1 nagaingon nga ang pagtuo mao atong pagsalig sa mga butang o mga binuhat nga dili nato makita ug atong gilauman. Pinaagi sa pagtuo ang atong unang mga katigulangan sama kang Abraham gimatarong sa Diyos.

Matod pa usab sa ubang pulong sa espirito santo Señor Santo Ñino, Ang atong pagtuo ngadto sa Diyos dili masukod pinaagi sa tawhanon nga sukdanan, apan masukod diha sa espirituhanon nga sukdanan kay anaa man kini ibutang sa Diyos sa atong kasing-kasing ug panumduman., Nagpasabot lamang mga igsoon nga Diyos lamang usab ang makasukod sa kadako sa atong pagtuo ngadto kanila.

Apan naga-ingon usab ang ubang mga sinulat diha sa libro ni Santiago, (Santiago 2: 26) Ang pagtuo nga walay buhat Sama kini sa lawas sa tawo nga kun walay espiritu patay kini, nan ang atong pagtuo kun walay binuhatan patay usab kini, Santiago 2: 24 nagaingon nga mas gikahimut-an sa Diyos ang mga tawo nga adunay binuhatan gumikan sa ilang pagtuo kay sa mga katawhan nga adunay pagtuo lamang.