Gamita Ang Inyong Lawas Sa Paghimaya Sa Diyos

1 CORINTO 6:12~20

12 Ang tanan gitugot kanako sa balaod. Apan dili ang tanan makatabang nako. Ang tanan gitugot kanako sa balaod, apan dili ko magpaulipon sa bisag unsa. 13 Ang pagkaon alang sa tiyan, ug ang tiyan alang sa pagkaon, apan ang Diyos molaglag ini. Ang lawas hinunoa, dili alang sa pamuta kondili, sa Ginoo; ug ang Ginoo alang sa lawas. 14 Ang Diyos nga nagbanhaw sa Ginoo, mobanhaw sab nato pinaagi sa iyang gahom.

15 Wala ba mo masayod nga ang inyong lawas mga bahin ni Cristo? Himoon ba ninyo ang maong bahin nga bahin sa puta? Dili motugot ang Diyos! 16 Wala ba mo masayod nga ang nakighilawas sa puta, nahiusa niya? Ang Kasulatan nag-ingon: Ang duha usa ka lawas. 17 Sa laing bahin, ang nahiusa sa Ginoo nahimong espiritu uban niya.

18 Likayi sa hingpit ang pamuta. Ang ubang sala nga buhaton sa tawo wala maggamit sa lawas. Apan ang namuta nakasala batok sa kaugalingong lawas. 19 Wala ba mo masayod nga ang inyong lawas templo sa Espiritu Santo nga naa sulod ninyo, hinatag sa Diyos? Dili na mo tag-iya sa inyong kaugalingon. 20 Hinumdomi ang presyo sa gibayad alang ninyo. Busa, himayaa ang Diyos sa lawas ug sa espiritu nga iya sa Diyos.

PAGPAAMBIT SA MENSAHE:

Ang maong ebanghelyo maoy pagmatuod lamang nga ang Diyos nagahatag kanato ug tulo ka matang sa kinabuhi samtang ania pa kita sa ibabaw sa kalibutan. Anaa ang atong espiritu nga mobalik ngadto sa Diyos inig kamatay na nato ug ang atong kalag nga maoy magahulat sa kataposang paghukom, ug ang atong materyal nga lawas diin diha sa atong kamatayon mobalik kini sa abog kay sa abog man kini gikan.

Diha niining maong ebanghelyo nagaingon nga gamita ang inyong lawas sa paghimaya sa Diyos diin naghisgot kini sa pagbalaan sa atong lawas samtang ania pa kanato ang atong espiritu ug kalag ug diin sa kanunay atong hinumduman nga ang silot sa sala mao gayud ang kamatayon

Ang atong lawas maoy templo sa Diyos espiriyu santo ug ang molaglag sa templo sa Diyos nag mao kita nan pagalaglagon usab sa Diyos. Nagapasabot na daan ang Diyos nga ang imong gibuhat sa pinakaubos nga nilalang sa kalibutan mao usab ang imong gibuhat sa Diyos.

Himoa nga buhing halad ang atong lawas pinaagi diha sa mga pag-ampo , pagbalaan ug pagtuman diha sa iyang mga kasugo-an. Ang pulong sa Diyos ngaingon nga walay tawo dinhi sa ibabaw sa kalibutan nga wala niya madunggi ang pag-ampo, ang tanan iya gayung nadunggan ang mga naga-ampo kaniya, apan dili ang tanan nakadawat sa iyang panalangin kay matod pa ang kadaghanan nga nagaampo anaa lamang sa tumoy sa ilang dila wala magasumikad sa ilang kasingkasing.