Ang Paglaom Nga Dili Matarog

1 PEDRO 1 :3~12

3 Dayegon ta ang Diyos, ang amahan sa atong Ginoong JesuCristo, tungod sa iyang kaluoy. Sa pagkabanhaw ni Cristo Jesus sa minatay, gitagaan ta niyag bag-ong kinabuhi ug paglaom sa pag-ambit sa kinabuhing malungtaron human sa kamatayon, 4 sa sala ug sa tanang lumalabay. Kining kabilina giampingan sa kalangitan alang ninyo. 5 Kay ang gahom sa Diyos maghimo ninyong matinud-anon hangtod nga mabutyag ang kaluwasan sa kataposang mga adlaw. 6 Adunay hinungdan sa kalipay, bisag sa usa ka panahon, sulayan mo pag-ayo. 7 Hinunoa, ang inyong pagtoo sulayan daw bulawan sa hudno. Apan ang bulawan molabay lang. Ang pagtoo nga mas bililhon kaayo, sa kataposan magdalag pagdayeg, himaya, ug dungog inigpakita na ni Cristo Jesus.

8 Wala pa siya makita, apan nahigugma na mo niya. Mitoo na mo bisag wala pa siya makita. Busa, nakatagamtam mog langitnong kalipay nga dili matukib sa mga pulong, 9 kay nakab-ot ang katuyoan sa pagtoo: ang kaluwasan sa kalag. 10 Mao ni ang kaluwasan nga madasigong gipangita sa mga propeta. Gitagna nila kaniadto ang grasya sa Diyos alang ninyo. 11 Apan igo lang sila sa pagsusig kanus-a ang Espiritu ni Cristo nga diha na nila mipadayag sa panahon ug sa kahigayonan: Ang mga pag-antos ni Cristo ug sa nagsunod nga kahimayaan
.
12 Gipadayag nga nagbudlay sila dili lang alang sa kaugalingon kondili, alang pod ninyo. Busa, ining mga adlawa, human mapadala ang Espiritu Santo gikan sa langit, gitudloan mo sa mga magwawali sa Ebanghelyo ining mga misteryo nga bisan ang mga anghel nangandoyng makakita.

PAGPAAMBIT SA MENSAHE:

Ang maong ebanghelyo maoy pagpasabot lamang nga ang nagasunod kang Jesu Cristo lutoson gayud. Ang mga katawhan nga nagasunod sa pagtulun-an ni Jesu Cristo makaambit gayud sa kasakitan sa kinabuhi. Diha sa ubang pulong sa balaang kasulatan nagaingon nga pagasulayan man gani ang bulawan nga lumalabay lamang nan ang tawo pa kaha nga mas labaw pa ug bili kay sa bulawan.

Ang ubang pulong sa Diyos nagaingon Kun gusto nimong himayaon ug daygon didto sa gingharian sa langit nan puy-i ang kinabuhi nga puno sa pagpaubos, puno sa mga paglutos ug kasakitan dinhi sa yuta. Pas-ana ang imong krus sa kinabuhi ug sunod sa pagtulun-an nga gisangyaw ni Jesus. Kay bulahan ka nga nakaambit diha sa mga kasakitan ni Jesu Cristo diha sa iyang pagkalansang sa krus kay makaambit ka usab sa himaya sa iyang pagkabanhaw didto sa gingharian sa langit.

Sa ato pa mga igsoon mailhan nato nag ang pagtulun-an nga atong gibarugan nga iya gayud sa Diyos kay kita nga nagasunod niini lutoson gayud. Apan ang balaang kasulatan nagaingon Dili ang tanan nga nagasangpit kanako ug Diyos makasulod sa iyang gingharian sa langit kundili kadto lamang nagasunod ug nagatuman sa iyang kasugo-an.

Nagpasabot lamang kini mga igsoon nga dili sayon ang pagsulod sa gingharian sa langit diin tunukon, bakilid ug batoon ang dalan diin diyutay ra ang nagakaplag niini ug mas dyutay lamang usab ang molahutay sa pag-agi ug pagbaktas sa maong dalan, Apan ang dalan nga maoy kalaglagan sa atong kalag, haluag, halapad, masadya ug magahob diin ania lang kini usab sa maong palibot diin daghan ang nagaagi, ug nagahapit niin, diin anaa ang mga kahilayan ang mga tawhanong kailibgon ug mga tawhanon nga mga bisyo,

apan matod pa sa Amahang Diyos nga bulahan pa kining maong mga tawo nga nahisalaag sa maong dalan kay inosente pa sila sa kamatuoran ug aduna pay pasaylo ang Diyos para kanila apan kita nga nakatugkad na niining maong pagtulun-an ug motalikod niini aron sa pagbalik didto sa magahaob ug masaba nga dalan nga maoy kalaglagan sa atong kalag nan ang Diyos wala nay pasaylo pa para kanato.