Ang Tinuod Nga Pagkamatarong

FILIPOS 3: 1~11

3 1 Sa kataposan, mga igsoon, pag lipay sa Ginoo.
• Dili bug-at alang nako ang pagsulat pag-usab bahin sa sama gihapong butang, ug alang ninyo mas wala ni peligro. 2 Pagbantay sa mga iro, sa daotang mamumuo ug sa mga tinuli. 3 Kitay tinuod nga tinuli, kay nag-alagad ta sa Diyos sumala sa espiritu ug ang atong pagsalig naa ni JesuCristo, inay sa kaugalingong katakos.

4 Ako, sa akong kaugalingon, wala makulangi ining tawhanong hiyas nga gisaligan sa katawhan. Kon ang uban nila ingog miangkon sa maong hiyas, unsa pa kaha ko! 5 Gituli ko sa walo ka adlaw ang idad ug natawo sa kaliwat ni Israel, sa tribu ni Benjamin. Hebreo ko, natawo sa mga Hebreo. Kabahin sa Balaod, Pariseo ko, ug 6 ingon ang akong kasibot alang sa Balaod nga gigukod ko ang simbahan. Sa katarong sumala sa Balaod, walay ikasaway nako.

7 Apan sa pagkakaplag ko ni Cristo, ang tanang butang nga gitan-aw ko untang ganansya, giisip nako nga alkansi. 8 Gawas pa, ang tanang butang ingon nga baleg wala lang alang nako, kon itandi sa kahibawo ni JesuCristo, akong Diyos. Tungod niya, giwagtang ug gitan-aw ko ang tanan nga daw basura, kon ugaling maangkon ko si Cristo.

9 Diha niya makit-an unta ko nga walay kaugalingong katakos o kabalaan sa pagtuman sa Balaod, apan may kabalaan nga gikan sa pagtoo ni Cristo, ang kabalaang hinatag sa Diyos nga nagsandig sa pagtoo diha ni JesuCristo10 Buot kong makaila niya, makasinati sa gahom sa Iyang pagkabanhaw, makaambit sa iyang pag-antos ug mahisama niya diha sa kamatayon. 11 Modangat unta ko, kon motugot ang Diyos sa pagkabanhaw sa mga patay.

PAGPAAMBIT SA MENSAHE:

Ang maong ebanghelyo nagpasabot diha pagkatinuli diin maoy sumabanan sa pagkamatarong diha sa kapanahunan ni Moises diin matod pa ni Pablo kita nga mga sumosunod ni Cristo ang matuod nga mga tinuli tungod kay ang atong pagkatinuli wala man magsumikad sa seremonyas kundili nagsumikad man sa atong pagtuo ngadto sa Diyos ug kang Jesus Cristo nga anak sa Diyos.

Ang atong pagsunod diha pagtulon-an nga gisangyaw ni Jesus wala magsumikad diha sa mga balaod nga gisangyaw ni Moises kundili nagsumikad kina diha sa mga pagtulun-an nga gisangyaw ni Jesu Cristo nga maoy atong giisip nga sumbanan ang pagsul-ob diha sa kinaiyahan sa espiritu santo sa Diyos ang kinaiyahan nga maoy gipasinati ni Jesus kanato.

Si Jesu Cristo nagpadayag nga ang bililhong sugo sa iyang Amahan nagalangkob lamang sa duruha ka kasugo-an ug diin ang tanang kasugo-an sa Diyos nagalangkob na niini. Una mao ang paghigugma sa Diyos labaw sa tanan ug ang ikaduha ang paghigugma sa imong isigkatawo sama sa paghigugma nimo sa imong kaugalingon diin kun masupak nimo ang bisan usa lamang niining maong mga sugo nan sama ra nga nasupak nimo ang tanang kasugo-an sa Diyos.

Kay ang matuod nga pagkamatarong nagpuyo ang gugma diha sa imong kasing-kasing kay matod pa diha sa ubang sinulat, Ang tawo nga adunay paghigugma nan haduol sa gingharian sa Diyos kay ang atong Diyos , Diyos man sa paghigugma, sa ato pa ang Diyos anaa kaniya ug siya anaa sa Diyos.

Mao kini ang mga kausaban nga nakita ug napamalandungan ni Pablo diin pinaagi diha sa mga milagro nga gipasinati sa Diyos kaniya, iyang nakita ang kahimayaan sa gingharian sa langit diha sa pagtulon-an nga gisangyaw ni Jesu Cristo. Diin ang kaluwasan nga gisaad sa Diyos sa iyang mga sumosumod dili kini premyo o ganti tungod sa atong maayong mga binuhatan kundili ang kaluwasan ngadto sa kinabuhing dayon gasa kini sa Diyos aron sa ingon walay magpasigarbo diha sa atubangan sa Diyos nga siya maluwas tungod sa iyang maayong buhat kundili ang kaluwasan ngadto sa kinabuhing dayon, tungod kini sa gugma ug gasa sa Diyos kanatong iyang mga pinili.


.