Ang Sigpit Nga Pultahan

LUCAS 13:22~30

22Ug si Jesus mipadayon sa iyang paglakaw agi sa mga kalungsuran ug kabalangayan, nga nagpanudlo ug nagpanaw padulong sa Jerusalem.

23 Ug dihay miingon kaniya, "Ginoo, diyutay ra bay maluwas?" Ug siya miingon kanila, 24"Panglimbasugi ninyo ang pagsulod agi sa pultahan nga masigpit; kay suginlan ko kamo, nga daghan ang maninguha sa pagsulod apan dili makahimo. 25Sa diha nga ang tagbalay makatindog na ug makasira sa pultahan, kamo mosugod sa pagtindog sa gawas ug sa pagtuktok sa pultahan, nga manag-ingon `Ginoo, ablihi kami.` Kaninyo siya motubag nga magaingon, `Ambut, tagadiin kamo.`

26Unya mosugod kamo sa pag-ingon, `Sa imong atubangan nagpangaon ug nagpanginom baya kami, ug sa among kadalanan nagpanudlo ikaw.` 27Apan siya magaingon kanila, `Sultihan ko kamo, ambut tagadiin kamo; pahawa kamo kanako, tanan kamo nga mamumuhat ug kadautan!` 28Ug didto kamo managpanghilak ug managkagot sa inyong mga ngipon inigkakita ninyo kang Abraham ug kang Isaac ug kang Jacob ug sa tanang mga profeta sa sulod sa gingharian sa Dios, ug sa diha nga pagaabugon na kamo ngadto sa gawas.

29Ug mangabut ang mga tawo gikan sa sidlakan ug sa kasadpan, ug gikan sa amihaan ug sa habagatan, ug manglingkod sila tambong sa kan-anan diha sa gingharian sa Dios. 30Ug tan-awa, anaay nangulahi nga unya manag-una, ug anaay nagauna nga unya mangulahi."

PAGPAAMBIT SA MENSAHE:

Ang maong ebanghelyo nagpasabot sa kabubut-on sa Dios diin tanan niyang mga tinawag ug pinili giandaman gayud ug moagi gayud sa mahigpit nga pultahan paingon sa gingharian as Dios. Diin kining mga dalana, batoon, tunokon ug pangpang ang masig ka kilid. Kining mga dalana ania ra kini niining walog as mga buhi, mao na kining pagtulon-an nga atong gibarugan, diin anaa ang mga paglutos, pagbiay-biay diha sa atong pagkatawo ug diha sa pagtulon-an nga atong gibarugan.

Apan ang dalan sa kalaglagan sa atong mga kalag diin daghan ang gudtong moagi tungod sa kabibo,kasadya anaa ra usab kana dinhi sa magahub nga siyudad diin anaa ang tanan nga kailibgon ug tanan nga mga kahilayan. Apan bulahan pa sila mga aigsoon tungod kay inosente pa sila sa kamatuoran ug aduna pay pasaylo ang Dios nga nakatagana kun mosimba ug isurender nila ang ilang mga sala ngadto sa Dios apan kita nga nasayod niining maong kamatuoran nga atong gibarugan sa higayon nga motalikod niini nan wala na gayuy pasaylo ang Dios para kanila.

Ang tanang pinili nga katawhan sa Dios kinahanglan gayud nga moagi sa mga pagsulay ug paglutos, ug dili kay maglingkod na lamang ug magpaabot sa anak sa tawo. Sulayan gayud sila aron Makita kun asa kutob ang pag-ila nila niining pagtulon-an nga ilang gibarugan, Sa ingon daw sama sila sa bulawan nga mokinang ug mosidlak kun kanunay madangdangsa kalayo ug sa ingon maklaro ang kapuro sa maong bulawan kun moihag na ang panagway sa tawo nga buot mosuta niini.

Ang pangutana, unsaon ug asa man dapita sa atong lawas ang mokinlaw kun kanunay kitang magasunod sa kabubut-on sa Dios. Matod sa balaang kasulatan, Miingon ang Dios Amahan, wala unta akoy matagaan sa akong gasa kun gitan-aw ko ang inyong pagkamasalaypon apan kay lagi gitan-aw ko man usab ang inyong putli ug tim-os nga kasing-kasing nan anaa gayud akoy natagaan sa akong mga gasa.

Sa ato pa mga igsoon, ang ato diayng kasingkasing ang mokinlaw ug mosiga sa kanunay nga pagsunod sa kabubut-on sa Dios. Nan maila na man unya nga kanunay kang nagabalaan ug nagpatalinhug sa iyang mnga kasugo-an kay moihag na man unya ang panagway sa Dios diha sa atong tagsa-tagsa ka kasing-kasing diin bulahan ka igsoon kay halu-ag na man unya ang imong luna didto sa ganghaan sa gingharian sa Dios.