Nalunod Sila

.........................................BUHAT 27: 34 ~ 44.................................

34Busa agdahon ko kamo sa pagkaon; kini makahatag kaninyog kabaskog, kay walay bisan usa ka lugas buhok nga mawagtang gikan sa ulo ni bisan kinsa kaninyo." 35Ug sa nakapamulong na siya niini, siya mikuhag tinapay, ug sa nakapasalamat siya sa Dios sa atubangan sa tanan, kini iyang gipikaspikas ug misugod siya sa pag-kaon. 36Ug unya nadasig silang tanan ug sila mikaon usab. 37(Ug kaming tanan duha ka gatus ug kapitoan ug unom ka mga tawo diha sa sakayan.)

38Ug sa nangabusog na sila, ilang gipagaan ang sakayan pinaagi sa paglabog sa mga trigo ngadto sa dagat. 39Ug sa pagkaadlaw na, wala sila makaila niadtong yutaa, apan nakita nila ang usa ka luok nga may baybayon nga niini ilang gilaraw ang pagpasangyad sa sakayan kon mahimo man ugaling. 40Busa ilang giputol ang mga pisi sa mga angkla ug kini ilang gibiyaan sa dagat; ug sa maong higayon ilang gilugakan ang mga pisi nga gibanting sa mga bansalan; ug sa nabuklad nila sa hangin ang pook, sila mipadulong sa baybayon.

41Apan sa paghibangga nilag mabaw, ang sakayan ilang gipasangyad; ang dulong niini miungot ug wala na makalihok, apan ang ulin naguba tungod sa kakusog sa mga balud. 42Ug ang mga sundalo naghunahuna sa pagpatay sa mga binilanggo, sa kahadlok nga tingali unya aduna kanilay manglangoy ug mangalagiw.

43Apan ang kapitan, sa iyang tinguha sa pagluwas kang Pablo, midili kanila sa paghimo sa ilang gilaraw. Ug iyang gisugo ang mga makamaong molangoy sa paglukso pag-una ngadto sa dagat ug pagtakas sa mamala, 44ug ang mga mahibilin, sa pagsunod nga magagabayg mga tabla o sa mga guba gikan sa sakayan. Ug nahitabo nga sa ingon niini ang tanan nakalingkawas ngadto sa mamala.

PAGPAAMBIT SA MENSAHE:

Ang maong ebanghelyo naghisgot sa Dios diin kanunay kining nagauban sa iyang mga katawhan, kanunay nga nagpatalinghug sa iyang mga summusunod nga nagtuman sa iyang kabubut-on o nagasunod sa tahas nga gisangon sa Dios kanila. Atong ma-aninaw sa maong ebanghelyo nga gilutos si Pablo sa mga Judio diin ang iyang salaod nga nahimo mao lamang ang pagsunod sa kabubut-on sa Dios.

Gilutos siya sa maong mga Judio apan ang Dios mitabang kaniya sa kataposang gutlo diha sa pagsakop kaniya diin nalunod ang maong barko nga ilang gisakyan tungod ug aron kapanalipdan sa Dios ang mao niyang katawhan.

Nagaingon ang Dios sa iyang mensahe nga ang pinili niya nga katawhan dili lang kay maglingkod ug maghulat sa pagbalik sa anak sa tawo alang sa katapusang paghukom, makasinati gayud sila ug pagsulay aron pagsukod sa ilang gugma ug pagpakigbisog niining pagtulon-an nga ilang gibarugan.

Ginaingon usab diha sa balaang kasulatan nga malisod ang pagsulod sa ganghaan sa gingharian sa Dios diin gawas nga gamay ra ang nakakaplag niini tunukon, batoon, bangilid ang maong dalan, diin mao na kini nga dalan nga atong gitumban niining walog sa mga buhi, mao na kining pagtulon-an nga atong gibarugan diin puno kini sa pagpanglutos pagbiay-biay ug pagtamay nga atong masinati.

1 Corintho 1: 28 nagaingon ang Ginoo nga iyang gipili ang mga tinamay ug ang mga sinalikway nga maoy mosangyaw sa iyang ngalan aron ang mga maalam ug mga makinaadmanon dili makapasigarbo diha sa iyang atubangan, kay walay gamit ang mga tawhanon mga kinaadman ug kaalam didto sa langit. Kun aduna may angay ipasigarbo diha sa atubangan sa Dios mao lamang kadtong mga milagro nga iyang gipasinati diha sa atong tagsa-tagsa ka kinabuhi.