Si Jesus Gikan Sa Langit

Juan 3 : 31 ~ 36

31Siya nga gikan sa itaas, labaw sa tanan; siya nga gikan sa yuta iya sa yuta ug nagasulti pinasukad sa yuta. Siya nga gikan sa langit labaw sa tanan. 32Siya nagapanghimatuod sa iyang nakita ug nadungog, ngani walay midawat sa iyang panghimatuod. 33Ang magadawat sa iyang panghimatuod magabutang sa iyang timaan niini, nga ang Dios matinuoron.

34Kay siya nga gipadala sa Dios magasulti man sa mga pulong sa Dios, sanglit sa walay sukod ang Dios nagapanghatag man sa Espiritu. 35Ang Amahan nagahigugma sa Anak, ug ang tanang mga butang gitugyan niya ngadto sa iyang kamot. 36Ang mosalig sa Anak may kinabuhi nga dayon; apan ang dili mosugot sa Anak dili makatilawg kinabuhi, hinonoa ang kapungot sa Dios magapabilin diha kaniya.


PAGPAAMBIT SA MENSAHE:

Ginaingon diha sa balaang kasulatan nga si Jesu Cristo mao ang ikaduha nga Adan nga nahiabot dinhi sa kalibutan diin wala siya magagikan sa abog apan gikan siya sa lalang sa espiritu santo nga gitisok sa sabakan ni Birhen Maria, nga sa ato pa Dios gayud siya nga matuod, ug bugtong Anak sa Dios Amahan nga nagpakatawo.

Si Jesu Cristo nagbalik-balik na sa kalibutan sa panahun pa ni Moises dihang nilayas sila sa Ehipto uban sa mga 600 ka Israelitas diin mao kadto ang nabantog nga Exodus sa kasaysayan sa Bibliya. Si Jesu Cristo mao kadtong buhing bato nga nagagiya sa katawhan ni Moises paingon didto sa yuta nga gisaad ni Abraham kanila.

Daghan ang mga propeta sa kakaraanan nga nagsulti sa pag-abot sa Anak sa two diin siya maoy mahimong Hari sa mga hari diin kadaghanan sa mga maalamon ug makinaadmanon nasayop sa pagsabot sa maong mensahe diin nagtoo lang sila nga ang gihisgotan usa lang ka tawo nga ordinaryo nga mahimong Hari sama kang Haring David.

Ang mga dagkong pariseo ug mga pang gobyerno sa karaang nga Judio nagtoo usab nga kun aduna man gani mokanaog nga messiahs nga anak sa Dios mga igsoon, ug Hari sa mga Hari magarbo ug pristiyuso gyud nga pagkatawo kay siya tag-iya man sa langit ug sa yuta. Apan lahi diay mga igsoon ang balaod sa langit diin kun gusto ka nga tinahod ug labing dungganan sa gingharian sa Dios magpuyo ka dinhi sa yuta nga magkamang sa kalisod uban sa mga paglutos.

Sa paghidangat ug pagpaila sa anak sa Dios sa mga katawhan sa tibook Judio wala motoo ang kadaghanan sa katawhan ug ang mga dagkong pariseo tungod kay lahi ang imahinasyon nila sa anak sa Dios nga monaog gikan sa langit diin sila mismo mga pariseo nabutahan sa sobrang pagka mateyuso diin ilang giusa ang Dios ug ang bahandi nga sa ato pa kun anaa ka sa Dios sama kanila nan Dato ka.

Ang anak sa Dios mga igsoon nga si Jesu Cristo nagpaila kanila isip yano nga lungsoranon, walay dayan-dayan sa sinina gawas sa mga amorsiko nga namilit sa sidsid sa sinina, ug nagasandalyas lamang ug naa mag-agi sa taliwala sa kabukiran. Ang mga tag-as nga mga pariseo nagtoo nga peke ug impostor ang maong messiah tungod sa kasirado na sa ilang utok diin layo ra gayud sa tinood para kanila si Jesus ug ang Dios nga gusto nilang makita.

Kadaghanan sa mga pariseo wala gayud motoo diin nahadlok sila nga masapawan sa ilang pagtulon-an nga gibarugan, nahadlok sila nga wala na unya silay panapi, kun wala na unya magsimba diha sa ilang simbahan. Ilang gilutos, gilansang sa krus, ug gipatay ang anak sa tawo diin mao kini ang nakalagda sa mga panagna nga sa ingon kitang mga makasasala nga katawhan maluwas ug mabanhaw uban sa anak sa tawo nga si Jesu Cristo.