Gilutos Ang Mga Apostoles

BUHAT 5: 17 ~ 42

17 Apan ang labawng sacerdote ug ang tanang kauban niya, nga mao ang pundok sa mga Saduceo, nanindog nga puno sa kasina, 18ug ilang gidakop ang mga apostoles ug gibanlod sa bilanggoan sa lungsod. 19Apan usa ka manolunda sa Ginoo miabli sa mga pultahan sa bilanggoan sa takna sa kagabhion, ug sila gipagula niya nga nag-ingon, 20"Pangadto kamo sa sulod sa templo ug pangatubang kamo sa mga tawo ug isulti ninyo ang tanang pulong mahitungod niining maong Kinabuhi." 21Ug sa pagkadungog nila niini, sila nangadto sa templo sa pagkabuntag ug nagpanudlo.

22Apan sa pag-abut didto sa mga polis, wala sila makakaplag kanila sa bilanggoan ug namalik sila ug misugilon nga nanag-ingon, 23"Nakita namo ang bilanggoan nga maayo gayud nga pagkasira, ug ang mga bantay nanagtindog sa mga pultahan; apan sa amo nang pag-abli niini, walay tawo nga among nakaplagan sa sulod." 24Ug sa pagkadungog nila niining mga pulonga, ang kapitan sa templo ug ang mga sacerdote nga punoan nangalibog pag-ayo mahitungod kanila, kon maunsa na kaha kini. 25Ug dihay miabut nga nagsugilon kanila, "Tan-awa, ang mga tawo nga inyong gibanlod sa bilanggoan anaa ra nanagtindog sa templo ug nanudlo sa katawhan."

26 Inubanan sa mga polis, ang kapitan miadto sa pagkuha kanila, sa wala hinooy pagpugos, kay nahadlok man sila nga tingali unyag batoon sila sa katawhan. 27Ug sa ila nang nadala sila, ilang gipaatubang sila sa Sanhedrin. Ug nangutana kanila ang labawng sacerdote, 28nga nag-ingon, "Dili ba amo man kamong gipinahan pag-ayo sa dili pagpanudlo pinasikad niining ngalana? Apan tan-awa, ang Jerusalem gilukop ninyo sa inyong tuloohan, ug ginatinguha ninyo nga kapanilngan kami sa dugo niining tawhana." 29Apan si Pedro ug ang mga apostoles mitubag nga nag-ingon, "Kinahanglan maoy among unahon pagsugot ang Dios inay ang mga tawo.

30Ang Dios sa atong mga ginikanan mao ang nagpatindog kang Jesus nga inyong gipatay pinaagi sa pagbitay kaniya sa kahoy. 31Ang Dios mao ang nagtuboy kaniya ngadto sa iyang too ingon nga Principe ug Manluluwas, aron ang Israel maghinulsol ug kahatagan sa kapasayloan sa mga sala. 32Ug kami maoy mga saksi niining mga butanga, ug maingon man ang Espiritu Santo nga gihatag sa Dios kanila nga mga nagasugot kaniya." 33Ug sa pagkadungog nila niini, sila nanaglagot ug naninguha sa pagpatay kanila. 34Apan usa ka Fariseo sa Sanhedrin, nga ginganlan si Gamaliel, magtutudlo sa balaod ug tinahud sa tanang katawhan, mitindog ug misugo nga pagulaon unag makadiyot ang mga apostoles.

35Ug unya miingon siya kanila, "Mga Israelinhon, magbantay kamo sa inyong buot pagabuhaton niining mga tawhana. 36Kay sa unang mga adlaw si Teudas mitungha nga nagpadakudaku sa iyang kaugalingon, ug kaniya midapig ang mga upat ka gatus ka tawo; apan kini siya gipatay, ug ang tanang misunod kaniya nanghitibulaag ug nangahanaw. 37Sunod niini si Judas nga Galileanhon mitungha sa mga adlaw sa pagpanglista, ug iyang gipasalaag ang pipila sa mga tawo ngadto kaniya; siya usab nalaglag, ug nanghitibulaag ang tanang misunod kaniya. 38Ug labut niini karon, sultihan ko kamo, ayaw ninyo paghilabti kining mga tawhana ug pasagdi lamang sila; kay kon kining larawa o kining paningkamota iya ra man ugaling sa tawo, nan kini mapakyas gayud;

39apan kon kini iya man sa Dios, dili gayud kamo arang makapugong niini. Tingali baya hinoon makaplagan kamo nga nakig-away diay batok sa Dios!" 40Ug sila nagpatoo kaniya, ug sa natawag na nila ang mga apostoles kini ilang gipanaghampak ug gipinahan sa dili na gayud pagsulti pinasikad sa ngalan ni Jesus, ug ilang gibuhian sila. 41Ug gikan sa atubangan sa Sanhedrin sila namahawa, mga malipayon nga giisip sila nga angayan diayng pakaulawan tungod sa iyang ngalan. 42Ug sa tanang adlaw, sa templo ug sa binalaybalay, sila wala mag-undang sa pagpanudlo ug sa pagwali nga si Jesus mao ang Cristo.

PAGPAAMBIT SA MENSAHE:

Ang maong ebanghelyo nagbatbat sa mga paglutos sa mga Judio sa mga apostoles ni Jesus, diin ang maong mga apostoles gipanalipdan sa gahum sa Dios ug gipamatuod lamang sa Dios nga ang gitukod sa Dios dili gayud pwedeng bungkagon sa tawo, ug nga ang mga paglutos nga nasinati diha sa iglisea nga imong gibarugan usa lamng ka pagpalig-on sa kaugalingong kalag ug pagto-o.

Gigamit sa Dios ang mga mabo-ot nga mga Judio aron sa pagproteher sa iyang mga apostoles diin nahimong pagtulon-an nga kun iya sa Dios ang maong iglisea sa kamatuoran kini molipang gayud taliwala sa mag paglutos ug nagpamatuod lamang nga ang mga pinili sa Ginoo sa pagsangyaw niining maong kamatuoran makasinati hayud sa mga paglutos kay usa kani ka pag-ayag sa Dios kun asa kutob ang imong pag-antos ug usab kalig-on sa pagtoo nga gibarugan sa matag sumusunod.

Daw sama sila sa bulawan nga mokintab ug mosiga sa kanunay nga paganggang sa kalayo, diin anaa sa kanunay ang Dios nagmonitor sa iyang mga katawhan. Dili matugkad ang kabubut-on sa Dios diin ginaingon sa balaang kasulatan nga walay tawo nga iyang gitugotan sa pagtugkad sa iyang kabubut-on. Nagaingon ang bala-ang kasulatan nga ang himayang dayun didto sa langit ug dili kini premyo o ganti gikan sa Dios kundili gasa kini gikan sa langit aron walay makapasigarbo diha sa atubangan sa Dios nga sila naluwas gumikan sa ilang maayong binuhatan.