Ang Babaye Ug Ang Dragon

GIPADAYAG 12: 1~8

1 Ug sa kalangitan dihay nagpakita nga usa ka dakung tilimad-on, usa ka babaye nga nagbistig Adlaw. Ang Bulan diha ubos sa iyang mga tiil, ug sa iyang ulo dihay usa ka purongpurong nga mga bitoon nga napulog-duha ka buok. 2Ug siya mabdos ug nagsiyagit tungod sa kasakit sa pagbati, tungod sa kasakit sa pagpanganak. 3Ug dihay usa pa ka laing tilimad-on nga nagpakita sa kalangitan; tan-awa, usa ka dakung dragon nga mapula, nga may pito ka buok ulo ug napulo ka buok sungay, ug pito ka buok purongpurong diha sa iyang mga ulo. 4Ang iyang ikog misapupo sa ikatulo ka bahin sa mga bitoon sa langit, ug sila gilabog niini ngadto sa yuta. Ug ang dragon mibarog sa atubangan sa babaye nga hapit na manganak, aron iyang subaron ang bata inigkahimugso na niini. 5Siya nanganak ug lalaki nga mao ang magahari sa tanang kanasuran pinaagi sa olisi nga puthaw, apan ang iyang anak gisakgaw ngadto sa Dios ug sa iyang trono. 6Ug ang babaye mikalagiw ngadto sa kamingawan, diin may dapit siya nga gitagana kaniya sa Dios, diin pagatil-ogan siya sulod sa usa ka libo duha ka gatus ug kan-uman ka adlaw.

7Unya nahitabo ang gubat didto sa langit: Si Miguel ug ang iyang mga manolunda nakiggubat batok sa dragon. Ug ang dragon ug ang iyang mga manolunda nakiggubat, 8apan gilupig sila ug wala nay dapit pa alang kanila didto sa langit. 9Ug gitambog ang dakung dragon, ang sirpinti nga karaan, ang ginganlag Yawa ug Satanas, ang maglilimbong sa tibuok kalibutan-- siya gitambog ngadto sa yuta, ug ang iyang mga manolunda gitambog uban kaniya. 10Ug usa ka makusog nga tingog didto sa langit akong nadungog nga nag-ingon, "Karon nahiabut na ang kaluwasan ug ang gahum ug ang gingharian sa atong Dios ug ang pagbulot-an sa iyang Cristo, kay gikatambog na ang magsusumbong batok sa atong kaigsoonan, siya nga sa adlaw ug sa gabii mao ang nagasumbong batok kanila sa atubangan sa atong Dios. 11Ug sila nakadaug batok kaniya pinaagi sa dugo sa Cordero ug sa pulong sa ilang pagpanghimatuod, tungod kay wala man sila mawili sa ilang mga kinabuhi bisan pag anha sila sa kamatayon.

12 Tungod niini, paglipay, O kalangitan ug kamo nga nanagpuyo niini! Apan alaut kamo, O yuta ug dagat, kay diha kaninyo nahilusad ang yawa nga puno sa dakung kapungot sanglit nasayud man siya nga hamubo na lamang ang iyang panahon!" 13Ug sa pagtan-aw sa dragon nga diha siya ikatambog sa yuta, iyang gigukod ang babaye nga nanganak sa batang lalaki. 14Apan gihatag ngadto sa babaye ang duha ka mga pako sa dakung agila aron siya makalupad sa pagkalagiw gikan sa sirpinti ngadto sa kamingawan, sa dapit diin siya pagatil-ogan sulod sa usa ka panahon, ug sa mga panahon, ug sa katunga sa usa ka panahon. 15Ug gikan sa iyang baba, ang sirpinti mibugwak ug tubig nga daw suba nga gipaagpas sa babaye aron ianud siya sa baha niini. 16Apan ang yuta mitabang sa babaye, ug ang yuta miabli sa iyang baba ug iyang gisuyop ang suba nga gibugwak sa dragon gikan sa iyang baba. 17Unya ang dragon nasuko batok sa babaye, ug miadto siya sa pagpakiggubat batok sa tanan nga uban pang mga kaliwat sa babaye, sa mga nanagbantay sa mga sugo sa Dios ug nagahupot sa panghimatuod mahitungod kang Jesus. Ug ang dragon mibarug diha sa baybayon sa dagat.

PAGPAAMBIT SA MENSAHE:

Ang maong ebanghelyo nagpasabot diha sa mga panan-awon ni Pablo diin iyang nakita ang mga milagro nga naglangkob didto sa langit ug dinhi sa kalibutan, diin iyang nakita ang babaye nga gilakag sa dragon gikan didto sa langit paingon dinhi sa yuta. Usa kini ka sambingay diin sa akong pagsabot ang maong babaye mao ang espiritu nga anaa sa matag tawhanon nga binuhat ug ang dragon mao ang dautan nga gusto mosamok kanato pinaagii sa pagsamok sa espiritu nga ania kanato diin diha unya sa atong mga kasakitan ug mga pagpanlutos nga naagi-an, mao kana unyang higayuna nga ang maong dragon nagasamok kanato diin bation nato ang kabalaka ug kahig-waos kun nagkulang kita diha sa mga pag-ampo, Kay matod pa sa buhing pulong sa Dios tukhi ang mag pagsulay sa mga pag-ampo kay ania ako si Jesus Cristo magapanalipod kaninyo. Diin diha mismo sa atong pag-ampo, diha sa santos nga rosaryo ug sa mga espesyal nga pagsakripisyo hagkap na unya ang atong mag problema nga dad-on.

Ginaingon diha sa ubang mag sinulat nga kun unsa ang kakusog sa espiritu santo nga ania kanato nan tugbangan kana sa dautan diin mangita gayud sila ug panahun nga makasingit diin pag-ampo lamang ug pagrosaryo maoy atong taming diha as maong mga pgglutos. Matod pa ang tawo dili dautan kay ang Dios man ang nagbuhat niini , ug ang tanan mga mga katawhan dinhi sa kalibutan nagpakabuhi diha sa kabubut-on sa Dios. Ang binuhatan lang sa tawo maoy dautan ug kini dili iya, gisugo lang siya sa dautan sa pagbuhat ug mga salaod.

Ang pag-alagad sa Dios wala kini magkinahanglan kun unsa ka ka taas o kamubo sa sa gidugayon sa imong pag-alagad, usa ka pananglitan ang hitabo didto sa kalbaryo diin usa ka tulisan ang gidala ni Jesus ngadto sa paraiso diha-diha dayun tungod sa iyang kinasing-kasing nga mga pagbasol. Usa lang kini ka pagtulun-an ug kamatuoran diha sa balaang kasulatan nga nagaingon nga ang atong kaluwasan diha sa kinabuhing dayun, usa kini ka grasya ug dili premyo o ganti aron sa ingon walay makapasigarbo diha sa atubangan sa Dios nga siya naluwas tungod sa maayong buhat kundili siya naluwas tungod sa grasya ug gugma sa Dios.