Kinabuhi Nga Makapahimuot Sa Dios

1 TESALONICA 4: 1~12

1 Sa katapusan, mga igsoon, kami nagahangyo ug nagapangamuyo kaninyo diha sa Ginoong Jesus, maingon nga kamo nagpakakat-on man gikan kanamo unsaon sa pagkinabuhi ug sa pagpahimuot sa Dios, sumala sa inyo nang ginabuhat karon, nga unta magalabi pa gayud ang inyong pagbuhat niini. 2Kay kamo nahibalo na unsa ang mga tugon nga among gihatag kaninyo pinaagi sa Ginoong Jesus. 3Kay ang pagbuot sa Dios mao kini, ang inyong pagkabinalaan: nga kamo managlikay sa pakighilawas;

4nga ang matag-usa kaninyo mahibalo unta unsaon niya sa pagpangasawa diha sa kabalaan ug kadungganan, 5dili sa balatian sa kaulag ingon sa mga Gentil nga wala makaila sa Dios; 6aron walay bisan kinsa nga maglapas ug mamintaha sa iyang igsoon labut niining butanga, kay kining tanang mga butanga panimaslan ra sa Ginoo, sumala sa among maligdong pagpasidaan kaninyo. 7Kay ang Dios wala magtawag kanato alang sa kahugawan, kondili sa kabalaanon. 8Busa, bisan kinsa nga magasalikway niini, wala magasalikway sa tawo kondili sa Dios nga nagahatag sa iyang Espirito Santo kaninyo.

9 Apan mahitungod sa gugma alang sa mga kaigsoonan, kamo wala nay kinahanglan nga pagasulatan pa ni bisan kinsa, kay kamo gikatudloan na man sa Dios sa paghigugma ang usa sa usa; 10ug sa pagkatinuod, kamo nagahigugma man sa tanang kaigsoonan sa tibuok Macedonia. Apan magatambag kami kaninyo, mga igsoon, sa paghimo niini sa labi pa gayud, 11sa pagtinguha sa pagpuyo nga malinawon, sa pag-atiman sa inyong kaugalingong mga bulohaton ug sa pagbudlay ginamit ang inyong mga kamot, sumala sa among gitugon kaninyo; 12aron kamo mangintakus sa pagtahud gikan sa mga tagagawas, ug dili magpasiro kang bisan kinsa.

PAGPAAMBIT SA MENSAHE:

Ang maong ebanghelyo nagpasabot diha sa pagsunod sa tawo diha sa mga pagtulon-an sa Dios diin likayan niya ang mga tawhanon nga mga kailibgon ug mga kahilayan, Sa pagkamatay ni Jesus diha nianang maong krus diin iyang gihalad ang iyang lawas ug dugo aron kita maluwas diin diha sa mao niyang kamatayon namatay usab ang atong mga sala uban kaniya ug sa pagkabanhaw ni Jesus nabanhaw usab kita uban kaniya apan nagpabilin na nga patay ang atong mga kasal-anan.

Apan wala maga pasabot nga diha sa mao natong kaluwasan wala na kitay buhaton diin diha sa maong kaluwasan sa kanunay mahimo pa kitang makasala kay tawo pa man kita ug diin mao kini ang gipasabot ni Jesu Cristo diin kitang tawo samtang nagkinabuhi pa makasala gayud kita pinaagi sa huna-huna, sa pulong ug sa binuhatan. Diin gipasabot kita Dios apan kinahanglang ang pagsakripisyo diha sa imong kaugalingon diin isul-ob nato ang kinaiyahan ni Jesu Cristo nga mao ang kinaiyahan sa espiritu santo diin anaa ang mga pag-antos, pagdawat sa mga paglutos ug sa pagsantos nga rosaryo sa matag adlaw ug gabii, sa kanunay nga pagpangayo ug pasaylo sa Dios diha sa mag kasal-anan.

Kay mas maayo pa nga magkinabuhi kita nga langyaw niining kalibutana diin halayo o dili na molingi sa mga tawhanon nga mga kailibgon kay sa magpakabuhi nga haom niining kalibutana diin anaa ang tanang mga kailibgon ug ayran sa gingharian sa Dios. Kay matod pa diha sa ubang sinulat sa balaang kasulatan nagaingon nga Ang tawo nga nagasige ug ampo ug nagadayeg sa Dios sa matag-adlaw apan diha sa iyang kamatayon dili siya makasiguro nga mahilangit ang iyang kalag nan unsa na kaha kadtong mga tawo nga walay mga pag-ampo, asa kaha paingon ang ilang mga kalag?.

Diha sa ubang sinulat sa balaang kasulatan nagaingon: Ang kinabuhing dayun nga gisaad ni Jesu Cristo gadto sa iyang nga sumosunod nga nagsunod sa iyang kabubut-on dili kini premyo o ganti gumikan sa maayong buhat apan usa kini ka grasya o gasa gikan sa Dios aron sa ingon, walay si bisan kinsa nga makapasigarbo sa iyang kaugalingon diha sa atubangan sa Dios nga siya naluwas tungod sa iyang maayong binuhatan kundili kita maluwas gumikan sa gasa ug gugma sa Dios.