Mga Sulogoon Sa Dios

1 COR 3:1~16

3 • 1 Apan mga igsoon, wala tamo ikahinabi isip mga tawong espirituhaon kondili, nga lawasnon, mga masuso diha ni Cristo. 2 Gatas ang akong gipainom ninyo, dili gahing pagkaon, kay dili pa mo makasugakod hangtod karon. Bisan gani karon, dili mo makahimo, 3 kay yutan-on ug naglakat gihapon mo sama sa mga ordinaryong tawo. 4 Samtang may nag-ingon: “Kang Pablo ko,” ug, “Kang Apolo ko,” dili ba mga yutan-on mo? 5 Kinsa diay si Apolo? Ug si Pablo? Mga alagad sila. Pinaagi nila mitoo mo sumala sa gian- dam sa Ginoo alang sa usag usa. 6 Akoy nagtanom, si Apolo ang nagbisibis, ug ang Diyos ang nagpatubo. 7 Dili importanti kinsay nagtanom o nagbisibis kondili, ang Diyos nga nagpatubo
.
8 Parehog tumong ang nagtanom ug ang nagbisibis; gantihan ang matag usa pinasikad sa iyang kabudlay. 9 Mga mamumuo ta uban sa Diyos, apan uma mo sa Diyos ug balay niya. 10 Sa grasya sa Diyos nga gitugyan kanako daw maalamon nga magtutukod, akoy nagbutang sa sukaranan. Lain ang motukod. Mag-amping lang ang matag usa kon unsaon pagtukod. 11 Dili makahimo pagbutang ang usa ka tawo sa laing sukaranan gawas sa gikabutang na, si JesuCristo. 12 Apan sa pagtukod sa maong sukaranan, may mogamit og bulawan, plata, mahalong mga bato, kahoy, dagami o uhot. 13 Ipakita ang kalidad sa binuhatan sa matag usa sa adlaw sa pagbutyag ini. Kay ipadayag ni sa kalayo ug sulayan ang matang sa binuhatan sa tawo. 14 Kon molungtad ang gibuhat sa nagtukod, gantihan siya. 15 Kon matun-as, mag-antos siya sa kadaot. Maluwas man tuod siya, apan pinaagi lang sa kalayo.

• 16 Wala ba mo masayod nga mga templo mo sa Diyos ug napuyo ninyo ang espiritu sa Diyos? 17 Ang moguba sa templo sa Diyos, gub-on sab sa Diyos. Balaan ang templo sa Diyos ug iya mong mga templo. 18 Wala untay manglimbong sa kaugalingon. Kon may usa ninyo nga magpakamaalamon ining kalibotana, magpakabuang siya aron mamaalamon. 19 Kay ang kaalam ining kalibotana giisip sa Diyos nga kabuang. Sa pagkatinuod, nasulat: Makuha sa Diyos ang maalamon sa kaugalingong kaalam. 20 Sa laing bahin nasulat sab: Nasayod ang Ginoo sa mga hunahuna sa maalamon, walay kapuslanan ang tanan. 21 Busa, ayawg ipasigarbo si bisag kinsa; kay inyoha ang tanang butang 22 bisan si Pablo o si Apolo o si Kefas o ang karon ug ugma. 23 Inyoha ang tanan, ug iya mo ni Cristo, ug si Cristo iya sa Diyos.

PAGPAAMBIT SA MENSAHE:

Ang maong ebanghelyo naghisgot diha sa mga tulomanon diha sa pagsunod sa mga pagtulon-an ni Jesu- Cristo, diin ang iyang mga pinili nga mga apostoles maisogon nga nagsangyaw pulong sa Dios luyo sa mga pagsulay ug mga paglutos nga nasinati. Diin ang maong mga apostoles sa kanunay nagasangyaw sa mga pulong sa Dios ginamit ang mga pulong nga dali masabtan kay matod pa ang pagtukib sa pulong sa Dios wala magasumikad diha sa kaalam sa tawo kundili sa kaalam sa espiritu santo o langitnon nga kaalam.

:

Kay matod pa diha sa ubang sinulat gipili sa Dios ang mga tinamay ug mga sinalikway, aron ikapakita ngadto sa mga may kaalam ug mga may tawhanon nga kinaadman nga walay pulos ug walay gamit ang mga tawhanon nga kaalam dito sa gingharian sa langit, diin ang bililhon dinhi yuta walay bili didto sa gingharian sa Dios , apan ang giisip nga wala bili dinhi sa yuta nga mao ang mga espirituhanong pagtulun-an maoy bililhon didto sa gingharian sa Dios. Gituyo kini sa Ginoo aron ipakita nga walay angay ipasigarbo diha sa atubangan sa Dios, ilabina ang mga tawhanon nga kaalam ug kinaadman, kay kun adunay may angay ikapasigarbo, kana mao lamang ang mga milagro sa Dios diha sa atong tagsa-tagsa ka kinabuhi.

Importante ug balaan ang matag tawo sumala sa 1 Corinto 3:16. diin nagaingon nga ang lawas sa tawo, maoy templo sa Dios ug ang magalaglag sa templo sa Dios nga mao ang atong lawas iya sad nga pagalaglagon, sa ato pa mga igsoon matag tawo ana-a ang Dios sa iyang lawas ug kun imong gilutos ug gipasakitan ang imong isigkatawo nan sama ra nga imo usab nga gilutos ang Dios nga anaa nagpuyo nianang tawhana. Angayan lamang nga atong respetuhan ug mahalon ang atong isigkatawo kay aron makasubay kita sa kabubut-on sa Dios, diin mao man kini ang nagalangkob sa kasugo-an sa Dios ang paghigugma sa usag-usa.