Didto Sa Corinto

BUHAT 18;1~17

18 • 1 Unya, si Pablo mibiya sa Ate- nas ug miadto sa Corinto diin nakita niya ang Judio nga si Aquila, lumad sa Ponto, bag-o lang nga naabot gikan sa Italya uban ang asawa, si Priscila. Mituman sila sa kasugoan ni Imperador Claudio, mobiya ang tanang Judio sa Roma. 3 Si Pablo miduaw, mipuyo ug mitrabaho uban nila, kay pareho man sila nga tighimog tolda. 4 Matag Adlaw sa Pahulay nakigkukabildo siya sa sinagoga. Gipaningkamotan niya ang pagdani sa mga Judio ug Griyego.

5 Sa pag-abot ni Silas ug Timoteo gikan sa Macedonia, migahin si Pablo sa tibuok panahon sa pagwali ug pagmatuod sa mga Judio nga si Jesus mao ang Mesiyas. 6 Usa ana ka adlaw, dihang misupak ug gibugalbugalan siya gitaktak niya ang abog sa iyang sinina isip pagtutol sa ilang gibuhat. Miingon siya, “Kamo mismoy manubag sa inyong gibuhat! Dili ko ninyo mabasol kon sukad karon moadto ko sa mga dili Judio.”

7 Busa, mibiya si Pablo. Miadto siya sa balay ni Tito Justo nga mahadlokon sa Diyos ug nagpuyo sa balay sunod sa sinagoga. 8 Mitoo sab sa Ginoo si Crispo, ug ang tibuok niyang banay. Inila siya sa sinagoga. Sa pagkadungog nila ni Pablo, daghan pa nga taga Corinto ang mitoo ug gibunyagan. 9 Usa ana ka gabii, may panan-awon si Pablo, Giingnan siya sa Ginoo, “Ayawg kahadlok. Padayon pagwali. Ayawg pakahilom, 10 kay daghan ang madani ko nga katawhan ining syudara. Kauban ta busa, walay makapanamastamas nimo.” 11 Si Pablo nagpabilig usa ug tunga ka tuig sa maong dapit. Nagtudlo siya sa Pulong sa Diyos.

12 Dihang nagobernador sa Acaia si Gallo, ang mga Judio nagkahiusa pagpakigbatok ni Pablo. Gitaral siya sa hukmanan ug mikiha sila batok niya, 13 “Gidani mi sa pagsimba sa Diyos sa paagi nga supak sa Balaod.” 14 Mosulti na unta si Pablo aron pagpanalipod sa kaugalingon, apan si Gallo miingon, “Kon daotan ning buhata o krimena, tagdon ko unta ang inyong kiha. 15 Apan kay away man ni sa pagtulun-an ug mga balaanong ngalan nga nalambigit sa kaugalingong balaod, kamo ra sab ang angayng mohusay ini. Dili ko mohukom ining mga butanga.” 16 Ug gipagawas sila sa hukmanan. 17 Unya, gidakop nila si Sostenes, inilang tawo sa sinagoga. Gibunalan siya sa hukmanan. Apan wala magpakabana si Gallo.

PAGPAAMBIT SA MENSAHE:

Ang maong ebanghelyo nagtagik diha sa mga gimbuhaton sa mga apostoles niadtong panahun ni Jesu Crsto diin si Pablo sa paghiadto niya sa Corinto daghan mga Judio nga mibiay-biay kaniya. Apan ang Dios misulti kang Pablo nga dili magduha-duha kay pinaagi sa iyang pagsangyaw daghan pa ang iyang makabig nga mga katawhan nga mitoo sa Dios.

Nagpasabot lang mga igsoon nga kun kasugo-an sa Dios diha gayud nato makita ang mga milagro nga ipahigayon sa Dios diin mao kini ang nasinati sa mga apostoles niadtong panahuna, apan anaa gayud ang mga pagpalutos ug mga pagpasakit diha sa mga kasugoan kay ang gingharian sa Dios bisan diha sa iyang mga tinawag ug pinili, dili gayud makasayun-sayun sa pagsulod niini. Usa kini ka paagi sa pagpili sa iyang mga pinili nga katawhan diin mao lamang gayud ang mabarog ug mabilin diha sa mga pagsulay ang tawo nga sa kanunay magabalaan diha sa mga pag-ampo ug pagrosaryo nga maoy gihimong taming diha sa paglutos nga naagian.

Nga sa ato pa usa ka kamatuoran diha sa balaang kasulatan nga nagaingon nga kun gusto nato nga himayaon ug dayegon didto sa iyang gingharian sa langit nan puy-i ang kinabuhi nga tugob sa mga pagdaug-daug, pagpasakit ug paglutos, pas-ana ang imong krus ug sunod sa pagtulon-an nga gisangyaw ni Jesus, kay bulahan ka nga makaambit diha sa mga kasakitan ni Jesus didto sa krus kay makaambit ka usab sa iyang himaya sa pagkabanhaw didto sa iyang gingharian sa langit . Nga sa ato pa mga igsoon ang atong pagdawat sa mga kasakitan ug mga pagpanlutos sa kinbuhi mao lamay pagsimbolo nga atong gidawat ug gipahari si Jesu Cristo diha sa atong tagsa-tagsa ka kasing-kasing.