Ang Daan Ug Ang Bag-ong Kinabuhi

COLOSAS 3: 5 ~ 17

5 Busa, patya ang kalibotanon sa inyong kinabuhi. Sa ato pa, ang kahilayan, kalaw-ay, ang mapatuyangong kauwag, ang mga daotang tinguha ug kahakog, usa ka paagi sa pagsimba sa mga diosdios. 6 Kini ang nakapasilaob sa kapungot sa Diyos!
7 Sulod sa usa ka panahon inyo ning gisunod, ug nagkayamokat ang inyong pagpuyo. 8 Busa, isalikway ang tanan: ang kapungot, ang yawan-ong tinguha ug pagdumot. Ayawg litok og abusadong mga pulong. Ayawg pamakak sa usag usa.

• 9 Gihuboan mo sa daang pagkatawo ug sa panghunahuna ini aron 10 isul-ob ang bag-o padulong sa kahingpitan sa kahibawo. Gibag-o ni sumala sa kasamahan sa Magbubuhat. 11 Busa, walay kalainan tali sa mga Judio ug Griyego, tinuli ug pisot. Wala nay dumuduong, luog, ulipon o gawasnon. Hinunoa, si Cristo ang tanan ug naa siya sa tanan. 12 Busa, sul-obi ang kaugalingon sa angay sa katawhang pinili sa Diyos, kay balaan ug pinangga mo niya. Isul-ob ang kaluoy, kaaghop, paubos, kalumo ug pailob.

13 Magpailobay mo sa usag usa ug magpasayloay, kon dunay panagbangi. Ingon nga ang Ginoo nakapasaylo ninyo, magpasayloay mo. 14 Kon nasul-ob na ninyo kining tanan, ibakos ang gugma aron mahingpit ang sinina. 15 Hinaot nga ang kalinaw ni Cristo mag-awas sa inyong kasingkasing. Tungod ini gitawag mo aron mausa ka lawas. Ug pagpasalamat mo.

16 Papuy-a diha ninyo ang pulong sa Diyos sa iyang kabuhong. Panudlo ug pamadlong sa usag usa pinaagi sa mga pulong sa kaalam. Uban sa mapasalamatong kasingkasing awiti ang Diyos og mga salmo, himno ug tiunayng pagdayeg. 17 Bisag unsay inyong buhaton o isulti, buhata ni sa Ngalan ni Jesus, ang Ginoo. Pasalamati ang Diyos nga Amahan pinaagi niya.

PAGPAAMBIT SA MENSAHE:

Ang maong ebanghelyo nagtagik diha sa pagpakabuhi nato nga kristuhanon nga sa ato pa pagpakabuhi ubos sa landong sa espiritu santo nga maoy gisul-ob ni Jesu Cristo diha sa pagpakabuhi niya dinhi sa kalibutan. Diin kini nagkahulugan sa pagsalindot sa mga tawhanon nga hiyas dinhi sa kalibutan diin atong ilisan ang atong kinaiyahan ug atong isul-ob ang hiyas nga maoy kahimut-an sa Dios Amahan.

Matod pa diha sa ubang sinulat nga mas maayo pa nga magpakabuhi kita nga langyaw niining kinabuhi-a apan ha-om didto sa gingharian sa langit kay sa magpakabuhi kita nga haom niining kalibutana apan dili ilhon ug talikdan sa grasya didto sa langit.

Ginaingon diha sa ubang sinulat nga samtang magasul-ob kita sa hiyas nga espirituhanon diin atong himoong panag-ingnan nga magasulob kita ug bag-o sinina nga daghan ug tapak nga sa ato pa diha sa pagtalikod nato sa mag karaan ug tawhanon nga hiyas nan talikdan ta kini sa hingpit ug dili na nato balikan pa.

:
Diin maoy himoon natong taming ang santos nga rosaryo sa matag adlaw ug gabii inubanan diha sa mga pag-alagad ug pagdawat sa mga sakripisyo diha sa atong tagsa-tagsa ka panimalay. Ginaingon nga lisod ang pagsulod sa gingharian sa Dios diin gawas lamang kun mobalik ka sa pagkabata nan kun usa ka kabata masayon kanimo ang pagsulod sa gingharian sa Dios kay matod pa diha sa ubang sinulat, ang mga bata ug mga inosenteng binuhat mga igsoon , ang ilang anghel nga magbalantay, atua gayud kanunay nagalingkod sa sabakan sa Dios amahan diin sa kanunay makadawat sa mga panalangin.

Sa ato pa kun dawaton nato si Jesus diin sama kita sa bata nga dili molingi sa mga tawhanon nga mga kailibgon ug mao ray gihunahuna ang pgapahimuot sa amahan nan masayon kanato ang pagsulod sa iyang ginghrian.

Apan matod pa ang kinabuhing dayun nga gisaad ni Jesu Cristo, dili kini premyo o ganti gumikan sa pagsunod sa maayong binuhatan apan usa kin ka gasa o grasya nga langitnon nga gihatag sa Dios Amahan, aron sa ingon walay makapasigarbo diha sa atubangan sa Dios nga siya naluwas gumikan sa iyang maayong binuhatan kundili kita maluwas gumikan sa grasya ug kalooy sa Dios.