Ang Kaalam Sa Dios

1 CORINTO 2: 6 ~ 16

• 6 Alang sa hingkod na sa pagtoo, nagsulti mig kaalam. Dili ang kaalam nga naggikan ining kalibotana, ni sa mga pangulo nga nangahanaw. 7 Nagtudlo mi sa misteryo ug sikretong laraw sa diyosnong kaalam nga gitakda sa Diyos gikan sa sinugdan alang sa atong himaya.

8 Wala ni mahibaloi sa kadagkoan ining kalibotana. Kon nasayod pa sila, wala unta ilansang sa krus ang Ginoo sa himaya. 9 Apan sumala sa nasulat: Ang mata wala makakita, ni ang dalunggan makadungog ni makasulod sa kasingkasing sa tawo ang mga butang nga giandam sa Diyos alang sa nahigugma niya. 10 Gipadayag ni sa Diyos pinaagi sa espiritu. Kay gisusi sa espiritu ang tanan, apil ang lawom nga mga butang sa Diyos.

11 Kinsay mas nasayod sa mga butang nga naa sa tawo kay sa espiritu nga naa niya? Busa, sa mga sikreto sa Diyos walay laing nasayod gawas sa Espiritu sa Diyos. 12 Ug nakadawat ta dili sa espiritu sa kalibotan kondili, sa Espiritu nga gikan sa Diyos. Sa ingon, makasabot ta sa gihatag sa Diyos kanato sa kaugalingong kabubut-on.

13 Kini ang among gipamulong, dili sa mga pulong nga gitudlo sa kaalam sa tawo kondili, sa gitudlo sa Espiritu Santo. Gitandi ang mga butang nga espirituhanon sa espirituhanon. 14 Wala dawata sa tawo nga yutan-on ang mga butang sa espiritu sa Diyos; binuang ni alang niya ug dili nato masabtan, kay matugkad lang sa espirituhanong paagi. 15 Ang espirituhanon naghukom sa tanang butang ug dili hukman ni bisag kinsa. 16 Kinsa ba ang nasayod sa hunahuna sa Ginoo aron ikatudlo? Hinuon, atong gihuptan ang hunahuna ni Cristo.


PAGPAAMBIT SA MENSAHE:

Ang maong mensahe nagpadayag diha sa pagtukib sa kaalam sa Dios diin ginaingon diha sa ubang mga sinulat nga walay tawo nga gitugotan sa Dios sa pagtukib sa iyang kabubut-on, ingon man ang kaalam nga gihatag sa Dios ngadto sa iyang mga sumosunod mao ang kaalam nga langitnon diin dili ang tanan tawo ang makasabot ug makatukib niini.

1 Corinto 1:28 nagaingon gipili sa Dios ang mga tinamay ug mga sinalikway , kadtong mga tawo nga nagpaka ubos sa ilang kaugalingon diha sa atubangan sa Dios aron ipakita ang walay pulos ang mga tawhanon nga kaalam ug kinaadman diha sa atubangan sa Dios.

Usa kini ka pagpasabot nga ang tanan nga kaalam sa tawo iya sa Dios kay matod pa bisan ang garas o kiras sa atong lawas magaagad sa kabubut-on sa Dios. Ang mga katawhan sa Dios gipili ug gitawag ng daan sa didto pa kini sa tago-angkan sa ilang inahan. Sa ato pa ang maong kaalam mahatod sa Dios kanatong iyang mga pinili pinaagi sa mga pag-ampo ug mga paghalad.

Usa kini ka tinago nga kamatuoran diin ang maong mga kaalam wala mahatag niadtong mga dagkong ranggo ug mga mabuot nga panggobyerno niadtong mga panahuna kay matod pa kun nahibalo pa sila nan wala unta nila malansang ang atong Dios. Usa kini ka kamatuoran nga nagpasabot nga ang kaalam nga langitnon giisip nga binuang sa mga mabuot nga mga katawhan apan ang kaalam nga tawhanon maoy ilang giisip nga importante dinhi sa kalibutan apan walay pulos ug walay gamit didto sa gingharian sa Dios.