Nagsaad Ang Ginoo Nga Mobalik Siya

PEDRO 3:1~18

3 • 1 Mga minahal, ikaduha ning sulat alang ninyo. Sa duha, pareho ang akong tuyo: ang pagpahinumdom sa maayong pagtulon-an. 2 Ayawg kalimot sa mga pulong sa balaang mga propeta, sa pagtulon-an sa atong Ginoo ug Manluluwas, ingon man sa nabati ninyo sa mga apostol. 3 Una sa tanan, hinumdomi nga sa kataposang mga adlaw ang tigbiaybiay magpakita. Ang pagbiaybiay nila nagsilbi sa daotang tinguha. 4 Miingon sila: “Unsay nahitabo sa gisaad nga pag-abot? Sukad nga nangamatay ang atong ginikanan, ang tanang butang nagpadayon sama kaniadto, sa pagbuhat pa sa kalibotan.”

5 Sa pagkatinuod, wala nila dawata nga sa sinugdan unang gibuhat ang kalangitan. Ang yuta migawas sa tubig. Gihatagan nig porma sa Pulong sa Diyos. 6 Sa samang Pulong sa Diyos, kining kalibotana nalaglag sa baha. 7 Sa maong paagi, ang Pulong sa Diyos nag-amping sa langit ug yuta nga nia karon, apan unya, sunogon sa kalayo. Gitipigan ni alang sa Adlaw sa Hukom kanus-a ang wala motoo sa Diyos dugmokon. 8 Mga igsoon, ayawg kalimot, nga uban sa Ginoo, ang usa ka adlaw sama ra sa usa ka libo ka tuig ug ang usa ka libo ka tuig sama ra sa usa ka adlaw. 9 Ang Ginoo dili maglangan sa pagtuman sa saad, bisag maghisgot ang uban og kalangan. Busa, gihatagan mog panahon, kay dili siya buot nga may mawagtang. Hinunoa, nga ang tanan makakab-ot sa kausaban. 10 Ang Adlaw sa Ginoo moabot sama sa kawatan. Unya, ang kalangitan matunaw uban sa tumang kagahob. Tunawon sa kalayo ang tanan. Ang yuta ug ang naa ini maugdaw.

11 Kay mahanaw man ang tanang butang, kinahanglan nga balaan ug makidiyosnon ang inyong pagkinabuhi, 12 samtang nagpaabot mo sa Adlaw sa Diyos ug nangandoy sa iyang pagbalik. Sa maong adlaw tunawon ang langit sa kalayo ug matunaw ang naa sa kalibotan tungod sa kainit. 13 Magpaabot ta sa bag-ong langit ug sa bag-ong yuta diin magmando ang hustisya sumala sa gisaad sa Diyos. 14 Busa, pinangga kong mga igsoon, samtang naghulat mong mapaaboton, paningkamoti nga makita mo sa Diyos nga walay mansa o sayop, nagpuyo sa kalinaw.

15 Isipa nga ang pailob sa Diyos alang sa atong kaluwasan, sumala sa gisulat sa hinigugma tang igsoon nga si Pablo sa kaalam nga gihatag kaniya. 16 Gihisgotan kining mga butanga sa tanan niyang sulat. May pipila hinuon ka punto nga lisod sabton. Ang mga ignoranti ug dili hingkod sa pagtoo, motuis ini sama sa gibuhat nila sa ubang kasulatan. Kini ra sab ang nagdalag kapildihan.
17 Busa, mga minahal, sanglit daan na mong gipasidan-an, pagbantay. Basig ang nahisalaag manglimbong ninyo. Daldalon mo aron masukamod, ug sa kataposan, mapukan. 18 Tubo sa grasya ug kahibalo sa atong Ginoo ug Manluluwas, si Cristo Jesus: Kaniya ang himaya, karon ug hangtod sa adlaw nga walay kataposan. Amen.

PAGPAAMBIT SA MENSAHE:

Ang maong ebanghelyo nagpasabot diha sa pagbalik sa Ginoo diin giingon sa ubang sinulat nga kun giunsa ni Jesus pagbayaw ngadto sa kahitas-an nan mao usab unya ang iyang pagkanaog dinhi sa yuta diin maabli ang langit ug ihatod siya sa mga manulunda diin nanag-awit sa pagdayeg sa Dios. Apan daghan ang nangutana kun kanus-a kini mahitabo diin ang uban nagsagol ug bugal-bugal nga nagaingon nangamatay na lang ang ilang mga katigulangan apan wala pa gayud mahitabo nga nibalik ang Dios. Atong mahinumduman diha sa unang mga sinulat sa balaang kasulatan diin misaad ang Dios Amahan kang Abraham nga hatagan siya ug yuta diin didto niya tipoka ang iyang mga katawhan ug mga kaliwatan ug diin siya mamahimong Amahan sa daghan mga nasod, diin nahitabo gayud kini sebo usab sa kabubut-on sa Dios kay diha sa kaliwatan ni Abraham nagsumikad ang kaliwatan ni Jesu-Cristo diha sa iyang pagkatawo ug diin nahitabo kini diha sa mga libo-an na katuig gikan sa pagsaad sa Dios, nga sa ato pa ang Dios adunay kaugalingon nga orasan diha sa pagbuhat sa iyang kabubut-on ug diin matod pa diha sa 2 Pedro 3: 16, ang usa ka libo ka tuig daw sama lamang sa usa ka adlaw sa Ginoo ug ang usa ka adlaw sama usab sa usa ka libo ka tuig. Nagpasabot lamangmga igsoon nga adunay kaugalingon nga orasan ang Ginoo sam kanat nag nag-ulohan nga “ In his time” nga sa ato pa sebo gayud as iyang kabubut-on, diin siya lamang ang nahibalo sa tanan, ug diin waaly tawo dinhi sa ibabaw sa kalibutan nga iynag gitugotan sa pagtugkad sa iyang kabubut-on.

Sa ato pa ang pagbalik sa Ginoo walay gayuy oras nga iyang gitagal diin bisan sa dinhi pa si Jesu Cristo sa kalibutan iya na kini nga gibutyag sumala sa nahitala diha sa balaang kasulatan nga sa iyang pagbalik pohon diin sama sa usa ka kawatan diin walay gihatag nga oras kun alas dose ba sa udto o alas dose ba sa tungang gabii, diin wala na unya kitay panahun sa pag-ilis o sa pagpauli sa balay.

Daghan ang mga milagro nga gipakita sa Dios pinaagi sa iyang mga gipangtahasan diin iyang gipasangyaw ang umaabot nga paghukom diin ipakita ang timailhan sa dili pa siya moabot diin usa na niini sa mag milagro mao ang nabantog nga milagroa sa birhen sa Fatima didto sa Portugal niadtong May 13, 1917, diin mipakita ang mahal nga bierhen sa tulo ka gagnmay nga mga bata nga magbalantay sa karnero, sila mao si Lucia Santos, Jacinta Santos ug si Francisco Marto. Diin didto ang maong mensahe gibilin sa mahal nga birhen sa tulo ka bata nga sa dili pa moabot ang kataposang paghukom daghan ang mag katalagman ug mga kamatayon sa mga dagkong tawo sa gobyerno, ug diin moabot gayod ang gisaad sa balaang kasulatan nga maoy gusto sa amahan ang ang iyang katawhan magasimba sa usa lang ka pagtulun-an ang pagtulun-an sa tinago nga kamatuoran.

Usa kini ka giya diha sa nahitala sa balaang kasulatan nga nagpamatuod nga haduol na ang pagbalik sa Dios diin ang birhen Maria sa Fatima naga-awhag sa pagsantos rosaryo gayud sa matag adlaw aron pinaagi sa hinay-hinay nga pag-ampo adunay katumanan ang tanan. Diha sa mga pag-ampo mao lamang ang pagpasabot ug paghangyo sa Dios Amahan nga dili mahiapil ug silhig ang mga tawo nga iyang pinili ug tinawag. Apan lagi ang tanan iyang pagbuot sa Amahan diin diha unya sa kataposang paghukom kita pagahukman sebo sa atong binuhatan ug bulahan ang nagatuman diha sa espirituhanon nga pagpakaon sa kalag pinaagi sa mga pag-ampo kay mao man unya kini ang atong mapakita diha sa Dios Amahan.