Ang Sambingay Mahitungod Sa Magpupugas

MATEO 13: 1~9

13 • 1 Nianang adlawa mibiya si Jesus sa balay ug milingkod sa daplin sa lanaw. 2 Sanglit may daghang tawo nga nang-lingkod ug nag-alirong sa atubangan ug sa libot niya, miluan siya sa sakayan ug milingkod samtang ang tibuok panon sa katawhan nagba-rog sa lapyahan. 3 Misulti siyag mga sambingay sa daghang butang.

4 Si Jesus miingon: “Ang mamumu-gas miadto sa uma aron pagpamugas. Sa pagsabod niya sa binhi, ang uban nahulog sa daplin sa dalan ug gipa-nuhak sa mga langgam. 5 Ang uban sa may mga bato diin dyotay rag yuta. Miturok dayon ang binhi, kay ang yuta mabaw ra man. 6 Apan sa pagsilang sa adlaw ang mga tanom nalaya, kay wala may gamot. 7 Ang uban nahulog sa kasampinitan. Ang mga sampinit milabong ug nalandongan ang binhi. 8 Ang uban nahulog sa maayong yuta ug namungag 100 ka pilo ang uban, ang uban 60, ug ang uban 30. 9 Kon may dalunggan mo, pamati!”


PAGPAAMBIT SA MENSAHE:

Ang maong ebanghelyo naghisgot diha sambingay sa pagsabod sa humay diin gipanag-ingnan kini sa pagsabwag nga pagpamati sa pulong sa Dios diin kadtong wala gayud makaila sa Dios diretso nga milahos sa ilang dalunggan apan ang pipila usab nga miila kang Kristo Jesus ug midawat ug mitoo as mensahe apan taphaw lamang kini ug dili gayud makalungtad ug dugay ug diin kadtong binhi nga natagak sa maayong yuta mao kadtong mga pulong sa Dios nga nasawod gayud sa duha ka dalunggan ug gipatidlom sa kasingkasing ug giamomahan ug gipapuyo isip kabahin na sa kinabuhi.

Mao kini ang pulong sa Dios nga gibilin kanatong iyang mga katawhan diin naglahi-lahi ang pagdawat ug pagtratar niini. Kay matod pa sa pulong sa Dios daghan ang iyang gitawag diha sa nagkalainlaing pagtulon-an diin lahi-lahi usab ang ilang pagsimba as Dios apan dili ang tanan nga nagasimba ug nagatawag kaniya Dios ko, makasulod sa iyang gingharian kundili kadto lamang nagasunod ug nagatuman sa iyang kabubut-on.

Usa ra ang Dios usa ra ang iyang balaang kasulatan apan lah-lahi ang pag-interpret niini, apan bisag-unsaon nato sa pagpabarog sa maong mga pagtulon-an dili kini maoy makaluwas kanato apan himoon lamang nato kining giya diha sa pagpakabuhi nga maligdong ug ikahimuot sa Dios. Diin matod pa diha sa ubang sinulat nagaingon nga ang mga pinili nga katawhan sa Dios, dili lang kay magalingkod lamang ug magahulat sa pagbalik sa anak sa Dios, kundili, makasinati gayud sila sa mga pagsulay diin sama sa bulawan nga ipaagi sa kalayo aron makita ang kapuro niini nan kitang tawo mao usab, sulayan kita diha mismo sa atong pagtulun-an nga gibarugan ug diha sa atong pagpakabuhi niining kalibutan diin atong masinati nag mga paglutos, kapit-os ug mga kasakitan diin walay lain nga tugbang o sulosyon niini mao ra gayud ang mga pag-ampo kay diha sa hinay-hinay ug kanunay nga mga pag-ampo ang imposible mamahimo nga posible.

Buot lamang nga ipasilsil sa Dios diha sa atong kaugalingon nga ang iyang mga tinawag ug pinili nga katawhan samtang nagkinabuhi pa kanunay gayud nga pagapili-an diha sa mga pagsulay aron pagsuta sa kamatinud-anon niini. Kay matod pa ang dalan ngadto sa kaluwasan sa atong kalag ngadto sa kinabuhing dayun, nagpasbot sa kalisod niini diin diha sa atong pakinabuhi niing kalibutan ato na kining gipasinati, diin ginaingon anga bakilid, tunokon ug batohon ang dalan paingon ngadto sa gingharian sa Dios ug diotay ra ang nagaagi niini ug mas diutay ang milahos ngadto sa tumoy, diin mao na kini nga pagtulon-an nga atong gibarugan nga puno sa mga pagpanlutos.

Ang dalan paingon sa kalaglagan sa atong kalag daghan ang nagapangagi niini diin magahob kini masaba ug masadya diin mao na kana ang mga kahilayan diha sa palibot, apan bulahan pa ang atong mga kaigsoonan nga anaa diha sa palibot kay aduna pay pasaylo ang Dios diha kanila tungod kay inosente pa sila sa kamatuoran, apan kita nga nakasuhid ug nakatukib niining maong pagtulun-an sa higayon nga motalikod kita niini nan wala lay pasaylo ang Dios para kanato.