Mga Kinabuhi Nga Nausab

1 PEDRO 4: 1 ~ 6

1 Busa, maingon nga si Cristo miantus diha sa lawas, sangkapi ninyo ang inyong kaugalingon sa samang tinguha, kay bisan kinsa nga magaantus diha sa lawas nakahunong na sa pagpakasala, 2aron kamo magkinabuhi sulod sa panahon nga nahibilin pa sa lawas dili na tungod sa pagbuot sa tawhanong mga pangibog kondili tungod sa pagbuot sa Dios. 3Kay kadtong panahona nga miagi igo na alang sa pagbuhat sa buot ipabuhat kaninyo sa mga Gentil, sa paggawi sa kaulag, pangibug, huboghubog, hudyaka-bahakhak sa kombirahan, sinumsumay, ug sa gidili nga pagsimbag mga diosdios.

4 Sila nanghitingala nga kamo karon dili na man kmakighogoyhogoy uban kanila sa samang pagpatuyang, ug kamo ila nang pagapasipad-an; 5apan kini sila magahatag ra unyag husay ngadto kaniya nga andam sa paghukom sa mga buhi ug sa mga patay. 6Kay kini mao ang hinungdan ngano nga ang Maayong Balita giwali hangtud ngadto sa mga patay, aron nga bisan tuod sila nahinukman na diha sa lawas ingon sa mga tawo, sila mabuhi sa espiritu ingon sa Dios.

PAGPAAMBIT SA MENSAHE:

Ang maong ebanghelyo nagpamatuod lamang nga buhi ang Dios nga si Jesu Cristo, diin siya ang Dios sa mga buhi kay ang tanan nga mitoo ug misunod kaniya mahatagan sa kinabuhi nga walay katapusan. Diin kung ania na kita niining kamatuoran nga tinago nan barugan ta ang atong pagtulon-an kay matod pa sa mensahe sa Dios Amahan daghan ang iyang pinili nga katawhan diha sa lain-laing nga pagtulon-an, diin lahi-lahi usab nga mga proseso sa pag-ampo nga sa ato pa dili lang ang pagtulon-an nga imong gibarugan ang adunay kaluwasan ang tanan nga pagtulun-an aduna gayuy susama nga kahigayunan sa pagkaluwas.

Nagpasabot lamang ogsoon nga dili ang imong pagtulun-an ang gitan-aw sa Dios didto unya sa iyang katapusang paghukom apan ikaw mismo nga taglawas maoy manubag diha sa imong kaugalingon, diin sa walay pagpihig ug pagpabor kitang tanan mag-atubang gayud sa tukmang silot sibo sa atong kasal-anan. Niining siglo nato karon diin halapad pa ang pasensya sa Dios, ug mao usab kini ang panahun diin kanunay kitang moduol ug modangop kaniya diha sa mag pag-ampo ug pangaliya diin anaa pa ang kalooy ug pagpasaylo sa Dios diha sa atong kasal-anan.

Mao na kini ang higayun diin ato nang ihikling ang mga tawhanon nga mga kailibgon, ato na nga tagaan ug lugar ang Dios diha sa atong dughan ingon nga atong manluluwas. Kinahanglan ang adlaw-adlaw nga pag-ampo , pinaagi sa Santos nga rosaryo, ug atong ihalad ang atong kaugalingon ngadto kaniya pnaagi sa pagbalaan ug sa pagpuasa sa pagpakasala. Hapit na moabot ang maong pagbalik sa Dios diin wala kita makahibalo kun kanus-a, kay matod pa sama kini sa kawatan nga mtungha lang ug kalit diha sa imong paghinanok o as imong pagtrabaho.