Si Adan Ug Si Cristo

ROMA 5 : 12~21

12Busa, maingon nga ang sala misulod sa kalibutan pinaagi sa usa ka tawo ug ang kamatayon misulod pinaagi sa sala, ug nga tungod niini ang kamatayon mikuyanap ngadto sa tanang mga tawo sanglit ang tanang mga tawo nakasala man-- 13hinoon ang sala diha na sa kalibutan sa wala pa ang kasugoan, apan ang sala dili pagaisipon diin wala ang kasugoan. 14Bisan pa niini, sukad kang Adan hangtud kang Moises ang kamatayon naghari sa katawhan, bisan pa sa mga tawo kinsang mga pagpakasala dili sama sa paglapas ni Adan. Si Adan maoy usa ka hulagway niadtong miabut sa kaulahiay.

15Apan ang gasa nga walay bayad lahi ra kaayo sa kalapasan. Kay kon daghan ang nangamatay tungod sa paglapas nga nahimo sa usa ka tawo, ngadto sa daghan gikapadagaya sa labi pa gayud ang grasya sa Dios ug ang gasa nga walay bayad diha sa grasya niadtong usa ka tawo nga si Jesu-Cristo. 16Ug ang gasa nga walay bayad lahi ra kaayo sa misangpot sa pagpakasala niadtong usang tawo. Kay ang hukom nga midason niadtong usa ka paglapas nagdalag silot, apan ang walay bayad nga gasa nga midason sa daghang mga paglapas nagadalag pagkamatarung.

17Kon tungod sa paglapas nga nahimo sa usa ka tawo ang kamatayon mihari pinaagi sa maong tawo, sa labi pa gayud, pinaagi sa usang tawo nga mao si Jesu-Cristo, ang managpakadawat sa kadagaya sa grasya ug sa gasa nga pagkamatarung nga walay bayad magahari diha sa kinabuhi. 18Busa, maingon nga ang paglapas nga gihimo sa usa ka tawo misangpot sa pagkahinukman sa silot sa tanang mga tawo, mao man usab, ang buhat sa pagkamatarung nga gihimo sa usa ka tawo mosangpot ngadto sa hukom sa kagawasan ug ngadto sa kinabuhi alang sa tanang mga tawo.

19Kay maingon nga pinaagi sa pagkamasupilon sa usa ka tawo daghan ang nahimong makasasala, mao man usab nga pinaagi sa pagkamasinugtanon sa usa ka tawo daghan ang mahimong matarung. 20Ang kasugoan misaliut-ot pagsulod aron sa pagpadagsang sa kalapasan; apan diin gani midagsang ang pagpakasala, ang grasya milabi pa hinoon usab sa pagdagaya, 21aron nga maingon nga ang sala mihari diha sa kamatayon, ang grasya usab pinaagi sa pagkamatarung magahari ngadto sa kinabuhing dayon pinaagi kang Jesu-Cristo nga atong Ginoo.

PAGPAAMBIT SA MENSAHE:

Ang maong ebanghelyo naghisgot sa kasal-anan ni Adan diin gipalayas sila sa paraiso ug ang maong kasal-anan nagmugna ug kamatayon sa duha ka aspeto. Una kamatayon isip silot diha sa ilang pagpakasala ug ang ikaduha mao ang kamatayon nila diha sa kahimayaan sa Dios nga gihatag ngadto kanila diha sa paraiso, diin gisirahan na ang paraiso para kanila ug magpakabuhi sila nga tinunglo sa Dios diin paagasan gayud sa singot ug dugo ang ilang pagakan-on sa matag-adlaw. Mao kini nga sala ang gihisgutan diha sa balaang kasulatan nga sala nga panulondon diin kitang tanan katawhan dinhi sa yuta pagkatawo palang daan nang nagtangag sa maong salaod. Ang mga katawhan niadtong panahun ni Adan paingon kang Moises nagpatuyang diha sa mga tawhanon nga kasal-anan diin wala pay klarong balaod niadtong panahuna ug diin pipila pa lamang usab ang nakakita o gipakita sa kamatuoran.

Si Jesu Cristo isip anak sa Dios nga nagpakatawo maoy ginaingon nga ikaduha nga Adan nga nahiabot dinhi sa kalibutan, apan wala siya magagikan sa abog apan nagagikan siya sa lalang sa espiritu santo ug gitisok diha sa sabakan ni birhen Maria. Si Jesus maoy tubag sa mga panagna sa mga karaang propeta diin siya isip mesiyas o anak sa Dios maoy moluwas kanatong tanan diha sa mga kasal-anan.

Usa kini ka pagpasinati sa gahum ug kabubut-on sa Dios niadtong panahuna diin kadto lamang linamdagan as giya sa espitu santo sa Dios ang nakaapas ug mitoo sa maong tinago nga kamatuoran. Ang mga maalamon niadtong panahuna sirado na ang ilang utok diha sa pagdawat sa bag-ong doktrina diin para kanila ang Dios sa ilang katigulangan nga maoy ilang namat-an ug buot mao ra gayud ang makaluwas kanila, ug kun aduna man ugaling laing Dios nan kana usa lamang ka pagpatoo-too.

Si Adan nagagikan sa abog ug sa abog usab mopauli. Si Jesu Cristo nagpakatawo apan Dios nga matuod ug bugtong manunod sa trono sa langit, diin iyang gipakita ang kabubut-on sa Dios Amahan diin siya nagpakaubos sa iyang kaugalingon ug mitipon sa mga masa o ordinaryong katawhan ug didto siya nagsilbi ug nagpaulipon diha sa pagtudlo sa kamatuoran ug sa paghatag ug milagro sa mga katawhan.

Iyang gipakita ang bulawanon nga pagtulon-an didto sa langit diin ang pinakaubos dinhi sa yuta maoy taas didto sa langit. Iyang gitudlo ang pagtulon-an sa pagsakripisyo dinhi sa yuta, pinaagi sa pagpangadye, pagbalaan ug pagpaubos diin maoy gusto niyang sundon sa iyang mga sumosunod aron makatamak sila didto sa iyang gingharian.