Ang Kahayag Sa Lawas

LUCAS 11: 33~36

33 Walay magdagkot og suga aron tagoan. Hinunoa, ipahimutang ni sa tungtonganan aron ang manganhang katawhan makakita sa kahayag.
34 Ang mata suga sa lawas. Kon ang mata klaro kaayog tinan-awan, ang tibuok pagkatawo matabangan tungod sa kahayag. Kon ang panan-aw dili maayo, ang tibuok pagkatawo mawad-an sa kahayag. 35 Busa, pagmatngon nga ang kahayag sa sulod nimo dili makangitngit. 36 Kon ang tibuok mong pagkatawo midawat sa kahayag ug walay bahin ini nga nangitngitan, mapuno ka sa kahayag sama nga ang sanag nga siga sa lampara nagdan-ag nimo.

PAGPAAMBIT SA MENSAHE:

Ang maong ebanghelyo naghisgot diha sa paggamit sa hiyas o gasa nga gihatag sa kahitas-an. Sama sa kahayag nga atong nakit-an pinaagi niining tinago nga kamatuooran diin kun natukib o natugkad na nato kini nan pakasamahon ta kini nga maoy modan-ag diha sa atong kaugalingon nga mga binuhatan. Sa ato pa magpuyo ug maglihok kita sumala sa kabubut-on sa Dios diin atong ipahari ang kalinaw panagdait ug ang pagtuman sa kasugoan sa Dios.

Diin sayop nga pagtulon-an nga maayo lang kita mosulti ug mohatag sa ebanghelyo sa mga pulong sa Dios apan ang binuhatan hiwi lang gihapon diin kanunay gihapon molingi sa mga kalibutanon nga kailibgon. Puy-an ta ang kinabuhi nga daw sama sa langyaw niining kalibutana diin ha-om didto sa gingharian sa Dios kaysa magpakabuhi nga buhong sa tawhanong kahilayan ug mga kailibgon apan ayran didto sa gingharian sa langit.

Dili kini ang atong matuod nga pinuy-anan, diin aduna pay kinabuhi human niini diin bulahan nga atong masabtan ang tanan nga katuyu-an sa Dios diha sa atong pagpakabuhi diin matod pa ang tawo usa ka balaan nga binuhat diin nagpakasala dinhi sa ibabaw sa yuta, kay iyang gipalabi ang mga awhag diha sa iyang palibot ug mga tawhanon nga impluensya sa iyang katilingban nga gibarugan.

Mas maayo atong gidan-ag diha sa atong lawas ug kalag ang mga pagtulon-an ni Jesus diin mamahimo kitang ehemplo diha sa atong pamilya ug mga paryente pinaagi sa pagtuman sa mga kabubut-on ug pagtulon-an sa Dios. Kay matod pa sa balaang kasulatan ug sa mag mensahe sa Amahang Dios nagaingon: Usa lamang sa matagpamilya ang nagaampo diri kanako nan bulahan kay luwason ko ang tibook pamilya.

Kay matod pa ang tawo nga mainampoon ug sa kanunay nga naagasunod sa Dios wala pay kasiguro-an nga maluwas ang iyang kalag, nan unsa na kaha ang dili gayud magaampo ug wala motuo ksa Dios . Nagpamatuod lamang nga ang kaluwasan sa kalag grasya kini o gasa gikan sa Dios ug dili kini premyo o ganti gumikan sa maayong buhat, aron sa ingon walay mkapasigarbo diha saatubanagn sa Dios nga siya naluwas pinaagi sa maayong buhat.