1 PEDRO 4: 12 ~ 19• 12 Pinanggang katawhan, ayawg katingala nga gisulay mo sa kalayo; dili ni talagsaon. 13 Hinunoa, angay mong malipay nga makaambit sa mga pag-antos ni Cristo. Sa adlaw nga ang iyang Himaya ipadayag, hingpit pod ang inyong pagmaya. 14 Bulahan mo kon giinsulto sa ngalan ni Cristo. Ang Espiritu sa Himaya mikunsad ninyo. 15 Sa akong hunahuna walay kinahanglang mag-antos tungod sa pagkamamumuno, pagkakawatan, pagkakriminal o pagkahilabtanon sa uban. 16 Apan kon may nag-antos tungod sa pagkakristyano, ayaw siyag pakaulawa. Hinunoa, pahimayaa siya sa Diyos.
17 Ang panahon sa paghukom miabot na ug nagsugod sa balay sa Diyos. Kon ang sinugdan ini makahasol pag-ayo, unsay sangpotan sa wala motoo sa Ebanghelyo? 18 Kon ang tarong igo lang maluwas, unsay mahitabo sa makasasala ug sa wala motoo? 19 Busa, kon nag-antos mo sumala sa kabubut-on sa Diyos, isalig ang kaugalingon sa Matinud-anong Magbubuhat, ug padayon pagbuhat sa tarong.
PAGPAAMBIT SA MENSAHE:
Ang maong ebnghelyo naghisgot sa mga pagsulay nga moabot sa atong kinabuhi diin matod pa dili kini talagsaon ug sa ingon kanunay kining masinati sa maong mga sumosunod sa kristuhaong pagtulon-an, diin nagpasabot ang mga pulong sa Amahan nga naga-ingon daghan ang iyang mga tinawag nga katawhan nga daw sama sa balas sa kabaybayonan dinhi sa ibabaw sa kalibutan diin pipila pa lamang usab ka hagkom ang iyang gipaabot didto sa iyang gingharian.
Diin midugang siya sa pag-ingon nga ang iyang mga tinawag ug pinili nga katawhan dili lang kay maglingkod ug maghulat sa iyang pagbalik, apan kini sila pagasulayan gayud sa Amahan aron masuta kun asa kutob ang ilang pag-ila sa iyang gahum ug pagbuot. Kay matod pa pagasulayan man gain ang bulawan kun kini puro ba pinaagi sa kainit sa kalayo, nan sama usab sa tawo diin sulayan usab sa mga kalisdanan aron siya mamahimong bulawan sa panan-aw sa Dios.
Kay nahitala na daan diha sa balaang kasulatan nga nagaingon kung gusto sa tawo nga ilhon ug himayaon didto sa gingharian sa Dios nan puy-i ang kinabuhi nga tugob sa pagpa-ubos ug pagpasakit dinhi sa yuta, pas-ana ang imong krus sa kinabuhi ug sunod sa mga pagtulon-an ni Jesus.
Nagaingon usab ang laing bahin sa balaang kasulatan nga bulahan ang mga katawhan nga nakaambit diha sa mga kasakitan ni Jesus didto sa krus kay makaambit usab sa iyang himaya sa pagkabanhaw didto sa langit.
No comments:
Post a Comment