Pailob Ug Pag-ampo

SANTIAGO 5: 7~20

7 Busa, pailob mo, mga igsoon, hangtod sa pag-abot sa Ginoo. Sud-onga ang mag-uuma nga nagpaabot sa bililhong bunga sa yuta. Naghulat siyang mahinangpon, apan mapailubon, sa ulan sa tingpugas ug sa ulan sa dili pa ang ting-ani. 8 Paghulat sab mo ug dasiga ang kaugalingon, kay hapit na moabot ang Ginoo.

9 Mga igsoon, ayawg away-away sa usag usa aron dili mo silotan: Tan-awa, naa na sa pultahan ang maghuhukom. 10 Himoa alang ninyo nga sumbanan sa kamapailobon ang pag-antos sa mga propeta nga nanagna sa ngalan sa Ginoo. 11 Sud-ongag naunsa nga ang mapailobon gitawag na karon og balaan. Nadunggan ninyo ang pag-antos ni Job ug nasayrag giunsa siya pagtagad sa Ginoo sa kaulahian. Ang Ginoo maluluy-on, nagpakita sa dakong kaluoy.
12 Labaw sa tanan, ayawg panumpa; ayawg panumpa sa langit ug sa yuta. Ayawg batasana ang pagpanumpa. Himoa nga ang imong Oo, Oo gyod; ug ang dili, dili pod. Basig pakasad-on ka ug hukman.

• 13 May usa ba ninyo nga nawad-an sa kadasig? Paampoa siya. May nalipay ba sa inyong kauban? Paawita siya sa Diyos. 14 May nasakit ba? Ipatawag ang mga magulang sa Simbahan. Iampo siya ug hilogan sa lana sa ngalan sa Ginoo. 15 Ang pag-ampo nga gilitok sa pagtoo makaluwas sa masakiton. Bayawon siya sa Ginoo ug kon nakasala, pasayloon.

• 16 Pangompisal sa usag usa sa inyong mga sala ug pag-ampo alang sa usag usa aron mangaayo mo. Gamhanan ang pag-ampo sa tawo nga tarong basta molahutay siya. 17 Tawo lang si Elias nga sama nato. Apan dihang mainiton siyang nag-ampo nga dili moulan, wala moulan sa yuta sulod sa tulo ka tuig ug tunga. 18 Unya, nag-ampo siyag usab. Mipaulan ang langit, ug ang yuta mihatag sa abot.

19 Mga igsoon, kon may mahisalaag ninyo sa kamatuoran, ug may makapabalik pod niya sa maong kamatuoran, 20 makapaniguro mo: Ang makapabalik sa makasasala gikan sa sayop nga dalan makaluwas sa iyang kalag sa kamatayon. Pasayloon siya sa daghang kasal-anan.

PAGPAAMBIT SA MENSAHE:

Ang maong ebanghelyo naghisgot sa pagpailob ug sa pag-ampo, diha sa atong pagpakiluoy sa Ginoo diha sa atong gipangayo kaniya anaa gayud ang mga paglutos ug pagsukod kun unsa kamatinud-anon diha sa atong pagsunod sa Dios. Diin matod pa sa pulong sa Amahan., daghan ang iyang katawhan nga sama sa balas sa kabaybayonan apan pipila pa lang kahakop ang iyang nadala sa iyang gingharian.

Apan ang mga tinawag niya nga katawhan wala magpasabot nga magalingkod-lingkod lamang ug magahulat sa pagbalik sa anak sa Dios , apan sila makasinati gayud sa mga pagsulay diha sa ilang kinabuhhi. Kay matod pa sulayan man gani ang bulawan kun unsa ang kapuro niini, diha sa naglagiting nga kainit sa kalayo nan sama usab sa mga sumosunod ni Kristo Jesus , sila sulayan usab diha sa mga paglutos, pagbiay-biay ug sa mga kasakitan sa kinabuhi, diin bulahan kun malatas nila ang pagsulay ug magapabilin sila diha sa atubangan ni Kristo nga nagabarog ug nagpabilin nga madasigon diha sa pagtuo kay maila ang himaya nga walay kataposan.

Matod pa sa balaang kasulatan, bulahan ang mga katawhan nga nakaambit sa mga kasakit ni Kristo didto sa krus kay makaambit usab sila sa iyang himaya sa pagkabanhaw didto sa langit. Nan sa ato pa mga igsoon diha sa pagsunod nato sa kabubut-on sa Dios dinhi sa yuta makasinati gayud kita sa kalisod ug kapit-os matag karon ug unya diin maoy makapalig-on diha sa mga pagsulay sa atong kinabuhi.

Kay matod pa lisod ang pag-agi paingon sa ganghaan sa gingharian sa Dios diin anaa ang pagkabakilid . Pagkatunokon, ug pagkabato-on niini diin maihap lamang sa tudlo ang molahutay ug makalahus sa langit, Nan kanang mga dalana mao na kining pagtulon-an nga atong gibarugan diin anaa ang mga pagyubit, paglutos ug mga kasakitan sa kinabuhi, apan bulahan kun malatas ang tanan kay adunay katumanan ang giandam sa Ginoo.