Kinabuhi Nga Minandoan Sa Espiritu

ROMA 8: 1 ~ 17

8 • 1 Wala nay dakong panagsungi alang sa nagpuyo diha ni JesuCristo, 2 kay diha niya ang Balaod sa Espiritu sa kinabuhi nga nagluwas nako sa balaod sa sala ug kamatayon. 3 Walay epekto ang balaod, kay ang unod wala man mosanong. Unya, ang Diyos nga naglaraw pagpukan sa sala, mipadala sa kaugalingong Anak nga daw tawong makasasala aron pagbuntog sa sala ining tawhanong kahimtang. 4 Gikan adto, ang kahingpitan nga tumong sa Balaod matuman na diha nila nga naglakaw dili sa dalan sa unod kondili, sa Espiritu.

• 5 Ang naglakaw sumala sa unod hilig sa mga butang sa unod; ang gidumala sa espiritu hilig sa mga butang sa espiritu. 6 Ang unod nagpunting sa kamatayon; samtang ang espiritu, sa kinabuhi ug kalinaw. 7 Gitinguha sa unod ang supak sa Diyos, bisan gani sa balaod sa Diyos. 8 Busa, ang naglakaw sumala sa unod dili makapahimuot sa Diyos.

9 Apan dili mo ubos sa pagdumala sa unod kondili, sa espiritu kay ang Espiritu sa Diyos naa man ninyo. Kon wala pa, dili unta mo masakop ni Cristo. 10 Apan kon si Cristo naa ninyo, bisag ang lawas mamatay isip sangpotanan sa sala, ang espiritu magpabiling buhi kay grasya man ni sa Diyos. 11 Kon ang Espiritu sa mibanhaw ni Cristo sa minatay naa ninyo, ang mibanhaw ni Cristo mobanhaw sab ninyo. Iya ning buhaton pinaagi sa iyang Espiritu nga nagpuyo diha ninyo.

12 Unya, mga igsoon, biyaan ta ang unod ug dili na magpuyo sumala ini. 13 Kon dili, mamatay ta. Hinuon, maglakaw ta sa Espiritu ug patyon ang mga buhat nga lawasnon aron mabuhi ta. 14 Ang naglakaw sa Espiritu sa Diyos, mga anak sa Diyos. 15 Mawala na ang kahadlok, kay wala man mo makadawat sa espiritu sa kaulipnan. Ang inyong nadawat mao ang Espiritu nga naghimo ninyo nga mga anak. Matag sangpit nato: “Abba, Amahan,” 16 ang Espiritu nagpasalig sa atong espiritu nga 17 mga anak ta, ug mga sumusunod. Maato ang kabilin sa Diyos nga paambitan nato ni Cristo; kay kon nag-antos ta karon uban niya, moambit sab ta sa Himaya uban niya.

PAGPAAMBIT SA MENSAHE:

Ang maong ebanghelyo naghisgot diha sa pagkinabuhi nga ubos sa giya sa espiritu santo, diin mao man kini ang usa sa tahas ni Jesu Cristo sa iyang mga katawhan ug sa iyang mag sumosunod kun unsa ang kabubut-on sa Amahan. Ang pagkinabuhi nga ubos sa landong sa espiritu santo maoy pagpakabuhi nga sama sa langyaw niining kalibutan apan haom didto sa iyang gingharian, diin bulahan kay maato ang kinabuhing dayon nga gisaad ni kristo.

Mas bali pa nga magkinabuhi kita nga langyaw dinhi sa ibabaw sa yuta apan ha-om didto sa gingharian sa Dios. Kay bulahan nga maandam nato ang atong espirituhanon nga pagkinabuhi kay mao man kini ang importante human niining kalibutana, diin aduna pay kinabuhi human niining atong tawhanon nga pagpuyo. Diin matod pa diha sa atong pagtalikod niining kalibutana, mabilin ang atong tawhanon nga lawas ug motipon sa abog, ang atong espiritu mobalik ngadto sa Dios apan ang atong kalag maoy maghulat sa kataposang paghukom diin maoy mangatubang puhon sa Amahan diin bulahan kun ato ng naandam ang tanan kay aduna na kitay ikapakita didto sa katapusang panudya.