Ang Anak Nga Nawala

LUCAS 15:11~32

11 Miingon si Jesus: “May tawo nga may duha ka anak nga lalaki. 12 Ang manghod miingon sa amahan: ‘Tay, hatagi ko sa bahin nako sa katigayonan.’ Busa, gibahin sa amahan sa duha ka magsoon ang kabtangan. 13 Human sa pipila ka adlaw, gitigom sa manghod ang iyang bahin ug mipanaw sa layong dapit ug nag-usik-usik sa bahandi sa hagokang kinabuhi. 14 Sa nahurot na ang tanan, may dakong gutom didto ug nagsugod ang iyang kawad-on. 15 Nagsuroysuroy siya sa pagpangitag trabaho ug nadawat nga tig-atiman sa mga baboy sa uma. 16 Hapit na siya mokaon sa pasaw sa baboy aron masudlan ang nagkutoy niyang tiyan. Bisag gamay, walay mohatag niya.

17 Adtong tungora nakaamgo siya ug namalandong: ‘Ang mga sulugoon sa balay sa akong amahan buhong sa pagkaon, samtang hapit na ko mamatay sa gutom. 18 Mobarog ko, mopauli sa akong amahan, ug ingnon ko siya: ‘Tay, nakasala ko sa Diyos ug nimo. 19 Dili ko takos nga tawgog imong anak. Himoa ko nga usa sa sinuholan mong sulugoon.’ 20 Mitindog siya ug miadto sa amahan. Layo pa gani, nakit-an na siya sa amahan nga nahinuklog niya, ug nagdagang mitagbo sa anak nga gigakos ug gihagkan. 21 Miingon ang anak; ‘Amahan, nakasala ko sa Diyos ug nimo. Dili na ko angayng ilhon nga imong anak.’

22 Apan gisangpit sa Amahan ang sulugoon ug giingnan: ‘Pagdali, pagkuhag sapot ug ilisi siya unya, singsingi ug sapatosi. 23 Dad-a dinhi ug ihawa ang linaming nga nating baka. Magsalusalo ug magsadya ta, 24 kay kining akong anak namatay ug nabuhig usab, nawala ug nakit-an.’ Ug gisugdan niya ang kasaulogan. 25 Adtong tungora ang magulang didto sa uma. Sa pag-uli niya, sa duol na siya sa balay, nakadungog siyag honi ug panagsayaw. 26 Gisangpit niya ang usa sa mga sulugoon ug gipangutana sa hitabo. 27 Gitubag siya: ‘Mipauli ang imong igsoon. Busa, gipaihaw sa imong amahan ang linaming nga nating baka, kay nahibalik siya nga buhi ug hilwas.’

28 Nasuko ang magulang sa gibuhat sa amahan ug nagdumili pagsulod. Migawas ang amahan ug nakigsulti niya. 29 Mitubag siya: ‘Daghan ang katuigan nga nagsilbi ko nimo. Bisag kausa wala ko mosupak sa imong sugo, apan sukad, wala ko nimo hatagi bisag usa ka kanding nga kasalusalohan nako sa akong mga barkada. 30 Sa pag-abot hinuon ining imong anak nga nag-usik-usik sa katigayonan nga giwaldaswaldas niya sa mga puta, giihawan mo siya sa linaming nga nating baka.’ 31 Mitubag ang amahan sa pag-ingon: ‘Anak, kauban ta sa tanang panahon ug nakaambit ka kanunay sa tanang akoa. 32 Angay lang nga magsaulog ug magsadya ta, kay ang imong igsoon nga namatay, nabuhi; nga nawala, apan nakaplagan.”

PAGPAAMBIT SA MENSAHE:

Ang maong ebanghelyo maoy sambingay tali sa Diyos ug kanato nga iyang mga katawhan nga sa higayon nga kitang iyang mga tinawag ug pinili nga katawhan mahisala-ag sa dalan nga iyang gipasubay kanato nan pangitaon gayud kita . Matod pa diha sa ubang sinulat nagaingon nag bisan ang mga anghel sa kalangitan magasaulog ug magakumbira agigpasalamat kun adunay usa lamang ka binuhat nga mobalik sa sabakan sa Diyos gikan sa pagkasalaag niini.

Ingon niana ang pagpasidungog sa Diyos kanatong mga nahisallaag kay matod pa diha sa balaang kasulatan 2 Pedro 3: 9 nagaingon nga dili maglangan ang Diyos sa iyang gisaad nga pagbalik sumala sa gihuna-huna sa uban apan nagapailob siya kanato kay maoy iyang gusto nga sa dili pa Siya mobalik magahinulsol ang tanan sa ilang mga sala aron walay isa sa iyang mga katawhan nga malaglag.

Ingon niana ang kaimporatante sa tawo diha sa atubangan sa Diyos diin atong mapalandunagn nga iyang gipakanaog ang iyang bugtong anak aron sa pagluwas kanato pinaagi sa iyang kamatayon sa krus diin mao kadto ang buhing halad sa atong manunubos aron malukat kita sa atong mga sala, Nga sa ato pa mga igsoon ang Diyos maoy nangita kanato ug dili nga kita maoy nangita kaniya.

Diin diha niining Tinagong Kamatuoran nga atong gibarugan mao gayuy gusto sa Diyos nga matag-usa kanato mamahimong buhing halad ngadto sa atong Diyos nga dili makita ug mahikap, ang Diyos ni Abraham ug Diyos ni Jacob. Susamang panag-ingnan ni Ginoong Jesu Cristo matod pa diha sa ubang sinulat sa nga kun nagasunod ka sa mga pagtulon-an nga gisangyaw ni Jesu Cristo nan magkinabuhi ka usab sama kang Jesu Cristo diin makaambit ka sa mga paglutos.

Atong himoong buhing halad ang atong lawas diin magapuyo kita nga langyaw niining kalibutan apan ha-om didto sa gingharian sa langit diin atong biyaan ang mga tawhanon nga kailibgon ug maoy atong isul-ob ang kinaiyahan sa espiritu santo nga anaa ang pagpaubos, pagpasakit ug ang kanunay nga mga pag-ampo. Kay mao gayuy importante sa tawo nga diha sa iyang mga paglutos nga hiambitan, iyang dawaton sa tumang pagpaubos kay matod pa sa pulong sa Diyos espiritu santo tukhi ang mga pagsulay sa mga pag-ampo kay anaa si Jesu Cristo nga manalipod kanimo.