Nakigsulti Si Jesus Sa Babayeng Taga-Samaria

JUAN 4:1~42

4 • 1 Nasayod ang Ginoo nga naka- dungog na ang mga Pariseo bahin niya. Ang mga tawo nag-ingon nga mas daghan ang nakabig ug nabunyagan niya kay ni Juan. 2 Hinuon dili si Jesus ang namunyag kondili, ang iyang mga tinun-an. 3 Busa, mibiya si Jesus sa Juda ug miadto sa Galilea. 4 Kinahanglang moagi siya sa Samaria. 5 Naabot siya sa syudad sa Samaria nga ginganlag Sicar duol sa yuta nga gihatag ni Jacob sa anak nga si Jose. 6 Atua didto ang atabay ni Jacob. Kay nagbaklay man, gikapoy siya pag-ayo. Busa, milingkod si Jesus sa daplin sa atabay. Hapit na maudtong tutok. 7 Unya, miabot ang babayeng taga Samaria aron pagsag-ob og tubig. Miingon niya si Jesus, “Paimna ra ko.” 8 ‘Niining higayona ang mga tinun-an didto sa lungsod, namalit og pagkaon. 9 Miingon ang babaye, “Taga Samaria ko, babaye pa gyod, ug Judio ka. Nganong mangayo ka nakog tubig nga mainom?” (Ang mga Judio ug ang Samariyanhon wala magkasinabtanay.)

10 Mitubag si Jesus, “Kon nahibawo ka pa sa Gasa sa Diyos! Kon nasayod ka pa og kinsay nangayo nimog tubig, mangayo gyod ka ug hatagan tikaw og buhing tubig.” 11 Mitubag ang babaye, “Nyor, wala kay timba ug lawom ang atabay. Hain man ang imong tubig nga may kinabuhi? 12 Labaw ka ba sa among katigulangan nga si Jacob? Siyay naghatag namo ining atabaya aron makapanginom ang mga anak ug kahayopan.”

13 Mitubag si Jesus, “Ang moinom ining tubiga uhawon pag-usab. 14 Apan ang moinom sa tubig nga akong ihatag dili na uhawon. Kay ang maong tubig matuboran diha niya nga mohatag og buhing tubig alang sa kinabuhing dayon” 15 Miingon ang babaye: “Nyor, hatagi ko ining tubiga aron dili na ko uhawon ug dili na moanhi aron pagkawos.” 16 Miingon si Jesus, “Lakaw, tawga ang imong bana unya, balik nganhi.” 17 Miingon ang babaye, “Wala koy bana.” Mitubag si Jesus, “Tinuod na, 18 kay kalima ka na maminyo. Ang gipuyo nimo dili mo bana. Tinuod ang imong giingon.” 19 Misumpay ang babaye:“Para nako propeta ka. 20 Sultihi ko: Ang among katigulangan nanganhi ining bukira aron pagsimba sa Diyos. Apan kamong mga Judio nag-ingon nga sa Jerusalem ra simbahon ang Diyos.”

21 Si Jesus miingon, “Babaye, toohi ko, moabot ra ang panahon nga kamo dili na mosimba sa Amahan ining dapita ni sa Jerusalem. 22 Kamong taga Samaria wala mahibawo sa inyong gisimba, samtang kaming mga Judio nakahibawo kinsay among gisimba, kay ang kaluwasan gikan sa mga Judio. 23 “Apan moabot ang panahon, ug karon nia na, nga ang matuod nga mosimba sa Amahan mosimba niya sa espiritu ug sa kamatuoran – nga gimbut-an sa Amahan. 24 Espiritu ang Diyos ug ang mosimba niya kinahanglang mosimba diha sa espiritu ug kamatuoran.”

25 Miingon niya ang babaye, “Nasayod ko nga moabot ang Mesiyas nga ginganlag Cristo. Inig-abot, tug-anan ta niya sa tanan.” 26 Si Jesus mitubag, “Ang nakigsulti nimo mao siya.” 27 Niining puntoha naabot ang mga tinun-an ni Jesus. Natingala sila nga nakigsulti siya sa babaye. Apan walay nakapangutana: “Unsay imong gipangita?” o, “Nganong nakigsulti ka niya?” 28 Unya, gibiyaan sa babaye ang iyang tadyaw ug mibalik sa lungsod. Didto giingnan niya ang mga tawo: 29 “Dali ug tan-awa ang tawo nga misulti nako sa tanan kong nabuhat. Dili ba siya si Cristo?” 30 Busa, namiya sila ug miadto niya
.
31 Sa kasamtangan ang mga tinun-an nangagda ni Jesus, “Magtutudlo, kaon na.” 32 Si Jesus mitubag, “May pagkaon ko, apan wala mo masayod ini.” 33 Ang mga tinun-an natingala: “May nagdala ba niyag pagkaon?” 34 Si Jesus miingon, “Ang akong pagkaon mao ang pagtuman sa kabubut-on sa nagpadala nako ug paghuman sa iyang gibuhat.

35 Dili ba, nag-ingon man mo nga may upat pa ka bulan una moabot ang ting-ani. Karon sultihan tamo: Tan-awa ang kaumahan, hinog na ang mga bunga ug maayo nang anihon. 36 Makadawat ang mangangani sa suhol ug tipigan nila ang abot alang sa kinabuhing dayon, aron malipayg dungan ang nagpugas ug ang nangani. 37 Tan-awa, tinuod ang panultihon nga lain ang magpugas ug lain ang mangani. 38 Gisugo tamo pagpangani sa wala ninyo hagoi. Lain ang naghago ug kamoy mabulahan sa ilang hinagoan
.
39 Daghan ang Samariyanhon adtong lungsora nga nanoo ni Jesus, kay ang babaye nag-ingon man, “Gisultihan ko niya sa tanan kong nabuhat.” 40 Sa pag-abot sa mga Samariyanhon, gihangyo nila si Jesus pagpabilin una uban nila. Busa, nagpabilin siyag duha ka adlaw 41 ug midaghan ang nanoo tungod sa iyang gisulti. 42 Unya, giingnan nila ang babaye, “Mitoo mi dili tungod sa imong gisulti kondili, tungod sa among nadungog, ug nakahibawo mi nga Manluluwas siya sa kalibotan.”

PAGPAAMBIT SA MENSAHE:

Ang maong ebanghelyo nga ngaingon 10, “Kon nahibawo ka pa sa Gasa sa Diyos! Kon nasayod ka pa og kinsay nangayo nimog tubig, mangayo gyod ka ug hatagan tikaw og buhing tubig.” 11 Mitubag ang babaye, “Nyor, wala kay timba ug lawom ang atabay. Hain man ang imong tubig nga may kinabuhi? 12 Labaw ka ba sa among katigulangan nga si Jacob? Siyay naghatag namo ining atabaya aron makapanginom ang mga anak ug kahayopan.”

Diin nagpasabot kini diha sa ubang pulong sa balaang kasulatan nga nagaingon, Siya ang Dalan ang kamatuoran ug ang kinabuhi, diin ang tubig nga atong mainom dili kini “literal” nga tubig kundili espirituhanon nga tubig diin dili na kita uhawon diha sa mga materyal nga mga butang diha sa mga tawhanong kailibgon kay Si Jesu Cristo mismo nga maoy tuburan sa tubig sa kinabuhi mao man ang anaa diha sa atong kasingkasing ug panumduman.

Kun atong isul-ob ang kinaiyahan sa espiritu santo nga maoy gisul-ob ni Jesu Cristo nan magkinabuhi kita nga mangindawaton, ug mainantuson diha sa mga pagsulay ug paglutos ug labaw sa tanan anaa kanunay ang atong pagpakig-istorya sa Diyos pinaagi sa mga pag-ampo. Ania pa kita dinhi niining kalibutana diin puno pa sa mga pagsulay ug mga tawhanong kailibgon ang palibot apan kun gidawat mo Si Jesu Cristo nga imong manluluwas nan panag-ingnan ang iyang mga buhat niadtong panahuna diin magpakabuhi kita nga sama sa langyaw niining kalibutaan apan ha-om didto sa iyang ginghari-an sa langit.

Matod pa diha sa ubang pulong nga nagkanayon kun nasayod pa unta kamo kun unsay atua didto sa gingharian sa langit nan dili na unta kamo mangaplag pa ug dugang bahandi niining kalibutana ug biyaan niniyo ang tanan ug maoy inyong siguroon kun unsaon paghiabot didto sa iyang gingharian sa langit.

Diha sa ubang sinulat naga-ingon Datu ang tawo kun kuntento na siya kun unsay anaa, Kay matod pa unsay may maarang sa tawo nga diha sa paghimugso niining kalibutana hubo man kitang daan ug inigtalikod nato niining kalibutana nan biyaan man nato ang tanan.Apan ang Diyos masinabuton nga Diyos nahibalo na siya sa umaabot natong huna-huna ug mga plano sa kinabuhi diin ang balaang kasulatan nagaingon…Unaha ang gingharian sa Diyos ug ang tanan nimong gipangayo ihatag ra kanimo.