Si Adan Ug Si Cristo

ROMA 5:12~21

• 12 Karon, ang sala misulod sa kalibotan pinaagi sa usa ka tawo. Pinaagi sa sala, ang kamatayon milukop sa tanang katawhan, kay nakasala man ang tanan.
13 Kay wala may balaod, dili sila makasulti mahitungod sa kamasupilon. Apan diha na sa kalibotan ang sala. 14 Apan naghari ang kamatayon nga walay pagpili diha nila gikan ni Adan ngadto ni Moises. Hinuon, ang ilang sala dili ang kamasupilon sama sa kang Adan – dili ni ang tinuod nga Adan, nagtagna ni sa laing moabot.

15 Busa, ang mga epekto sa gasa sa Diyos dili matupngan adtong sa sala. Nahibawo ta nga daghan ang nangamatay tungod sa sala sa usa ka tawo. Apan unsa pa kaha kadaghan ang grasya sa Diyos ug ang gasa nga gihatag sa katawhan pinaagi ining talagsaong tawo nga si JesuCristo. 16 Ang grasya sa Diyos milabaw kaayo sa sala. Ang kamasupilon nga mikondenar gihimo sa usa lang ka makasasala. Apan ang grasya sa Diyos magpasaylo sa kalibotan nga makasasala. 17 Kon mihari ang kamatayon tungod sa kamasupilon sa usa lang ka tawo, unsa pa kaha ang paghari ug pagkabuhi sa nakadawat sa grasya sa Diyos pinaagi sa tawo nga si JesuCristo.

18 Sama nga ang sala sa usa nagpahamtang og silot sa kamatayon alang sa tanan, nag-antos sab ang usa ug nakaangkon sa pasaylo ug kinabuhi alang sa tanan. 19 Ingon nga ang kamasupilon sa usa nakapahimo sa daghan nga makasasala, ang kamasinugtanon sa usa nagmakiangayon ug nagbalaan sa daghan. 20 Ang Balaod mismo nga gipaila sa kaulahiay, mipadagsang sa sala. Apan diin midagsang ni, milabaw kabuhong ang grasya. 21 Sama nga mihari ang kamatayon tungod sa sala, ang grasya sab maghari sa kaugalingong panahon, human ta namakiangayon ug nahigala sa Diyos, dad-on ta niya sa kinabuhing dayon pinaagi ni JesuCristo, atong Ginoo.

PAGPAAMBIT SA MENSAHE:

Ang maong ebanghelyo maoy pagpasabot lamang diha sa unang sinulat nga nagaingon nga nakasulod ang sala sa kalibutan tungod sa usa ka tawo. Matod pa diha sa libro sa Genesis gibuhat sa Diyos si Adan nga pareha ug panagway sa Diyos ug diha usab kang Adan gikuha ang iyang gusok ug maoy gihimo niyang kauban , iyang kapikas nga si Eba, diin didto sila sa Eden nanagpuyo apan natintal sila sa pagkaon sa kahoy sa kinabuhi nga maoy moabli sa ilang salabutan apan mamahimo silang adunay kamatayon,

Mao kini ang sala nga namugna sa atong unang mga ginikanan, nga matod pa pinaagi kanila nakasulod ang sala sa kalibutan, ug pinaagi kanila naghari usab ang kamatayon pinaagi sa sala, nan gikan kan Adan paingon sa kaliwatan ni Moises, gigamhan na sa sala ang kalibutan ug bisan pa kadtong mga umaabot pa nga mga kaliwatan makasasala na daan, wala pa mamugna ang balaod apan namugna na ang sala.

Apan ang ikaduha ug kataposang Adan nga gipaabot sa Diyos sa kalibutan wala magagikan sa abog kundili gikan siya sa lalang sa espiritu santo nga mikunsad ngadto sa sabakan ni Birhen Maria. Diha na siya sa wala pa ang kalibutan, Siya ang arkitekto nga tiglinagw sa Amahan sa dihang gibuhat nila ang kalibutan, ug diha na usab siya sa panahun ni Moises niadtong nabantog nga Exodus diin siya kadtong maong bata nga sa kanunay nagauban ug nanagiya sa mga bulohaton ni Moises. Siya ang pulong nga nagpakatawo ug mipuyo uban kanato. Siya ang bugtong anak sa Amahang Diyos , siya si Jesu Cristo.

Diha sa kasaysayan sa pagkatawo ni Jesu Cristo nagsugod usab ang kasaysayan sa ikaduhang kasabutan, diin matod pa sa ubang sinulat, wala na unta kinahanglana ang ikaduhang kasabutan kun wala pay mga kasaypanan ang unaang kasabutan nga sa ato pa kun wala pa makasulod ug maghari ang sala sa kalibutan nan dili na unta magpakatawo ang atong Ginoong Jesu Cristo aron sa pagluwas kanatong mga makasasala.

Matod pa, usa sa mga tahas ni Jesu Cristo sa iyang pagpakatawo sa kalibutan mao gayud ang pagpasabot sa mga kasugo-an sa iyang Amahang Diyos, aron pagpasabot sa mga kasugo-an ang gisangyaw ni Moises, nga napulo ka sugo sa Dios nga gisangyaw ni Moises naglangkob lamang kini ug duha ka sugo, una mao ang Paghigugma sa Diyos ug dili ka magbaton ug laing Diyos gawas kaniya , ug ikaduha mao ang paghigugma sa imong isigkatawo sama sa imong paghigugma sa imong kaugalingon, diin masupak nimo ang usa lang niining maong mga kasugo-an nan nasupak na usab nimo ang tanan nga kasugo-an sa Diyos.

Kay matod pa ang kasugo-an sa dios kasugo-an sa paghigugma, kay ang Dios nga atong gialagaran ug giampo-an Diyos sa Gugma. Sa ato pa ang tawo nga adunay gugma sa Dios ug sa iyang isigkatawo nan haduol sa gingharian sa langit. Mao kini ang gipakita nga sumbanan sa Diyos kanato, nga ang iyang pagpakatawo sa kalibutan mao gayud ang pagsunod sa tahas sa iyang Amahan tungod sa gugma sa Diyos kanato, Kay matod pa ang Diyos maoy nangita ug nagpaduol kanato ug dili kita maoy nangita Kaniya.