Ang Gikinahanglan Aron Mahimong Tinun-an

LUCAS 14: 25~33

25 Samtang nanglakaw ang daghan kaayong tawo kuyog ni Jesus, miatubang siya ug giingnan sila: 26 “Kon moari mo nako nga dili andam sa pagsalikway sa inyong gugma para sa inyong amahan ug inahan, asawa ug mga anak, mga igsoong lalaki ug babaye, ug bisan sa kaugalingon, dili mo maakong alagad. 27 Dili maalagad nako ang dili magpas-an sa krus sa pagsunod nako.
28 Unsay buhaton sa tawong magtukod og kamalig alang sa magbalantay sa uma? Di ba, molingkod una siya, kalkulohon ang gastos ug tan-awon kon may igo bang salapi sa paghuman ini? 29 Tingalig kataw-an lang siya kon mapahimutang niya ang sukaranan, apan dili mapatiwas. 30 Unya, makaingon sila: Kining tawhana misugod pagtukod, apan dili makahuman.
31 Ug kinsa mang haria nga makiggubat sa laing hari nga dili una molingkod aron hinuktokan kon sa 10,000 ka sundalo makabuntog ba siya sa 20,000? 32 Kon dili, magpadala siyag sinugo samtang layo pa sila aron pagpakig-areglo. 33 Sa samang paagi, dili maakong alagad ang dili mobiya sa tanang iyaha.

PAGPAAMBIT SA MENSAHE:


Ang maong ebanghelyo maoy pagpAsabot lamang, diha sa ubang pulong sa diyos nga nag-ulohan, nga kun gidawat mo si Jesu-Cristo nga imong manunubos, imong manluluwas ug imong Diyos nan maka-ambit ka gayud sa mga pagpanlutos. Kay mao kini ang kabubut-on sa Amahan diin panag-ingnan ang iyang bugtong anak nga manununod sa iyang trono ug maoy iyang gitahasan sa tanan apan iya usab gipakita ang sumbanan diha sa mga kasakitan ni Jesus gikan sa iyang pagpakatawo paingon sa iyang kamatayon sa krus.

Matod pa sa ubang pulong nga mag-antos aron ma-santos…Ang balaang kasulatan nagaingon nag kun gusto nimong himaya-on ug daygon didto sa gingharian sa langit nan puy-i ang kinabuhi nga puno sa mga pagpanlutos ug pagdaug-daug dinhi sa yuta, pas-ana ang imong krus sa kinabuhi ug sunod sa mga pagtulon-an nga gisangyaw ni Cristo, kay bulahan ka nga naka-ambit diha sa mga kasakitan ni Jesus diha sa krus kay maka-ambit ka usab sa himaya sa iyang pagkabanhaw didto sa iyang ginghari-an sa langit.

Sa ato pa mga igsoon ang kinatubuk-an gayud nga mensahe diha sa pagsunod sa pagtulun-an nga gisangyaw ni Jesus mao gayud pagsul-ob sa kinaiyahan ni Jesu Cristo, ang pagsul-ob sa hiyas sa espiritu santo, diin magpuyo ka nga langyaw niining kalibutana apan ha-om didto sa gingharian sa Amahang Diyos sa langit, Diin maoy atong buhatong tulomanon ang pagsimba didto sa langit, nga sa ato pa maoy atong buhaton dinhi sa yuta ang mga bulohaton didto sa gingharian sa langit, diin ang pag-ampo, paghalad ug pagsakripisyo.

Apan mga igsoon ania pa kita sa kalibutan diin ang kalibutan gigamhan usab sa mga dautang espiritu kay mao gayu gusto sa Diyos nga sulayan ang iyang mga katawhan samtang ania pa sa kalibutan, kay matod pa kung ang balaang espiritu anaa sa imong tuo nan ang dautang espiritu anaa usab sa imong wala diin sa kanunay nagahulat lamang ug higayon sa paglipat kanimo, kay matod pa dinhi sa kalibutan pareha ang kakusog sa gahum sa dautan ug ang gahum sa balaang espiritu, nan kun ikaw nagpakabala-an, diha sa pag-ampo ug pag-alagad sa Diyos kusog usab ang dautan nga mosulay kanimo.

Walay laing tubag ug sulbad diha sa mga pagsulay kundili ang mga pag-ampo ug mga paghalad, kay matod sa Diyos espiritu santo “ Tukhi ang pagsulay sa mga pag-ampo kay ani-a Ako si Ginoong Jesus nga manalipod kanimo. Busa mga igsoon atong mahingpit ang atong pag-alagad sa Diyos isip iyang tinun-an nan, diha sa atong mag pag-ampo, sulod sa imong kwarto ug panirado, ipiko ang imong tuhod ibayaw ang imong kamot ug luhod atubangan sa altar, ug pangayo-a ang kpasaylo-an sa Diyos sa imong mga kasal-anan, ug hilaki ang kalooy sa Diyos.